អន្តរជាតិ
Le Pen សន្យាទាញបារាំងចេញពី «គុកអឺរ៉ុប» ស្របពេលការបោះឆ្នោតជិតមកដល់
18, Apr 2017 , 10:19 pm
រូបភាព៖ Reuters
×![]()
ខណៈដែលការបោះឆ្នោតប្រធានាធិបតីបារាំងនឹងមកដល់នៅថ្ងៃអាទិត្យសប្តាហ៍នេះ បរិយាកាសនយោបាយហាក់កាន់តែកើនកម្តៅដែរ ព្រោះបេក្ខជនម្នាក់ៗប្រឹងយកអឺរ៉ុបជាប្រធានបទឃោសនាស្វែងរកសន្លឹកឆ្នោតរៀងខ្លួន។ អ្នកនយោបាយស្តាំនិយម Marine Le Pen នៅបន្តវោហាសព្ទនយោបាយប្រឆាំងសហភាពអឺរ៉ុបនិងចរន្តសាកលភាវូបនីយកម្មដើម្បីឈានទៅឈ្នះឆ្នោត។ ប៉ុន្តែគូប្រជែងលោកស្រី Le Pen លោក Emanuel Macron នោះក៏បន្តផ្ញើសារនយោបាយទៅកាន់ប្រជាជនបារាំងដោយលោកបង្ហាញជំហរ គាំទ្របារាំជាផ្នែកមួយអឺរ៉ុបនិងប្តេជ្ញាធ្វើឲ្យសហភាពអឺរ៉ុបរីកលូតលាស់ទៅមុខផងដែរ។
បេក្ខជនប្រធានាធិបតីបារាំងនិងជាប្រធានបក្សស្តាំនិយមជ្រុលរណសិស្សជាតិលោកស្រី Marine Le Pen កំពុងព្យាយាមទាក់ទាញសំឡេងឆ្នោតដោយប្រើប្រាស់គោលនយោបាយប្រជាឧបាយដែលប្រឆាំងសហភាពអឺរ៉ុបនិងប្រឆាំងចរន្តសាកលភាវូបនីយកម្មផងដែរ។
ខណៈដែលបរិយាសកាសនយោបាយកាន់តែក្តៅស្រាប់ព្រោះការបោះឆ្នោតកាន់តែខិតជិតមកដល់នោះ លោកស្រី Marine Le Pen បានប្រកាសជាថ្មីថា បើសិនជាលោកស្រីជាប់ឆ្នោតលោកស្រីនឹងផ្តល់សេរីភាពឲ្យបារាំងវិញ ហើយបារាំងលែងក្លាយជាជនរងគ្រោះដោយសារជនអន្តោប្រវេសន៍និងជនភៀសខ្លួនទៀតដែរ។ លោកស្រីសន្យាផ្លាស់ប្តូរអនាគតបារាំងក្នុងនាមជាសមាជិកសហភាពអឺរ៉ុប, ជាភាគីនៃកិច្ចព្រមព្រៀងចរាចរណ៍សេរី Schengen និងស្ថិតក្នុងតំបន់អឺរ៉ូ។
«ខ្ញុំចង់ផ្តល់ឲ្យបារាំងនូវសិទ្ធិសេរីភាពឡើងវិញ ហើយខ្ញុំនឹងទាញបារាំងចេញពីគុកនៅពេលខ្ញុំជាប់ឆ្នោត»។នេះជាសម្តីរបស់លោកស្រី Le Pen នៅវេទិកាឃោសនាមួយនាថ្ងៃចន្ទទី ១៧មេសា នាក្រុងប៉ារីស។
លោកស្រីបន្តថា៖ «ខ្ញុំនឹងការពារអ្នក។ វិធានការដំបូងរបស់ខ្ញុំជាប្រធានាធិបតីគឺកំណត់ព្រំដែនបារាំងឡើងវិញ។ ពេលខ្លះប្រជាជនបារាំងមានសិទ្ធិតិចជាងជនបរទេស ឬជនអន្តោប្រវេសន៍ខុសច្បាប់ផង»។
ក្នុងពេលនោះលោកស្រីបានផ្តាំផ្ញើទៅប្រជាជនបារាំងផងដែរចំពោះការជ្រើសរើសមេដឹកនាំនៅពេលដ៏ខ្លីខាងមុខ ដោយលោកស្រីព្រលយពាក្យថា «វាមានជម្រើសតែពីរប៉ុណ្ណោះក្នុងនោះមានបារាំងដែលត្រដែតឡើងជាថ្មី ឬបារាំងដែលបន្តលិចបាត់»នោះ។
យ៉ាងណាមិញ ពេលដែលលោកស្រីឃោសនា គេឃើញមានចលនាបាតុកម្មប្រឆាំងលោកស្រីផងដែរ ដោយបាតុករទាំងនោះមើលឃើញលោកស្រីជាគ្រោះថ្នាក់ធំសម្រាប់បារាំងនាពេលអនាគត។ ប៉ុន្តែប៉ូលិសនិងកងកម្លាំងសន្តិសុខបានព្យាយាមទប់ស្កាត់និងបំបែកបាតុករផងដែរដោយសារពួកគេមានកាន់ដុំថ្ម, ដំបង និងគ្រាប់បែកផ្សេងថែមទៀត។
ដោយឡែក គូប្រជែងលោកស្រី Le Pen លោក Emanuel Macon ក៏បានបន្តឃោសនាស្វែងរកសំឡេងឆ្នោតផងដែរដោយលោកបន្តលើកឡើងពីគោលនយោបាយគាំទ្របារាំងជាសមាជិកសភាពអឺរ៉ុបនិងគាំទ្រចលនាសាកលភាវូបនីយកម្ម។លោក Macron ជាអ្នកនយោបាយតែម្នាក់ប៉ុណ្ណោះដែលអាចនឹងក្លាយជាគូប្រជែងធំរបស់លោកស្រី Le Pen ក្នុងការបោះឆ្នោតជុំទី២នាថ្ងៃ ៧ ឧសភា។ ហើយមានការវាយតម្លៃថា អតីតរដ្ឋមន្ត្រីសេដ្ឋកិច្ចនេះអាចនឹងឈ្នះឆ្នោតជាប្រធានាធិបតីបារាំងផងដែរ។
យោងតាមសារព័ត៌មាន RT នៅវេទិកាឃោសនានាថ្ងៃអាទិត្យ លោក Macron បានថ្លែងដូច្នេះថា៖« យើងត្រូវការអឺរ៉ុប។ ដូច្នេះយើងនឹងស្ថាបនាវាឡើងជាថ្មី។ ខ្ញុំនឹងក្លាយជាប្រធានាធិបតី ដែលបង្កើតឡើងវិញនូវមហិច្ឆតាអឺរ៉ុបដែលយើងធ្លាប់មាន»។
ថ្វីបើលោកមានលទ្ធភាពខ្ពស់ដើម្បីឈានទៅកានតំណែងប្រធានាធិបតីក៏ដោយ លោកនៅតែពិបាកអូសទាញអ្នកគាំទ្រលោកស្រី Marine Le Pen ណាស់។ អ្នកគាំទ្រលោកស្រី Le Pen និងជាអ្នកមាននិន្នាការប្រឆាំងអឺរ៉ុប ជឿជាក់ថា មានតែលោកស្រី Le Pen ប៉ុណ្ណោះទើបអាចនាំបារាំងទៅរកភាពប្រសើរឡើងដូចមុនវិញបាន។
យ៉ាងណាក៏ដោយ ស្របពេលដែលអឺរ៉ុបកាន់តែបារម្ភពីអនាគតបារាំង អាល្លឺម៉ង់បានឆ្លៀតលូកដៃក្នុងកិច្ចការផ្ទៃក្នុងអាល្លឺម៉ង់បន្តិចដោយអំពាវនាវឲ្យប្រជាជនបារាំងរើសមេដឹកនាំឲ្យបានត្រឹមត្រូវ។ ប្រធានាធិបតីអាល្លឺម៉ង់លោក Frank-Walter Steinmeier បានផ្ញើសារទៅប្រជាជនបារាំងដោយអំពាវនាវឲ្យពួកគេកុំស្តាប់រាល់សម្តីអ្នកនយោបាយដែលសន្យាបង្កើតអនាគតអស្ចារ្យសម្រាប់បារាំង ដោយទាញបារាំងចេញពីផ្នែកមួយនៃកម្លាំងចលករដែលជួយបង្កើតស្ថិរភាពសម្រាប់អឺរ៉ុបនិងជាសរសរស្តម្ភមួយនៃសហភាពអឺរ៉ុបនោះ។ គេដឹងច្បាស់ថា លោកចង់សំដៅដល់លោកស្រី Marine Le Pen នេះឯង៕
Tag:
Marine Le Pen
Emanuel Macron
ការបោះឆ្នោតប្រធានាធិបតីបារាំង
© រក្សាសិទ្ធិដោយ thmeythmey.com
