អន្តរជាតិ
រដ្ឋមួយនៅឥណ្ឌា អ្នកសម្លាប់សត្វគោអាចជាប់គុកមួយជីវិតនិងអ្នកដឹកសាច់គោអាចជាប់ដប់ឆ្នាំ 18, Apr 2017 , 7:59 am
× រដ្ឋ Gujarat របស់ឥណ្ឌាបានសម្រេចបង្កើនទោសសម្រាប់រាល់មនុស្សដែលសម្លាប់សត្វគោ។ អ្នកដែលសម្លាប់គោប្រឈមមុខនឹងការកាត់ទោសឲ្យជាប់គុកមួយជីវិត ហើយអ្នកដឹកជញ្ជូនសាច់សត្វគោត្រូវជាប់គុក ១០ឆ្នាំឯណោះ។ វាបង្ហាញឲ្យឃើញពីការរឹតបន្តឹងការអនុវត្តច្បាប់ដែលបង្កើតឡើងដោយអ្នកកាន់សាសនាហិណ្ឌូដើម្បីដាក់សម្ពាធលើអ្នកដែលមិនប្រតិបត្តិសាសនាហិណ្ឌូក្នុងសង្គមឥណ្ឌា។
ប្រហែលជាមានតែនៅឥណ្ឌាទេ ដែលការសម្លាប់គោជាបទឧក្រិដ្ឋ ហើយអ្នកប្រព្រឹត្តអាចប្រឈមនឹងការកាត់ទោសឲ្យជាប់ពន្ធនាគារពេញមួយជីវិតផងដែរ។ ការដាក់ទោសធ្ងន់ធ្ងរដល់អ្នកសម្លាប់សត្វគោនេះគឺនៅក្នុងរដ្ឋ Gujarat ដែលសម្បូរដោយអ្នកគោរពប្រតិបត្តិសាសនាហិណ្ឌូនោះ។
យោងតាមសារព័ត៌មាន New York Times ការសម្រេចបង្កើនទោសម្រាប់អ្នកសម្លាប់សត្វគោនេះត្រូវបានដាក់ចេញក្រោយពេលដែលរដ្ឋបាលបង្ក្រាបកន្លែងសត្តឃាតសត្វគោដែលបង្កើតឡើងដោយប្រជាជនមូស្លីមនៅរដ្ឋ Uttar Pradesh។
ហើយការសម្រេចចិត្តនេះក៏កើតចេញពីការឈ្នះឆ្នោតរបស់គណបក្សជាតិហិណ្ឌូ Janata (BJP) របស់នាយករដ្ឋមន្ត្រីឥណ្ឌា នារិន្ទ្រា ម៉ូឌី ឈ្នះឆ្នោតក្នុងរដ្ឋ Uttar Pradesh ភ្លូកទឹកភ្លូកដីនោះ។ ជ័យជម្ននេះវានាំឲ្យមានការតែងតាំងបុព្វជិតសាសនាហិណ្ឌូដែលជាអ្នកប្រតិបត្តិសាសនាតឹងរ៉ឹងជ្រុលYogi Adityanathជាប្រមុខរដ្ឋាភិបាលប្រចាំរដ្ឋតែម្តង។
តាមពិតទៅនៅរដ្ឋ Uttar Pradesh គេអាចសម្លាប់គោយកសាច់បាននៅពេលដែលសត្វទាំងនោះលែងអាចផលិតទៅដោះគោបាន។ ប៉ុន្តែក្រុមសកម្មជនអ្នកកាន់សាសនាហិណ្ឌូនៅរដ្ឋ Uttar Pradesh បានអះអាងថា រោងចក្រខ្លះបានធ្វើសកម្មភាពខុសច្បាប់ដោយសម្លាប់សត្វគោ។
ត្រឡប់មកវិញនៅរដ្ឋ Gujarat ការសម្លាប់សត្វគោជារឿងខុសច្បាប់យូរហើយ ដោយសារវាមានច្បាប់ហាមឃាត់។ នេះក៏ ព្រោះនៅរដ្ឋនេះធ្លាប់ស្ថិតក្រោមការគ្រប់គ្រងរបស់លោកនាយករដ្ឋមន្ត្រី នារិន្ទ្រា ម៉ូឌី មុនលោកក្លាយជានាយករដ្ឋមន្ត្រីនៅឆ្នាំ ២០១៤នោះ។ ប៉ុន្តែច្បាប់នេះដាក់ទោសទណ្ឌដល់អ្នកសម្លាប់សត្វគោត្រឹមតែជាប់គុក ៧ឆ្នាំប៉ុណ្ណោះអតិបរមា ខណៈពេលដែលបច្ចុប្បន្នគេអាចជាប់គុកមួយជីវិតឯណោះ។
ចំណែកអ្នកដឹកជញ្ជូនសាច់គោក៏ត្រូវកាត់ទោសដូចគ្នា ហើយទោសសម្រាប់បទល្មើសនេះត្រូវបានគេដំឡើងពីបីឆ្នាំដល់ ១០ឆ្នាំឯណោះ។ ហើយមិនត្រឹមតែប៉ុណ្ណោះទេអាជ្ញាធរក៏អាចមានសិទ្ធិរឹបអូសយករាល់យាន្តជំនិះដែលប្រើប្រាស់ដើម្បីដឹកជញ្ជូនសាច់សត្វគោផងដែរ៕
© រក្សាសិទ្ធិដោយ thmeythmey.com