អន្តរជាតិ
អាមេរិក បើកភ្លើងខៀវចរចា បើកូរ៉េខាងជើងឈប់សាកល្បងនុយក្លេអ៊ែរ 10, Apr 2017 , 10:54 am
ប្រមុខការទូតអាមេរិក Rex Tillerson (រូបភាព Xinhua)
× ការចរចាលែងមានប្រយោជន៍ទៀតហើយ ព្រោះចរចា២០ឆ្នាំហើយកូរ៉េខាងជើងមិនបានបោះបង់មហិច្ឆតានុយក្លេអ៊ែរឡើយ។ នេះជាសម្ដីរបស់ប្រមុខការទូតអាមេរិក Rex Tillerson ដែលលែងចង់និយាយអ្វីច្រើនទៀតលើបញ្ហាកូរ៉េខាងជើងនេះ ហើយថែមទាំងលើកឡើងពីជម្រើសប្រើប្រាស់យោធាបង្ខំកូរ៉េខាងជើងឲ្យឈប់អភិវឌ្ឍកម្មវិធីនុយក្លេអ៊ែរទៅទៀត។ ប៉ុន្តែពេលនេះ ប្រមុខការទូតអាមេរិក បែរជាចង់លេបសម្ដី និងពិចារណារឿងចរចាឡើងវិញ បើកូរ៉េខាងជើងឈប់បញ្ចេញទង្វើព្រហើនទៀត។
ការគំរាមរបស់អាមេរិកលើកូរ៉េខាងជើង ប្រៀបដូចជាការចាកទឹកលើក្បាលទាដូច្នេះដែរ ព្រោះកូរ៉េខាងជើងមិនបានយកត្រចៀកស្ដាប់ឡើយ ហើយម្ដងជាពីរដង មានតែបាញ់មីស៊ីល ឬសាកល្បងនុយក្លេអ៊ែរផ្គើនទៀតផង។ ទំនងអស់ចិត្តនឹងការប្រើប្រាស់ធម៌ត្រជាក់ អាមេរិកក៏គំរាមប្រើធម៌ក្ដៅដាក់រដ្ឋកុម្មុយនីស្តមួយនេះ ព្រោះការចរចា និងទណ្ឌកម្មរាប់សិបឆ្នាំមកនេះ មិនបានធ្វើឲ្យកូរ៉េខាងផ្លាស់ប្ដូរជំហរឡើយ។
បើទោះជាជម្រើសយោធាត្រូវបានលើកឡើងដើម្បីដោះស្រាយបញ្ហាកូរ៉េខាងជើងក្ដី ការចរចាផ្លូវការការទូតដែលមិនសូវបានផល ក៏មិនត្រូវបានបោះបង់ដែរ។ រដ្ឋមន្ត្រីការបរទេសអាមេរិក Rex Tillerson និយាយថា អាមេរិកអាចពិចារណារឿងចរចាម្ដងទៀត បើកូរ៉េខាងជើងបង្ហាញជំហរឈប់ធ្វើតេស្តនុយក្លេអ៊ែរ ឬបាញ់មីស៊ីល។ ក្នុងករណីកូរ៉េខាងជើងបន្ទន់ជំហររបស់ខ្លួន អាមេរិក ក៏អាចបង្ហាញអាកប្បកិរិយាទន់ភ្លន់ដាក់វិញដែរ។
ក្នុងកិច្ចសម្ភាសជាមួយទូរទស្សន៍ ABC ចេញផ្សាយនៅថ្ងៃទី៩ ខែមេសា ប្រមុខការទូតអាមេរិករូបនេះ ក៏ប្រាប់កូរ៉េខាងជើងដែរថា គោលដៅរបស់អាមេរិកមិនមែនផ្លាស់ប្ដូររបបដឹកនាំប្រទេសនេះទេ តែដើម្បីការរំសាយអាវុធនុយក្លេអ៊ែរនៅឧបទ្វីបកូរ៉េប៉ុណ្ណោះ។ ការវិវត្តទៅមុខនៃសមត្ថភាពនុយក្លេអ៊ែររបស់កូរ៉េខាងជើង ក្លាយជាបញ្ហាដែលធ្វើឲ្យអាមេរិកឈឺក្បាលខ្លាំង និងត្រូវវិធីសាស្ត្រទប់ទល់ឲ្យទាន់ពេលវេលាផងដែរ។
ទន្ទឹមនឹងបំណងចង់ចរចា លោក Tillerson ក៏និយាយចំៗថា ការវាយប្រហារមីស៊ីល Tomahawk លើគោលដៅនៅស៊ីរី គឺជាការព្រមានប្រទេសទាំងឡាយ រួមទាំងកូរ៉េខាងជើងផង។ មានន័យថា បើកូរ៉េខាងជើងនៅតែធ្វើខុសច្បាប់អន្តរជាតិ និងក្លាយជាការគំរាមកំហែងដល់គេឯង មីស៊ីលស្រដៀងគ្នានឹងធ្លាក់លើទឹកដីកូរ៉េខាងជើងដូចគ្នា។ នេះក៏ព្រោះអាមេរិកធ្លាប់លើកឡើងហើយថា ជម្រើសចុងក្រោយ គឺមានតែយោធាប៉ុណ្ណោះ។
មិនមែនថាតែមាត់ឡើយ អាមេរិកក៏បានបញ្ជូននាវាមួយកងទៅកាន់តំបន់មហាសមុទ្រប៉ាស៊ីហ្វិកខាងលិច ដែលនៅក្បែរឧបទ្វីបកូរ៉េតែម្ដង។ នាវាមួយក្រុមនេះ ដឹកនាំដោយនាវាដឹកយន្តហោះ USS Carl Vinson និងអមដោយនាវាចម្បាំងជាច្រើនគ្រឿងទៀត។ នាវាមួយកងនេះ គឺជាកម្លាំងបន្ថែមរបស់អាមេរិក ដែលមានកងទ័ពជាច្រើនម៉ឺននាក់ និងសព្វាវុធធុនធ្ងន់នៅទីនោះច្រើនក្រាស់ក្រែលស្រាប់ហើយនោះ៕
Tag:
អាមេរិក
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com