អន្តរជាតិ
លោក ពូទីន និងមេវ៉េដេវ ម្នាក់ៗរកលុយបានត្រឹម ១៥ម៉ឺនដុល្លារឆ្នាំ២០១៦ 18, Apr 2017 , 9:39 pm
× សប្តាហ៍មុន វិមានក្រេមឡាំងបានចុះផ្សាយរបាយការណ៍ប្រកាសទ្រព្យសម្បត្តិដែលបណ្តាមេដឹកនាំរុស្ស៊ីមានទាំងប្រធានាធិបតីនិងនាយករដ្ឋមន្ត្រីរុស្ស៊ីមាន និងលុយដែលពួកគេរកបានឆ្នាំ ២០១៦ផងដែរ។ លោក វ្ល៉ាឌីមៀ ពូទីន និងលោក ឌីមីទ្រី មេដវ៉េដេវ ម្នាក់ៗរកលុយបានជាង១៥ម៉ឺនដុល្លារកាលពីឆ្នាំមុន ហើយអ្នកទាំងពីរក៏មានទ្រព្យសម្បត្តិផ្សេងទៀតដូចជា អាផាតមិន, ដីធ្លី ជាដើមផងដែរ។
ការប្រកាសទ្រព្យសម្បត្តិ និងលុយដែលអ្នកនយោបាយរុស្ស៊ីរកបានប្រចាំឆ្នាំ ក្លាយជារឿងគួរឲ្យចាប់អារម្មណ៍មួយ។ បើតាមគេហទំព័រវិមានប្រធានាធិបតី ក្នុងចំណោមអ្នកនយោបាយដែលត្រូវប្រកាសទ្រព្យសម្បត្តិនិងប្រាក់ដែលខ្លួនរកបានប្រចាំឆ្នាំនោះមានទាំងប្រធានាធិបតី និងនាយករដ្ឋមន្ត្រីផងដែរ។ ប៉ុន្តែ របាយការណ៍នេះមិនបញ្ជាក់ពីលុយដែលពួកគេមានសរុប និងភាគហ៊ុនដែលមានក្នុងជំនួញឡើយ។
១.ប្រធានាធិបតីរុស្ស៊ីលោក វ្ល៉ាឌីមៀ ពូទីន រកលុយបាន ១៥ម៉ឺនដុល្លារឆ្នាំ ២០១៦
យោងតាមសារព័ត៌មាន Russia Beyond the Headline លោក វ្ល៉ាឌីមៀ ពូទីន រកបានលុយប្រហែល ១៥៦៥០៤ដុល្លារនៅក្នុងឆ្នាំ ២០១៦ ដែលវាប្រហាក់ប្រហែលទំហំលុយដែលលោករបានកាលពីឆ្នាំ ២០១៥ដែរ។ ប៉ុន្តែគេមិនឃើញមានការប្រកាសពីទំហំលុយសរុបដែលមេដឹកនាំរុស្ស៊ីម្នាក់មានឡើយ។
ក្រៅពីលុយរកបានប្រចាំឆ្នាំ របាយការណ៍នោះក៏បានបង្ហាញថា លោក ពូទីន មានដីទំហំ ១៥០០ ម៉ែត្រការ៉េ,អាផាតមិនមួយកន្លែងមានទំហំ ៧៧ម៉ែត្រការ៉េ និងមានឃ្លាំងថយន្តមួយកន្លែងផង។
ក្រៅដី,ផ្ទះ និងឃ្លាំងរថយន្ត លោក ពូទីន ក៏មានឡានប៉ុន្មានគ្រឿងដែរ។ ឡានដែលលោកមានជាប្រភេទឡានផលិតនៅរុស្ស៊ីដូចជា ឡានម៉ាក Volgas ពីរគ្រឿង និងម៉ាក Niva មួយគ្រឿងផងដែរ។ ចំណែកឡាន, យន្តហោះ និងឧទ្ធម្ភាគចក្រដែលលោកប្រើប្រាស់ក្នុងនាមជាប្រធានាធិបតីកន្លងមកនោះមិនមានដាក់ចូលក្នុងបញ្ជីទ្រព្យសម្បត្តិដែលប្រកាសជាសាធារណឡើយ។
២.ឌីមីទ្រី មេដវ៉េដេវ រកលុយបានប្រហាក់ប្រហែលលោក ពូទីន តែមានដីធំជាង
បើតាមរបាយការណ៍ផ្លូវការ ដូចលោក ពូទីន ដែរ លោក ឌីមីទ្រី មេដវ៉េដេវ (Dmitry Medvedev) រកលុយបានជាង១៥ម៉ឺនដុល្លារដែរនៅក្នុងឆ្នាំ ២០១៦ ប៉ុន្តែទំហំលុយនេះថយចុះជាងឆ្នាំ ២០១៥។ ឆ្នាំ ២០១៦ លោករកលុយជាផ្លូវការបាន១៥១៧០៨ ដុល្លារ ខណៈដែលឆ្នាំ ២០១៥លោករកបាន១៥៤៩០៤ ដុល្លារឯណោះ។ យ៉ាងណាក៏ដោយ វាមិនមានរបាយការណ៍ជាក់លាក់ពាក់ព័ន្ធលុយសរុបដែលអតីតប្រធានាធិបតីរុស្ស៊ីម្នាក់នេះមានឡើយ។
បន្ថែមពីលើប្រាក់រកបានប្រចាំឆ្នាំ លោក មេដវ៉េដេវ មានរថយន្តពីរ គ្រឿងក្នុងនោះមាន GAZ-20 Victory ឆ្នាំ ១៩៤៨ និង GAZ-21 Volga ម៉ូដែលឆ្នាំ ១៩៦៨។ មួយគ្រឿងទៀតម៉ាក Volkswagen ដែលវាជារថយន្តដែលចុះឈ្មោះរបស់ភរិយាលោកផ្ទាល់។ ទ្រព្យសម្បត្តិផ្សេងទៀតដែលលោកកំពុងកាន់កាប់មានដូចជាអាផាតមិនមួយកន្លែងមានទំហំ ៣៦៧ម៉ែត្រការ៉េ និងដីទំហំ ៤៧០០ម៉ែត្រការ៉េផងដែរ។ បើសិនជារបាយការណ៍ផ្លូវការនេះជារបាយការណ៍ត្រឹមត្រូវនិងគួរឲ្យទុកចិត្តបានមែននោះ វាបញ្ជាក់ថាមេដឹកនាំរុស្ស៊ីមិនសូវមានទ្រព្យសម្បត្តិច្រើនឡើយ៕
Tag:
វ្ល៉ាឌីមៀ ពូទីន
ឌីមីទ្រី មេដវ៉េដេវ
រុស្ស៊ី
ក្រេមឡាំង
© រក្សាសិទ្ធិដោយ thmeythmey.com