អន្តរជាតិ
ដូណាល់ ត្រាំ មិនដកអាមេរិកចេញពីកិច្ចព្រមព្រៀងពាណិជ្ជកម្ម NAFTA ទេ តែត្រៀមចរចាឡើងវិញ 28, Apr 2017 , 9:39 am
× មន្ត្រីសេតវិមានអាមេរិកបានបញ្ជាក់ថាប្រធានាធិបតី ដូណាល់ ត្រាំ នឹងគ្រោងចរចាកិច្ចព្រមព្រៀងពាណិជ្ជកម្មសេរីអាមេរិកខាងជើង(NAFTA)ឡើងវិញជាមួយមេដឹកនាំកាណាដា និងម៉ិកស៊ិក។ ការបញ្ជាក់បែបនេះកើតឡើងបន្ទាប់ ពីមានព័ត៌មានថា លោក ដូណាល់ ត្រាំនិងទីប្រឹក្សាកំពុងពិចារណាចេញក្រឹត្យដកសមាជិកភាពចេញពីកិច្ចព្រមព្រៀងពាណិជ្ជកម្មនេះ តាមការសន្យាកន្លងមក។
ការបញ្ចប់សមាជិកភាពអាមេរិកក្នុងកិច្ចព្រមព្រៀងពាណិជ្ជកម្មសេរីអាមេរិកខាងជើងជាមួយកាណាដានិងម៉ិកស៊ិកក្លាយជាប្រធានបទក្តៅនៅពេលបច្ចុប្បន្ន។ ប៉ុន្តែមន្ត្រីសេតវិមានអាមេរិកបានបកស្រាយហើយថា អាមេរិកមិនលុបចោលកិច្ចព្រមព្រៀងពាណិជ្ជកម្មនេះឡើយ។ ផ្ទុយទៅវិញរដ្ឋបាលអាមេរិកស្ថិតក្រោមការដឹកនាំរបស់លោក ដូណាល់ ត្រាំ នឹងចរចាកិច្ចព្រមព្រៀងនេះឡើងវិញជាមួយមេដឹកមាំកាណាដា និងម៉ិកស៊ិក។
យោងតាមទីភ្នាក់ងារព័ត៌មាន Reuters សេចក្តីថ្លែងការណ៍សេតវិមានអាមេរិកបានប្រកាសថា ប្រធានាធិបតី ដូណាល់ ត្រាំ បានជជែកតាមទូរសព្ទជាមួយប្រធានាធិបតីម៉ិកស៊ិកលោក Enrique Pena Nieto និងនាយករដ្ឋមន្ត្រីកាណាដាលោគ Justin Trudeau ពាក់ព័ន្ធកិច្ចព្រមព្រៀងពាណិជ្ជកម្មសេរីនេះ។ បន្ទាប់ពីជជែកគ្នា លោក ត្រាំ បានសន្យាថា រដ្ឋាបាលមិនលុបចោលកិច្ចព្រមព្រៀងនេះ តែវាចាំបាច់ត្រូវមានការចរចាឡើងវិញ។
«ប្រធានាធិបតី ដូណាល់ ត្រាំសន្យាថាលោកមិនលុបចោលកិច្ចព្រមព្រៀងពាណិជ្ជកម្មសេរីអាមេរិកខាងត្បូងនៅពេលនេះឡើយ។ មេដឹកនាំប្រទេសជាសមាជិកទាំងបីក៏បានក៏បានឯកភាពគ្នាដើម្បីពន្លឿនការអនុវត្តនីតិវិធីផ្ទៃក្នុងដើម្បីធ្វើយ៉ាងណាអនុញ្ញាតឲ្យការចរចាឡើងវិញអាចធ្វើទៅបានដើម្បីបម្រើប្រយោជន៍ភាគីទាំងសងខាង»។ នេះជាការបញ្ជាក់របស់សេតវិមានក្នុងសេចក្តីថ្លែងការណ៍របស់ខ្លួន។
សេចក្តីថ្លែងការណ៍ដដែលនោះក៏បានស្រង់សម្តីប្រធានាធិបតី ដូណាល់ ត្រាំ ដូច្នេះថា៖«វាជាកិត្តិយសមួយសម្រាប់ខ្ញុំដែលត្រូវយកកិច្ចព្រមព្រៀងពាណិជ្ជកម្មសេរីអាមេរិកខាងជើងមកចរចាឡើងវិញ។ វាជាកិត្តិយសដែលខ្ញុំត្រូវជជែកពិភាក្សាជាមួយប្រធានាធិបតី ម៉ិកស៊ិក និងនាយករដ្ឋមន្ត្រីកាណាដា។ ហើយខ្ញុំជឿជាក់ថា លទ្ធផលចុងក្រោយនៃការចរចានឹងជួយឲ្យប្រទេសទាំងបីកាន់តែខ្លាំងនិងប្រសើរជាងមុនថែមទៀត»។
មកដល់ពេលនេះគឺមិនអាចសុំការបំភ្លឺពីខាងម៉ិកស៊ិកបានឡើយពាក់ព័ន្ធការចរចាកិច្ចព្រមព្រៀងឡើងវិញ។ ចំណែកកាណាដាបានបញ្ជាក់ថា ខ្លួនត្រៀមលក្ខណៈជាស្រេចដើម្បីជជែកគ្នាលើគម្រោងចរចាកិច្ចព្រមព្រៀងពាណិជ្ជកម្មឡើងវិញគ្រប់ពេលវេលា។
«នៅពេលនេះការចរចាពាក់ព័ន្ធកិច្ចព្រមព្រៀង NAFTA មិនទាន់ចាប់ផ្តើមឡើយ។ កាណាដាត្រៀមខ្លួនរួចហើយដើម្បីចូលតុចរចាគ្រប់ពេលវេលាទាំងអស់»។ នេះជាការបញ្ជាក់របស់លោក Alex Lawrence អ្នកនាំពាក្យរបស់រដ្ឋមន្ត្រីការបរទេស Chrystia Freeland។
ការប្រកាសជាថ្មីរបស់សេតវិមានកើតឡើងបន្ទាប់ពី មន្ត្រីអាមេរិកខ្លះលួចបង្ហើបថា លោក ដូណាល់ ត្រាំ និងបណ្តាក្រុមទីប្រឹក្សារបស់ខ្លួនពិចារណាចេញក្រឹត្យមួយដើម្បីបញ្ចប់បេក្ខភាពអាមេរិកក្នុងកិច្ចព្រមព្រៀងពាណិជ្ជកម្មដែលមានរយៈពេលជាង២០ឆ្នាំនេះ។ ទីប្រឹក្សាមួយចំនួនរបស់លោក ដូណាល់ ត្រាំចង់រៀបចំក្រឹត្យបញ្ចប់សមាជិកភាពអាមេរិកក្នុង NAFTA នេះឲ្យបានមុនខួប ១០០ថ្ងៃនៃការចូលកាន់តំណែងរបស់លោក ដូណាល់ ត្រាំ។ ប៉ុន្តែមានទីប្រឹក្សាខ្លះមិនពេញចិត្តចំពោះការសម្រេចបែបនេះឡើយ។
កាលពីពេលឃោសនាបោះឆ្នោតកន្លងមក លោក ដូណាល់ ត្រាំ បានគំរាមចរចាកិច្ចព្រមព្រៀងពាណិជ្ជកម្មធំៗឡើងវិញក្នុងនោះមានកិច្ចព្រមព្រៀងពាណិជ្ជកម្មសេរីអាមេរិកខាងកើត និងកិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) ថែមទៀតផង ដោយលោកបានអះអាងថា កិច្ចព្រមព្រៀងទាំងនេះបំផ្លាញការងារប្រជាជនអាមេរិក និងបង្កផលប៉ះពាល់សេដ្ឋកិច្ចអាមេរិកថែមទៀត។ ក្រោយឡើងកាន់តំណែងលោកចេញក្រឹត្យសម្រេចដកអាមេរិកចេញពីកិច្ចព្រមព្រៀងភាពជាដៃគូអន្តរប៉ាស៊ីហ្វិកដែលមានសមាជិកសរុប ១២ ភ្លាមៗតែម្តង៕
© រក្សាសិទ្ធិដោយ thmeythmey.com