កីឡាអន្តរជាតិ
អន្តរជាតិ
ករណីពុករលួយ៖ សហព័ន្ធកីឡាបាល់ទាត់អាមេរិកឡាទីន បាត់លុយជាង១៤០លានដុល្លារ 27, Apr 2017 , 8:19 pm
លោក Gianni Infantino ប្រធាន FIFA នាពិធីសមាជរបស់សហព័ន្ធកីឡាបាល់ទាត់ប្រចាំតំបន់អាមេរិកឡាទីន
× សហព័ន្ធកីឡាបាល់ទាត់ប្រចាំតំបន់អាមេរិកខាងត្បូង (CONMEBOL) ប្រកាសថា សហព័ន្ធ បានបាត់បង់ប្រាក់ជាង១៤០លានដុល្លារអាមេរិកដែលកើតឡើងដោយសារអំពើពុករលួយ។
ប្រធានសហព័ន្ធកីឡាបាល់ទាត់ប្រចាំតំបន់អាមេរិកឡាទីនបាននិយាយនៅថ្ងៃទី២៦ មេសា ថា ស្ថាប័ននេះបានបាត់បង់ប្រាក់ច្រើនជាង១៤០លានដុល្លារអាមេរិកក្នុងអំពើពុករលួយក្រោមការដឹកនាំរបស់អតីតអ្នកគ្រប់គ្រងចាស់ ដែលត្រូវចោទប្រកាន់ដោយក្រុមស៊ើបអង្កេតអាមេរិក។
លោក Alejandro Dominguez ប្រធាន CONMEBOL នេះបានប្រាប់ទីភ្នាក់ងារព័ត៌មានAFPថា ចន្លោះពីឆ្នាំ២០១០ ដល់ឆ្នាំ២០១៤ សហព័ន្ធកីឡាបាល់ទាត់តំបន់អាមេរិកខាងត្បូង ត្រូវបានគេលួចបន្លំប្រាក់ច្រើនជាង១៤០លានដុល្លារអាមេរិក។ ចំនួនទឹកប្រាក់នេះត្រូវប្រកាសក្នុងសមាជរបស់សហព័ន្ធខាងលើ ក្រោយមានការពិនិត្យបញ្ជីចំណាយក្នុងស្ថាប័ននេះ។
លោក Alejandro Dominguez ប្រធានសហព័ន្ធកីឡាបាល់ទាត់តំបន់អាមេរិកខាងត្បូង CONMEBOL
ក្នុងករណីពុករលួយនេះ មានមនុស្ស៣នាក់ដែលស្ថិតក្នុងការចោទប្រកាន់ ដែលសុទ្ធិសឹងជាអតីតប្រធានសហព័ន្ធតំបន់ CONMEBOL នេះ។ នាក់ទាំង៣រូបនោះមាន លោក Eugenio Figueredo ជនជាតិអ៊ុយរូហ្គាយ លោក Nicolas Leoz និងលោក Juan Angel Napout ជាជនជាតិប៉ារ៉ាហ្គាយដូចគ្នា។
ក្នុងចំណោមអ្នកទាំង៣ខាងលើមានតែ២នាក់ទេគឺ Figueredo និង Leoz ដែលជាប់ពាក់ព័ន្ធនឹងអំពើពុករលួយនេះ និងរួមទាំមន្ត្រីក្រោមឱវាទ៤០នាក់ផ្សេងទៀតដែលកំពុងឃុំខ្លួននៅក្នុងផ្ទះរង់ចាំការស៊ើបអង្កេតជាបន្តទៀត។
សូមបញ្ជាក់ថា ចំនួនទឹកប្រាក់ដ៏ច្រើនសន្ធឹកសន្ធាប់ដែលបាត់បង់ក្នុងករណីពុករលួយនេះត្រូវបានបង្ហាញក្នុងពិធីសមាជរបស់សហព័ន្ធកីឡាបាល់ទាត់ប្រចាំតំបន់អាមេរិកឡាទីន ដែលធ្វើឡើងនៅថ្ងៃពុធ ទី២៦ ខែមេសា ក្នុងរដ្ឋធានី Santiago ប្រទេសស៊ីលីដោយមានការចូលរួមពីប្រធាន FIFA លោក Gianni Infantino ដែលទទួលតំណែងជំនួសលោក Sepp Blatter កន្លងមក៕
Tag:
បាល់ទាត់
CONMEBOL
FIFA
© រក្សាសិទ្ធិដោយ thmeythmey.com