អន្តរជាតិ
ដូណាល់ ត្រាំ ព្រមានម្ដងទៀត «កូរ៉េខាងជើង កំពុងរកបញ្ហាដាក់ខ្លួនហើយ» 12, Apr 2017 , 2:25 pm
× ប្រធានាធិបតី ដូណាល់ ត្រាំ បានព្រមានជាថ្មីទៀតថា ក្រុងវ៉ាស៊ីនតោន ត្រៀមខ្លួនរួចរាល់ហើយក្នុងការអន្តរាគមន៍ដោយខ្លួនឯង ដើម្បីបញ្ចប់បញ្ហានុយក្លេអ៊ែរកូរ៉េខាងជើង។ នេះ ក៏ព្រោះតែចិននៅមិនទាន់មានចំណាត់ការធំដុំណាមួយឡើយ បើទោះជាអាមេរិកទទូចឲ្យជួយច្រើនលើកច្រើនសារក៏ដោយ ស្របពេលដែលកូរ៉េខាងជើងឯណោះ ក៏មិនចាញ់សំឡុតរបស់អាមេរិកទៅទៀត។ កូរ៉េខាងជើង ក៏ប្រកាសក្ដែងៗហើយថា ខ្លួនត្រៀមរួចរាល់ក្នុងការធ្វើសង្គ្រាមជាមួយអាមេរិក។
អាមេរិក និងកូរ៉េខាងជើង កំពុងផ្លាស់ប្ដូរសង្គ្រាមពាក្យសម្ដីដាក់គ្នាទៅវិញទៅមក ដែលធ្វើឲ្យស្ថានការណ៍នៅតំបន់អាស៊ីខាងកើតឡើងកម្ដៅកាន់តែខ្លាំង។ ប្រធានាធិបតី ដូណាល់ ត្រាំ បានព្រមានចាត់វិធានការឯកតោភាគីដើម្បីបង្ខំឲ្យកូរ៉េខាងជើងបោះបង់កម្មវិធីនុយក្លេអ៊ែររបស់ខ្លួន។ ការព្រមាននេះ ធ្វើឡើងខណៈដែលនាវាដឹកយន្តហោះ USS Carl Vinson ធ្វើដំណើរទៅកៀកឧបទ្វីបកូរ៉េ ដែលនេះជាការសម្ញែងអានុភាពយោធា ប៉ុន្តែកូរ៉េខាងជើងមិនព្រឺនឹងវត្តមាននាវានេះឡើយ។
នៅថ្ងៃទី១១ ខែមេសា លោក ត្រាំ ក៏បានបន្តលើកឡើងពីលទ្ធភាពដែលអាមេរិកធ្វើអន្តរាគមន៍ដោយខ្លួនឯង បើចិននៅតែមិនព្រមជួយដោះស្រាយបញ្ហាសម្ព័ន្ធមិត្តក្បាលរឹងរបស់ខ្លួនទៀតនោះ។ កាលពីជំនួបសប្ដាហ៍មុន លោក ត្រាំ ក៏បានស្នើឲ្យប្រធានាធិបតី ស៊ី ជីនភីង ធ្វើអ្វីម្យ៉ាងដើម្បីដោះស្រាយរឿងនេះ។ ក្នុងសារបង្ហោះលើ Twitter លោក ត្រាំ និយាយថា៖ «កូរ៉េខាងជើង កំពុងរកបញ្ហាដាក់ខ្លួនហើយ។ វាជារឿងល្អ បើចិនសម្រេចចិត្តជួយ តែបើមិនជួយ អាមេរិកនឹងដោះស្រាយដោយគ្មានចិន»។
យ៉ាងណាមិញ ប្រធានាធិបតីអាមេរិករូបនេះទំនងយករឿងពាណិជ្ជកម្ម ដើម្បីទាក់ចិត្តចិនឲ្យជួយ។ តាមបណ្ដាញសង្គម Twitter លោក ត្រាំ បញ្ជាក់ថា លោកបានពន្យល់ប្រធានាធិបតីចិន ពីផលប្រយោជន៍ពាណិជ្ជកម្មដែលប្រសើរជាងមុន បើចិនព្រមជួយមែននោះ។ ប៉ុន្តែមកទល់ពេលនេះ ចិន នៅតែមិនទាន់ធ្វើអ្វីនៅឡើយទេ ក្រៅតែពីការស្នើឲ្យភាគីពាក់ព័ន្ធវិលចូលតុចរចា និងមិនត្រូវធ្វើអ្វីដែលប៉ះពាល់សន្តិភាព និងស្ថិរភាពតំបន់ឡើយ។
សង្គ្រាមពាក្យសម្ដីរវាងអាមេរិក និងកូរ៉េខាងជើង កាន់តែក្ដៅគគុក ក្រោយអាមេរិកបាញ់មីស៊ីល៥៩គ្រាប់ដាក់ស៊ីរី ដែលគេជឿថាជាការព្រមានរបបក្រុងព្យុងយ៉ាង។ លោក ត្រាំ បញ្ជាឲ្យបាញ់មីស៊ីលនេះ ទាំងប្រធានាធិបតីចិនកំពុងស្ថិតនៅទឹកដី ហើយនេះក៏អាចជាសញ្ញាប្រាប់ចិនដែរថា មីស៊ីលដូចគ្នានេះអាចធ្លាក់លើកូរ៉េខាងជើងដែរ។ ប៉ុន្តែកូរ៉េខាងជើងវិញ មិនបានខ្លបខ្លាចការព្រមានរបស់អាមេរិកឡើយ ហើយថែមទាំងបោះសម្ដីឲ្យអាមេរិកវិញទៀត។
គេជឿថា កូរ៉េខាងជើង អាចសាកល្បងនុយក្លេអ៊ែរម្ដងទៀតនៅអំឡុងខែមេសានេះ ដោយសារមានកម្មវិធីពិសេសជាច្រើន។ នៅចុងសប្ដាហ៍នេះ កូរ៉េខាងជើង នឹងអបអរខួបកំណើ់តទី១០៥ឆ្នាំ ថ្ងៃកំណើតស្ថាបនិកកូរ៉េខាងជើង គីម អ៊ីលស៊ុង ដែលតាមទម្លាប់កន្លងមក ប្រទេសនេះអាចសាកល្បងនុយក្លេអ៊ែរ ឬក៏បាញ់មីស៊ីលបាលីស្ទិកក៏ថាបាន។ បើពិតជាដូច្នេះមែន ស្ថានការណ៍ឧបទ្វីបកូរ៉េ ច្បាស់ជាធ្លាក់ចូលគ្រោះថ្នាក់មិន ដ្បិតអាមេរិករបស់លោក ត្រាំ ពិតជាមិនស្ងៀមឲ្យកូរ៉េខាងជើងអុងអាត់តែឯងឡើយ៕
Tag:
ដូណាល់ ត្រាំ
អាមេរិក
កូរ៉េខាងជើង
© រក្សាសិទ្ធិដោយ thmeythmey.com