អន្តរជាតិ
ម៉ាឡេស៊ី ចាប់បានកុយរមាសតម្លៃជាង៣លានដុល្លារនាំមកពីអាហ្វ្រិក 10, Apr 2017 , 8:39 pm
× កុយរមាសតម្លៃ៣.១លានដុល្លារ ត្រូវបានអាជ្ញាធរម៉ាឡេស៊ីចាប់បាននៅព្រលានយន្តហោះអន្តរជាតិក្រុងកូឡាឡាំពួរ។ អាជ្ញាធរម៉ាឡេស៊ីនិយាយថា កុយរមាសកម្រទាំងនេះ ត្រូវបាននាំចូលពីម៉ូសំប៊ិក ដោយឆ្លងកាត់ប្រទេសកាតានៅមជ្ឈិមបូព៌ា។ ម៉ាឡេស៊ី គឺជាគោលដៅឆ្លងកាត់ដ៏ញឹកញាប់បំផុតនៃការរត់ពន្ធកុយរមាសពីតំបន់អាហ្វ្រិក មុននឹងបន្តទៅកាន់ទីផ្សារចិន ដែលកំពុងមានតម្រូវការខ្ពស់កុយរមាសសម្រាប់ធ្វើឱសថ។
មន្ត្រីគយម៉ាឡេស៊ី បាននិយាយនៅថ្ងៃទី១០ ខែមេសា ថា កុយរមាសទម្ងន់ច្រើនជាង៥១គីឡូក្រាម ត្រូវបានចាប់ទុកនៅព្រលានយន្តហោះអន្តរជាតិកូឡាឡាំពួរ។ កុយរមាសចំនួន១៨ ត្រូវបានឃាត់ទុកនៅថ្ងៃទី៧ ខែមេសា ដោយដាក់បង្កប់ក្នុងឡាំងឈើក្នុងឃ្លាំងដាក់អីវ៉ាន់។ កុយរមាសតម្លៃជាង៣លានដុល្លារនេះ ត្រូវបានបញ្ជូនពីម៉ូសំប៊ិក ឆ្លងកាត់កាតា តាមជើងហោះហើរ Qatar Airway ។ កុយរមាសទាំងនេះ ត្រូវបានក្លែងជាវត្ថុសិល្បះដើម្បីរួចផុតពីភ្នែកគយ។
បើតាមទីភ្នាក់ងារព័ត៌មាន Reuters ប្រធានផ្នែកគយព្រលានយន្តហោះ លោក Hamzah Sundang និយាយថា អ្នកទទួលបញ្ញើកុយរមាស និងទីភ្នាក់ងារទទួល សុទ្ធតែក្លែងបន្លំ ហើយឯកសារទាំងអស់សម្រាប់ការដឹកជញ្ជូនកុយរមាសក៏ក្លែងក្លាយដែរ។ មកទល់ពេលនេះ អាជ្ញាធរម៉ាឡេស៊ី មិនទាន់ចាប់ខ្លួនជនសង្ស័យណាម្នាក់ឡើយ ហើយការស៊ើបអង្កេតកំពុងធ្វើឡើងដោយប៉ូលិសដើម្បីស្វែងរកការពិតបន្ថែមទៀត។
ម៉ាឡេស៊ី បានក្លាយជាគោលដៅក្នុងការដឹកជញ្ជូនកុយរមាសពីតំបន់អាហ្វ្រិក។ ប៉ុន្តែអាជ្ញាធរម៉ាឡេស៊ី ក៏លើកឡើងដែរថា ពេលខ្លះ ម៉ាឡេស៊ី ក៏ជាគោលដៅចុងក្រោយនៃការដឹកជញ្ជូនកុយរមាសដ៏មានតម្លៃនេះដែរ។ កុយរមាស កំពុងត្រូវប៉ាន់ខ្លាំងនៅតំបន់អាស៊ី ជាពិសេសចិន ដែលកំពុងមានតម្រូវការកុយរមាស និងភ្លុកដំរីច្រើន ក្នុងការធ្វើជាឱសថ។ នេះក៏ព្រោះតែ ជាញឹកញាប់ កុយរមាសភាគច្រើនដែលត្រូវចាប់បានមានគោលដៅទៅចិនតែម្ដង។
ជំនួញកុយរមាស ត្រូវបានហាមឃាត់ដោយអនុសញ្ញាអង្គការសហប្រជាជាតិ ដើម្បីការសត្វដ៏កម្រមួយនេះ។ ចំនួនរមាសនៅជុំវិញពិភពលោក បានធ្លាក់ចុះគួរឲ្យព្រួយបារម្ភពីមួយឆ្នាំទៅមួយឆ្នាំ ដោយសារការប្រមាញ់ខុសច្បាប់ ជាពិសេសរមាសតំបន់អាហ្វ្រិកតែម្ដង។ បើទោះជាមានការការពារក្ដី រមាសជាច្រើនរយក្បាល ត្រូវបានសម្លាប់យកកុយ ដើម្បីធ្វើជាឱសថច្រើនព្យាបាលជំងឺរាប់មុខពីជំងឺធម្មតា ដល់ជំងឺមហារីក។
ចិន ដែលជាទីផ្សារកុយរមាសដ៏ធំ បានប្រកាសបិទការនាំចូលកុយរមាស ដើម្បីជាផ្នែកនៃយុទ្ធនាការសង្គ្រោះសត្វព្រៃមួយនេះ។ ប៉ុន្តែគេនៅតែសង្កេតឃើញមានការរត់ពន្ធកុយរមាសដដែល ហើយភាគច្រើននៅតែដឹកជញ្ជូនទៅចិនដដែល ជាពិសេសផ្លូវអាកាសតែម្ដង។ ប្រទេសផ្សេងទៀតនៅអាស៊ានដូចជាថៃ កម្ពុជា និងវៀតណាម ក៏ជាគោលដៅឆ្លងកាត់នៃពាណិជ្ជកម្មកុយរមាសដែរ៕
© រក្សាសិទ្ធិដោយ thmeythmey.com