អន្តរជាតិ
យន្តហោះចម្បាំងអាមេរិកស្ទាក់យន្តហោះទម្លាក់គ្រាប់រុស្ស៊ីពីរគ្រឿងក្បែររដ្ឋអាឡាស្កា 19, Apr 2017 , 9:59 pm
× យន្តហោះចម្បាំងអាមេរិកបានតាមស្ទាក់យន្តហោះទម្លាក់គ្រាប់បែករុស្ស៊ីពីរគ្រឿងនៅក្បែរទឹកដីអាឡាស្កានៅដើមសប្តាហ៍នេះ។ វាជាការបញ្ជូនយន្តហោះទម្លាក់គ្រាប់បែករុស្ស៊ីលើកដំបូងបំផុតទៅក្បែរទឹកដីអាមេរិក ចាប់តាំងពី ប្រធានាធិបតី ដូណាល់ ត្រាំ ឡើងកាន់តំណែងនិងស្របពេលដែលភាពតានតឹងរវាងអាមេរិកនិងរុស្ស៊ីកើនឡើងផង។
យន្តហោះទម្លាក់គ្រាប់បែករុស្ស៊ីមានលទ្ធភាពដឹកអាវុធនុយក្លេអ៊ែរចំនួនពីរគ្រឿងត្រូវបានយន្តហោះចម្បាំងអាមេរិកស្ទាក់នៅក្បែរទឹកដីអាឡាស្កានៅយប់ថ្ងៃចន្ទកន្លងទៅនេះ។ វាជាពេលដែលយន្តហោះរុស្ស៊ីហើរទៅក្បែរទឹកដីអាមេរិកលើកដំបូង ចាប់ពីឆ្នាំ ២០១៥ មក។
យោងតាមសារព័ត៌មាន THE HILL យន្តហោះទម្លាក់គ្រាប់បែករុស្ស៊ីទាំងពីរគ្រឿងនេះមានម៉ាក TU-95 ហើយវាហោះហើយនៅចម្ងាយប្រហែល ៤៥០គីឡូម៉ែត្រពីមូលដ្ឋានទ័ពអាកាសអាមេរិក ELMENDORF តែស្ថិតក្នុងដែនកំណត់អត្តសញ្ញាណតំបន់ការពារអាកាសរបស់អាមេរិក។
ទ័ពអាកាសអាមេរិកបានបញ្ជូនយន្តហោះចម្បាំងបំបាំងកាយ F-22 ពីរគ្រឿងនិងយន្តហោះ E-3 ផ្តល់សញ្ញាព្រមានទៅចាំស្ទាក់យន្តហោះទម្លាក់គ្រាប់របស់រុស្ស៊ីទាំងពីរគ្រឿងនេះ។
បើតាមការផ្សាយរបស់សារព័ត៌មាន Fox News យន្តហោះអាមេរិកបានហោះទន្ទឹមជាមួយយន្តហោះទម្លាក់គ្រាប់បែករបស់រុស្ស៊ីប្រហែល ១២នាទី ទើបយន្តហោះទាំងពីរគ្រឿងនោះប្តូរទិសដៅហើយត្រឡប់ទៅកាន់មូលដ្ឋាននៅភាគខាងកើតរុស្ស៊ីវិញ។
ជារួមយន្តហោះទម្លាក់គ្រាប់បែករបស់រុស្ស៊ី TU-95 មានសមត្ថភាពដឹកអាវុធនុយក្លេអ៊ែរ ប៉ុន្តែពេលដែលពើបប្រទះជាមួយយន្តហោះចម្បាំងអាមេរិកនោះ យន្តហោះទាំងនមិនមានបំពាក់អាវុធឡើយ។ ម្យ៉ាងការស្ទាក់យន្តហោះបរទេសនេះធ្វើឡើងដោយសុវត្ថិភាពនិងតាមបច្ចេកទេស ហើយម្យ៉ាងយន្តហោះរុស្ស៊ីក៏មិនរំលោភដែនអាកាសអាមេរិកឬរំលោភច្បាប់អន្តរជាតិអ្វីដែរ។
យន្តហោះទម្លាក់គ្រាប់របស់រុស្ស៊ីហោះហើរទៅក្បែរដែនអាកាសអាមេរិក កើតឡើងស្របពេលដែលទំនាក់ទំនងរវាងអាមេរិកនិងរុស្ស៊ីធ្លាក់ចុះ និងតានតឹង។ តានតឹងខ្លាំងនេះ ក៏ដោយសារប្រធានាធិបតីអាមេរិកបានបញ្ជាឲ្យគេបាញ់មីស៊ីលស្រោចមូលដ្ឋានទ័ពអាកាសស៊ីរីនៅក្រុង HOMS ដោយមិនខ្វល់ការលទ្ធភាពនៃការប៉ះទង្គិចគ្នាជាមួយកងទ័ពរុស្ស៊ីនៅទីនោះឡើយ។
តាមពិតទៅ វត្តមានយន្តហោះទម្លាក់គ្រាប់បែករបស់រុស្ស៊ីនៅក្បែរដែនអាកាសអាមេរិកក៏កើតឡើងជាលើកដំបូងបំផុតក្រោយពេលដែលលោកដូណាល់ ត្រាំ ស្បថចូលកាន់តំណែងជាប្រធានាធិបតី។ យន្តហោះទម្លាក់គ្រាប់រុស្ស៊ីហោះទៅក្បែរ សហរដ្ឋអាមេរិកអាមេរិកចុងក្រោយបំផុតនៅខែកក្កដាឆ្នាំ ២០១៥ ហើយកាលនោះវាហោះទៅក្បែររដ្ឋកាលីហ្វ័រនីញ៉ា។ ប៉ុន្តែកាលនោះ ក្រោយមានការស្ទាក់យន្តហោះរុស្ស៊ី ប្រធានាធិបតីរុស្ស៊ីលោក វ្ល៉ាឌីមៀ ពូទីន ក៏បានផ្ញើសារជូនពរទៅលោក បារ៉ាក់ អូបាម៉ា ដើម្បីអបអរទិវាឯករាជ្យអាមេរិកថែមទៀតផង។
Tag:
TU-95
F-22
វ្ល៉ាឌីមៀ ពូទីន
ដូណាល់ ត្រាំ
© រក្សាសិទ្ធិដោយ thmeythmey.com