អន្តរជាតិ
ក្រុមភេរវជនរដ្ឋឥស្លាមកាន់តែចុះខ្សោយនៅកាន់កាប់ទឹកដីតិចជាង ៧ភាគរយនៅអ៊ីរ៉ាក់ 12, Apr 2017 , 8:19 pm
× ក្រុមភេរវជនរដ្ឋឥស្លាមឬក្រុមដែស្ហបច្ចុប្បន្នកាន់កាប់ទឹកដីតិចជាង ៧ភាគរយប៉ុណ្ណោះនៅទូទាំងប្រទេសអ៊ីរ៉ាក់ ដែលវាធ្លាក់ចុះពី ៤០ភាគរយដែលជាទំហំពួកគេធ្លាប់កាន់កាប់កាលពីបីឆ្នាំមុន។ នេះបង្ហាញឲ្យឃើញពីបរាជ័យដ៏ធំរបស់ក្រុមភេរវជននេះ ហើយពួកគេក៏កំពុងស្ថិតក្រោមការតាមប្រមាញ់របស់ក្រុមសម្ព័ន្ធអន្តរជាតិដឹកនាំដោយអាមេរិកដែរ។
ក្រុមភេរវជនរដ្ឋឥស្លាមឬក្រុមដែស្ហ (Daesh) កំពុងបន្តធ្លាក់ចុះឥទ្ធិពល នៅក្នុងទឹកដីអ៊ីរ៉ាក់។ ទឹកដីដែលខ្លួនធ្លាប់កាន់កាប់មានទំហំ ៤០ភាគរយនៅអ៊ីរ៉ាក់ បានបន្តធ្លាក់ចុះមកត្រឹមតែក្រោម៧ភាគរយប៉ុណ្ណោះ។
កងកម្លាំងរដ្ឋាភិបាលអ៊ីរ៉ាកដែលទទួលបានការគាំទ្រផ្លូវអាកាសពីក្រុមសម្ព័ន្ធអន្តរជាតិកំពុងបន្តប្រយុទ្ធប្រឆាំងក្រុមភេរវជនរដ្ឋឥស្លាមដើម្បីដណ្តើមយកទីក្រុង Mosulទៀត ក្រោយពេលពួកគេបានវាយដណ្តើមទឹកដីច្រើនផ្សេងទៀតពីក្រុមភេរវជននេះ។
យោងតាមទីភ្នាក់ងារព័ត៌មាន AFP អ្នកនាំពាក្យទីបញ្ជាការនៃសហការប្រតិបត្តិការរួមប្រឆាំងភេរវកម្ម Yahya Rasool បានបញ្ជាក់ថា ៖« ក្រុមភេរវជនរដ្ឋឥស្លាមឬក្រុមដែស្ហបានគ្រប់គ្រងទឹកដី ៤០ភាគរយនៃប្រទេសអ៊ីរ៉ាក់នៅឆ្នាំ ២០១៤។ នៅត្រឹមថ្ងៃ ៣១ ខែមីនាឆ្នាំ ២០១៧ ពួកគេនៅសល់ទឹកដីសរុបត្រឹមតែ ៦,៨ភាគរយប៉ុណ្ណោះ»។
កន្លងមកកងកម្លាំងអន្តរជាតិនិងកងកម្លាំងអ៊ីរ៉ាក់ដែលបន្តច្បាំងកម្ចាត់ក្រុមភេរវជននេះមិនឯកភាពគ្នាឡើយលើទំហំទឹកដីដែលក្រុមភេវជនរដ្ឋឥស្លាមនេះកាន់កាប់ទាំងអស់ ប៉ុន្តែជារួមគេដឹងថា ក្រុមនេះបន្តធ្លាក់ចុះខ្សោយខ្លាំងក្នុងរយៈពេលពីរឆ្នាំចុងក្រោយនេះប៉ុណ្ណោះ។
តាមពិតទៅក្រុមភេរវជនរដ្ឋឥស្លាមនេះបានដណ្តើមកាន់កាប់ទឹកដីក្រុងដ៏ធំរបស់អ៊ីរ៉ាក់ទីពីរ Mosul នេះនៅខែមិថុនាឆ្នាំ ២០១៤ ហើយក្រុមនេះបន្តដណ្តើមកាន់កាប់ទឹកដីអ៊ីរ៉ាក់បានយ៉ាងធំល្វឹងល្វើយជាបន្តបន្ទាប់។ ប៉ុន្តែដល់ខែតុលាឆ្នាំ ២០១៦ កងទ័ពអ៊ីរ៉ាក់ ដោយមានការគាំទ្រពីសំណាក់កម្លាំងសម្ព័ន្ធអន្តរជាតិដឹកនាំដោយអាមេរិកផងនោះ បានបើកយុទ្ធនាការយោធាទ្រង់ទ្រាយធំដើម្បីដណ្តើមយកទឹកដីក្រុង Mosul ។
បច្ចុប្បន្ននេះសម្ព័ន្ធអន្តរជាតិជាពិសេសសហរដ្ឋអាមេរិកកំពុងបន្តស្វែងរកយុទ្ធសាស្ត្រមានប្រសិទ្ធភាពដើម្បីកម្ចាត់ក្រុមភេរវជនរដ្ឋឥស្លាមនេះ។ ក្រោយការឡើងកាន់តំណែងជាប្រធានាធិបតីអាមេរិក ដូណាល់ ត្រាំ មិនទាន់បានបញ្ចេញយុទ្ធសាស្ត្ររបស់ខ្លួនដើម្បីកម្ចាត់ក្រុមភេរវជនរដ្ឋឥស្លាមឡើយ។ ប៉ុន្តែកាលពីសប្តាហ៍មុនគេឃើញ កូនប្រសារលោក ដូណាល់ ត្រាំ ដែលជាសមាជិកក្រុមប្រឹក្សាសន្តិសុខរបស់លោកផងនោះទៅបំពេញទស្សនកិច្ចនៅអ៊ីរ៉ាក់ដើម្បីស្វែងយល់ពីស្ថានភាពជាក់ស្តែងនិងដើម្បីបង្កើតយុទ្ធសាស្ត្រផង៕
Tag:
Daesh
អ៊ីរ៉ាក់
Mosul
© រក្សាសិទ្ធិដោយ thmeythmey.com