អន្តរជាតិ
ពូទីន មិនអាចឲ្យលោកខាងលិចទម្លាក់ អាសាដ ដូចជំនាន់ កាដាហ្វី? 10, Apr 2017 , 10:39 pm
× អនាគតរបស់ប្រធានាធិបតីស៊ីរី បាសា អាល់អាសាដ ស្ថិតនៅក្នុងភាពចម្រូងចម្រាសជាថ្មីទៀតបន្ទាប់ពីមានការប្រើប្រាស់អាវុធគីមីនៅខេត្ត Idlib។ អាមេរិកបញ្ជាក់ច្បាស់ថា អាសាដ គ្មានអនាគតឡើយក្នុងសម័យអន្តរកាលនយោបាយនៅពេលខាងមុខ ហើយអាមេរិកក៏ទាមទារឲ្យរុស្ស៊ីឈប់គាំទ្រនិងការពារមេដឹកនាំស៊ីរីនេះទៀតផង។ អាមេរិកបញ្ជាក់ តំបន់មជ្ឈិមបូព៌ាគ្មានសន្តិភាពទេ បើសិនជាមនុស្សដូចអាសាដបន្តកាន់កាប់រដ្ឋាភិបាលនិងគ្រប់គ្រងប្រទេសនោះ។
ប៉ុន្តែវាហាក់បីដូចជារឿងពិបាកកើតឡើង ដែលរុស្ស៊ីស្ថិតក្រោមការដឹកនាំរបស់លោក វ្ល៉ាឌីមៀ ពូទីន ត្រូវដកដៃឈប់គាំទ្ររបបដឹកនាំស៊ីរីបច្ចុប្បន្ននោះ។
ការបណ្តេញមេដឹកនាំ បាសា អាល់អាសាដ ពីតំណែងនិងប្តូររបបដឹកនាំនៅស៊ីរីក្លាយជារឿងអាទិភាពរបស់ក្រុងវ៉ាស៊ីនតោនជាថ្មីទៀតបន្ទាប់មានការប្រើប្រាស់ការចោទប្រកាន់របបនេះថាបានប្រើប្រាស់អាវុធគីមីប្រឆាំងជនស៊ីវិល។ សហរដ្ឋអាមេរិកដែលកន្លងមកហាក់រសាយចិត្តឈប់ប៉ងទម្លាក់ លោក អាសាដ ពីតំណែងហើយនោះបានប្រែក្រឡាស់សម្តីវិញដោយបញ្ជាក់ អាសាដគ្មានឡើយអនាគតក្នុងរបបដឹកនាំស៊ីរីឡើយ ។
តំណាងអាមេរិកប្រចាំអង្គការសហប្រជាជាតិលោកស្រី Nikki Haley ត្រឹមប្រាប់ក្រុមប្រឹក្សាសន្តិសុខនៅដើមខែមេសានេះ ប្រជាជនស៊ីរីមិនចង់ឲ្យលោក បាសា អាល់អាសាដ បន្តដឹកនាំប្រទេសប៉ុណ្ណោះប៉ុន្តែលោកមិនទាន់ព្រលយពីបំណងទម្លាក់មេដឹកនាំផ្តាច់ការរូបនេះទេ។
លោកស្រីបានបញ្ជាក់ថា៖ «ខ្ញុំមិនគិតថា ប្រជាជនស៊ីរីចង់បាន អាសាដ ជាមេដឹកនាំទៀតឡើយ។ យើងមិនគិតថា អាសាដ នឹងក្លាយជាមនុស្សដែលប្រជាជនចង់បានទេ។ យើងគ្មានក្តីអនុគ្រោះឯណាទៀតសម្រាប់អាសាដទេ ព្រោះយើងបាននិយាយច្បាស់ហើយ»។ យើងគិតថា អាសាដ នេះជាឧបសគ្គធំសម្រាប់ការបង្កើតសន្តិភាពយូរអង្វែង ហើយអាសាដជាឧក្រិដ្ឋជនសង្គ្រាម។ អ្វីដែលគេបានធ្វើលើពលរដ្ឋខ្លួននោះគឺគួរឲ្យខ្ពើមរអើមបំផុត»។
ប៉ុន្តែលើកនេះ បន្ទាប់ពីលោក ដូណាល់ ត្រាំ បញ្ជាឲ្យគេបាញ់ផ្លោងកម្ទេចមូលដ្ឋានទ័ពអាកាសនាក្រុង Homs នាសប្តាហ៍មុន ក្រុងវ៉ាស៊ីនតោនបញ្ជាក់ឡើងវិញថា បើមិនបណ្តេញ អាសាដ ពីតំណែងទេ គ្មានឡើយសន្តិភាពពិតប្រាកដនៅស៊ីរីឡើយ។ ប៉ុន្តែអ្វីដែលសំខាន់ អាមេរិកបច្ចុប្បន្ននៅតែប្រឈមមុខជាមួយរុស្ស៊ី បើសិនជាខ្លូនចង់ទម្លាក់ អាសាដ ចេញពីតំណែងមែននោះ។
១.អាមេរិកនឹងបន្តតាមទម្លាក់ បាសា អាល់អាសាដ ពីតំណែង
ការជម្រះមន្ទិលសង្ស័យពាក់ព័ន្ធគោលបំណងទម្លាក់មេដឹកនាំស៊ីរីនេះ ត្រូវបានបង្ហើបដោយរដ្ឋមន្ត្រីការបរទេសអាមេរិកផង និងតំណាងអាមេរិកប្រចាំអង្គការសហប្រជាតិផងនៅចុងសប្តាហ៍កន្លងទៅ។
លោកស្រីឯកអគ្គរដ្ឋទូតអាមេរិកប្រចាំអង្គការសហប្រជាជាតិ Nikki Haley បានប្រាប់សាព័ត៌មានថា គ្មានវិធីណាដែលគេអាចបង្កើតសន្តិភាពដោយបន្តទុកឲ្យរុស្សីការពារអាសាដដូចបច្ចុប្បន្នទេ ហើយអាមេរិកក៏មិនឃើញសន្តិភាពដែរនៅពេលដែល អាសាដ នៅធ្វើជាប្រមុខរដ្ឋាភិបាលស៊ីរីនោះ។
ចំណែករដ្ឋមន្ត្រីការបរទេសអាមេរិក Rex Tillerson ឯណោះវិញ មិនបាននិយាយចំៗទេ ប៉ុន្តែលោកបានបង្ហើបថា ក្រុងវ៉ាស៊ីនតោនកំពុងបន្តជជែកពិភាក្សាជាមួយសម្ព័ន្ធមិត្តនិងភាគីពាក់ព័ន្ធរឿងតួនាទីរបស់ អាសាដ។ ជាពិសេសកំណត់ថា តើមេដឹកនាំរូបនេះត្រូវចាកចេញដោយរបៀបណា។ តែប្រមុខការទូតអាមេរិករូបនេះប្រាប់ថា រាល់សកម្មភាពរបស់ អាសាដ ធ្វើកន្លងមកធ្វើឲ្យ បាត់បង់ភាពស្របច្បាប់ក្នុងនាមជាមេដឹកនាំរួចទៅហើយ។
នៅសប្តាហ៍នេះ រដ្ឋមន្ត្រីការបរទេសអាមេរិកលោក Rex Tillerson នឹងធ្វើដំណើរទៅរុស្ស៊ី ដើម្បីជួបពិភាក្សាជាមួយប្រធានាធិបតីរុស្ស៊ី វ្ល៉ាឌីមៀ ពូទីន។ ទំនាក់ទំនងទ្វេភាគី និងបញ្ហាចម្រូងចម្រាសដូចជារឿងស៊ីរីនេះនឹងស្ថិតក្នុងរបៀបវាៈនៃកិច្ចពិភាក្សានៅពេលខាងមុខ។ ប្រមុខការទូតអាមេរិកនេះក៏ប្រហែលជានឹងស្នើ និងបញ្ចុះបញ្ចូលសុំឲ្យរុស្ស៊ីឈប់បន្តគាំទ្រលោក បាសា អាល់អាសាដ ផងក៏មិនដឹង។
២.អាមេរិក៖ «រុស្ស៊ីត្រូវឈប់ការពារ អាសាដ បើចង់ស្តារទំនាក់ទំនងជាមួយអាមេរិក»
ខណៈដែល រដ្ឋមន្ត្រីការបរទេសអាមេរិកនឹងធ្វើដំណើរទៅម៉ូស្គូនិងជួបជាមួយមេដឹកនាំរុស្ស៊ី មន្ត្រីក្រុមប្រឹក្សាសន្តិសុខនៃរដ្ឋបាលលោក ដូណាល់ ត្រាំ បានទាមទារឲ្យរុស្ស៊ីឈប់ការពាររបបដឹកនាំ អាសាដ ទាំងផ្នែកយោធានិងការទូតទៀត។ សារខ្លីរបស់ក្រុងវ៉ាស៊ីនតោនគឺ បើរុស្ស៊ីមិនចង់ឲ្យទំនាក់ទំនងរវាងរុស្ស៊ីនិងអាមេរិកខូចខាតធ្ងន់ធ្ងរទេ រុស្ស៊ីត្រូវលះបង់ អាសាដ។
ក្នុងបទសម្ភាសមួយសារព័ត៌មាន ABC ចុងសប្តាហ៍នេះ រដ្ឋមន្ត្រីការបរទេសអាមេរិកបាននិយាយថា៖ «ខ្ញុំសង្ឃឹមថា រុស្ស៊ីកំពុងគិតប្រុងប្រយ័ត្នថាគួរបន្តសម្ព័ន្ធភាពជាមួយបាសា អាល់អាសាដ ព្រោះគ្រប់ពេលដែលមានការប្រើប្រាសអាវុធគីមី វាតែងតែមានការទទួលខុសត្រូវមួយសម្រាប់រុស្ស៊ីផ្ទាល់»។
លោក Tillerson មានជំនឿថា រុស្ស៊ីមិនប្តូរផ្តាច់ការពាររបបដឹកនាំស៊ីរីជាពិសេស បាសា អាល់អាសាដ រហូតមិនខ្វល់ពីទំនាក់ទំនងទ្វេភាគីជាមួយអាមេរិកឡើយ។ លោក បន្ថែមថា វាប្រហែលជាត្រូវការពេលវេលាដើម្បីសន្ទនា និងពិភាក្សាគ្នាឲ្យបានស៊ីជម្រៅ ដើម្បីស្វែងយល់ពីជំហរគ្នាទៅវិញទៅមក និងដើម្បីដោះស្រាយបញ្ហាប្រទាំងប្រទេសបច្ចុប្បន្ននេះផង។
មកដល់បច្ចុប្បន្នគ្មានភស្តុតាងណាមួយដែលបញ្ជាក់ថា រុស្ស៊ីមានជាប់ពាក់ព័ន្ធដោយផ្ទាល់លើសំណុំរឿងប្រើប្រាស់អាវុធគីមីនៅខេត្ត Idlib។ ប៉ុន្តែអាមេរិកជឿជាក់ រុស្ស៊ីមានទំនួលខុសត្រូវមួយដែរក្នុងបទឧក្រិដ្ឋប្រឆាំងមនុស្សជាតិនេះ ព្រោះក្នុងនាមជាសម្ព័ន្ធមិត្តមានទ័ពឈរជើងនៅទីនោះស្រាប់ រុស្ស៊ីគួរតែដឹងថាមានអ្វីឡើងពិតប្រាកដ។
ចំណែកទីប្រឹក្សាសន្តិសុខរបស់លោក ដូណាល់ ត្រាំ លោក H.R. McMaster បានថ្លែងក្នុងបទសម្ភាសន៍ជាមួយារព័ត៌មាន Fox News ថា លោកចង់ឲ្យអាមេរិកដាក់សម្ពាធលើរុស្ស៊ី និងឆ្លេចសួររុស្ស៊ីឲ្យច្បាស់រឿងដែលកងទ័ពជើងអាកាសស៊ីរីវាយប្រហារលើជនស៊ីវិលនិងសម្លាប់រង្គាលជនស្លូតត្រង់នោះ។
កន្លងមកក្រេមឡាំធ្លាប់សង្ឃឹមខ្ពស់ថា ក្រោយដូណាល់ ត្រាំ ជាប់ឆ្នោត ទំនាក់ទំនងទ្វេភាគីដែលល្អក់កករដែលបន្សល់ទុកដោយរដ្ឋបាលលោក បារ៉ាក់ អូបាម៉ា អាចនឹងប្រសើរឡើង។ ប៉ុន្តែក្តីសង្ឃឹមហាក់រសាយបាត់បន្តិចម្តងៗ ដោយសារគោលជំហររបស់លោក ត្រាំ ខុសពីអ្វីដែលលោកធ្លាប់សន្យាក្នុងពេលឃោសនា។
គេដឹងច្បាស់ថា វាមិនមែនជារឿងចៃដន្យទេ។ ការព្យាយាមដាក់សម្ពាធនិងប្រឈមមុខជាមួយរុស្ស៊ីពេលនេះ ក៏ដោយសារតែរដ្ឋបាលដូណាល់ ត្រាំ រងសម្ពាធខ្លាំងពីអ្នកនយោបាយនិងសាធារណជនអាមេរិក។ ការចោទថា រុស្ស៊ីនៅពីក្រោយការជាប់ឆ្នោតរបស់លោក ត្រាំ ជាមូលហេតុដែលជំរុញឲ្យ ដូណាល់ ត្រាំ ប្រឹងប្រែងបញ្ជាក់ប្រាប់គេឯងថា លោក គ្មានពាក់ព័ន្ធអ្វីជាមយរុស្ស៊ីទេ ហើយលោកក៏មិនខ្លាចរអែងរុស្ស៊ីដែរ។
៣.រុស្ស៊ីនឹងមិនឲ្យលោកខាងលិចកម្ចាត់ អាសាដ ម្នាក់ទៀតដូចលោក ហ្កាដាហ្វីទេ
ដូចបានបញ្ជាក់ខាងដើមស្រាប់ រដ្ឋបាល អាមេរិក ត្រូវប្រឈមមុខជាមួយរុស្ស៊ីដើម្បីឈានទៅបណ្តេញ អាសាដ ចេញពីតំណែងបានជោគជ័យនោះ។ បើរុស្ស៊ីមិនព្រមទេ រឿងនេះមិនទំនងអាចកើតឡើងទេ។ ទោះជាក្នុងកាលៈទេសៈណាក៏ដោយ វាមានហេតុផលច្រើនណាស់ដែលអាចបញ្ជាក់ថា ក្រេមឡាំងមិនចង់ឲ្យ អាសាដ របូតតំណែងនិងលែងមានតួនាទីក្នុងរបបដឹកនាំស៊ីរីនាពេលអនាគតទេ។
វាជាជ័យជម្នះរបស់លោកខាងលិច ព្រោះសង្គ្រាមនេះជាសង្គ្រាមដែលលូកលាន់ដោយមហាអំណាចតំបន់មានអ៊ីរ៉ង់ និងរដ្ឋឈូងសមុទ្រឯងទៀត និងមហាអំណាចដូចជាអាមេរិកនិងរុស្ស៊ីជាដើមផង។ បើ អាសាដ ទៅបាត់ វាជាជ័យជម្នះរបស់ពិតប្រាកដរបស់លោកខាងលិច, រដ្ឋឈូងសមុទ្រ និងក្រុមឧទ្ទាម ហើយរុស្ស៊ីប្រឹងចំណាយទ័ព, លុយ និងសព្វាវុធក្នុងសង្គ្រាមនេះគ្មានន័យអ្វីនោះ។
មួយទៀតទាក់ទងបញ្ហា ភូមិសាស្ត្រនយោបាយវិញនោះ របបដឹកនាំអាសាដដែលគ្រប់គ្រងស៊ីរីទំនងជាសម្ព័ន្ធមិត្តសំខាន់ចុងក្រោយបន្ទាប់ពីអ៊ីរ៉ង់នៅមជ្ឈិមបូព៌ា។ បើរុស្ស៊ីបណ្តែតបណ្តោយឲ្យរបូតបាត់ អាសាដ ពីក្បាលម៉ាស៊ីនដឹកនាំទៀត រុស្ស៊ីក្តី ឬអ៊ីរ៉ង់ក្តីក៏ពិបាកពង្រឹងឥទ្ធិពលនិងឈរជើងនៅមជ្ឈិមបូព៌ាទៀតដែរ។ នេះក៏ដោយសារ រដ្ឋាភិបាលដែលជាអ្នកស្និទ្ធនិងមានទំនោរទៅរកលោកខាងលិចនោះនឹងឡើងកាន់តំណែងម្តង។ ក្នុងនាមជាមេដឹកនាំកំពូលរបស់រុស្ស៊ី លោក វ្ល៉ាឌីមៀ ពូទីន មានជំហររឹងត្អឹងចំពោះលោកខាងលិច ហើយលោកនៅតែមានមហិច្ឆតាពង្រឹងឥទ្ធិពលរុស្ស៊ីឡើងវិញដូចសម័យសហភាពសូវៀតដែរ។ ដូច្នេះហើយ ការបើកផ្លូវឲ្យលោកខាងលិចទម្លាក់ អាសាដ មិនមែនអ្វីដែលលោក ពូទីន ចង់ឃើញឡើយ។
មួយទៀត លោក វ្ល៉ាឌីមៀ ពូទីន យល់ច្បាស់ពីកំហុសឆ្គងមួយរបស់រុស្ស៊ីនៅឆ្នាំ ២០១១លោក ឌីមីទ្រីម៉េដវេដេវ ធ្វើជាប្រធានាធិបតី ដែលលោកមិនព្រមការពារលោក ម៉ូអាម៉ា ហ្កាដាហ្វី (Muammar Gaddafi) បណ្តោយឲ្យលោកខាងលិចទម្លាក់ពីតំណែង។ កន្លងមកលោក ពូទីន ក៏សោកស្តាយផងដែរចំពោះបញ្ហាដែលកើតឡើងនៅលីប៊ី ជាពិសេស រឿងដែលបក្សសម្ព័ន្ធយោធាណាតូ សម្លាប់លោក ហ្កាដាហ្វី នោះ៕
Tag:
ស៊ីរី
វ្ល៉ាឌីមៀ ពូទីន
បាសា អាល់ អាសាដ
ដូណាល់ ត្រាំ
© រក្សាសិទ្ធិដោយ thmeythmey.com