អន្តរជាតិ
ពូទីន ថាលោកមានព័ត៌មានបញ្ជាក់ថាអាមេរិកមានផែនការបាញ់ផ្លោងមីស៊ីលចូលស៊ីរីជាថ្មីទៀត 12, Apr 2017 , 7:19 pm
× ប្រធានាធិបតីរុស្ស៊ីលោក វ្ល៉ាឌីមៀ ពូទីន បានលើកឡើងនៅថ្ងៃអង្គការទី ១១ មេសាថា រុស្ស៊ីមានព័ត៌មានដែលអាចបញ្ជាក់ថា អាមេរិកបានរៀបចំគម្រោងដើម្បីបាញ់មីស៊ីលផ្លោងចូលស៊ីរីថែមទៀត ហើយក៏មានផែនការដើម្បីបង្កើតព័ត៌មានក្លែងក្លាយពាក់ព័ន្ធការវាយប្រហារអាវុធគីមីថែមទៀត នៅស៊ីរីផងដើម្បីបានជាលេស។
ក្នុងសន្និសីទសារព័ត៌មានជាមួយប្រធានាធិបតីអ៊ីតាលីលោក Sergio Mattarella ប្រធានាធិបតីរុស្ស៊ីលោក វ្ល៉ាឌីមៀ ពូទីន បានឆ្លើយសំណួរអ្នកសារព័ត៌មានពាក់ព័ន្ធសកម្មភាពរបស់ក្រុងវ៉ាស៊ីនតោននៅស៊ីរី។ លោកបានបញ្ជាក់ថា ក្រុងវ៉ាស៊ីនតោនមានផែនការវាយប្រហារស៊ីរីដោយមីស៊ីលទៀត ហើយការបង្កើតការចោទប្រកាន់អាជា្ញធររឿងប្រើប្រាស់អាវុធគីមីថែមទៀត។
យោងតាមទីភ្នាក់ងារព័ត៌មាន Reuters លោក វ្ល៉ាឌីមៀ ពូទីន បានបញ្ជាក់ដូច្នេះ៖« យើងមានព័ត៌មានដែលនបង្ហាញថា ការវាយប្រហារដូចកាលកន្លងមកត្រូវបានគេរៀបចំទៀតហើយ។ វានៅផ្នែកផ្សេងទៀតនៃប្រទេសស៊ីរី រួមទាំងនៅភាគខាងត្បូងរដ្ឋធានីដាម៉ាសដែលជាកន្លែងពួកគេរៀបចំដាក់អាវុធគីមី និងចោទប្រកាន់អាជ្ញាធរស៊ីរីរឿងប្រើប្រាស់អាវុធគីមីនេះផងដែរ»។
ប៉ុន្តែនៅក្នុងសន្និសីទសារព័ត៌មាននេះ លោក ពូទីន មិនបានផ្តល់ភស្តុតាងឡើយជុំវិញការប្រាប់អ្នកសារព័ត៌មានថាលោកមានព័ត៌មានជាក់លាក់នោះ។
តាមពិតទៅ លោក ពូទីន ឆ្លើយតបសំណួរអ្នកសារព័ត៌មាននិងចោទអាមេរិកនោះនៅតែប៉ុន្មានម៉ោងប៉ុណ្ណោះមុនពេលដែលរដ្ឋមន្ត្រីការបរទេសអាមេរិកលោក Rex Tillerson ទៅដល់ក្រុងម៉ូស្គូដើម្បីជជែកពីបញ្ហាទំនាក់ទំនងទ្វេភាគីផងនិងបញ្ហាស៊ីរីផង។ គេដឹងច្បាស់ថា ប្រមុខការទូតអាមេរិកទៅរុស្ស៊ី ហើយនឹងបន្តស្កាត់ជួបមេដឹកនាំរុស្ស៊ីដើម្បីបញ្ចុះបញ្ចូលឲ្យរុស្ស៊ីលះបង់របបដឹកនាំស៊ីរី។
រដ្ឋបាល ដូណាល់ ត្រាំ បន្តទាមទារឲ្យរុស្ស៊ីលះបង់របបដឹកនាំស៊ីរីរបស់ បាសា អាល់អាសាដ បើសិនជារុស្ស៊ីចង់ស្តារទំនាក់ទំនងជាមួយអាមេរិក។ ក្រុងវ៉ាស៊ីនតោនបានអះអាងច្បាស់ហើយថា មេដឹកនាំស៊ីរីបច្ចុប្បន្នគ្មានភាពស្របច្បាប់ដើម្បីកាន់តំណែងឡើយ ហើយបើអាសាដ បន្តនៅកាន់តំណែងសន្តិភាពនៅស៊ីរីគ្មានថ្ងៃកើតឡើងឡើយ។
យ៉ាងណាមិញ គេមិនឃើញមានសញ្ញាណាមួយដែលបង្ហាញថា លោក វ្ល៉ាឌីមៀ ពូទីន ត្រៀមខ្លួនលះបង់ប្រធានាធិបតីស៊ីរីលោក បាសា អាល់អាសាដ តាមការចង់បានរបស់អាមេរិកឡើយ។ ក្រោយពេលដែលទាហានអាមេរិកបាញ់ផ្លោងកម្ទេចមូលដ្ឋានទ័ពស៊ីរីនៅក្រុង Homs កាលពីយប់ថ្ងៃព្រហស្បតិ៍សប្តាហ៍មុន លោក ពូទីន ហាក់ខឹងសម្បារខ្លាំងហើយលោកបានចាត់ទុកសកម្មភាពគឃ្លើនរបស់ក្រុងវ៉ាស៊ីនតោនជាការឈ្លានពានប្រឆាំងសមាជិកអង្គការសហប្រជាជាតិផងដែរ។
លោកក៏បានបន្តការពាររដ្ឋាភិបាលស៊ីរីផងដែរ ពាក់ព័ន្ធការចោទប្រកាន់របស់លោកខាងលិចពាក់ព័ន្ធការប្រើប្រាស់អាវុធគីមីនៅក្នុងខេត្ត Idlib កាលពីសប្តាហ៍មុនដែលបានសម្លាប់មនុស្សយ៉ាងហោចណាស់ ៧០នាក់នោះ។ រុស្ស៊ីបកស្រាយថា រដ្ឋាភិបាលស៊ិរីមិនបានប្រើប្រាស់អាវុធគីមីឡើយ ប៉ុន្តែទ័ពរដ្ឋាភិបាលស៊ីរីបានវាយប្រហារលើឃ្លាំងអាវុធដែលមានផ្ទុកអាវុធគីមីទើបបានជាមានធ្លាយសារធាតុពុលចេញនិងបង្កគ្រោះថ្នាក់បែបនេះ។ ប៉ុន្តែការបកស្រាយនេះមិនត្រូវបានលោកខាងលិចទទួលយកឡើយ៕
Tag:
វ្ល៉ាឌីមៀ ពូទីន
បាសា អាល់អាសាដ
ដូណាល់ ត្រាំ
© រក្សាសិទ្ធិដោយ thmeythmey.com