អន្តរជាតិ
ពិភពលោកទាំងមូលរងផលប៉ះពាល់ពីគម្រោងផ្តាច់ជំនួយរបស់លោក ត្រាំ មិនមែនតែកម្ពុជាទេ 27, Apr 2017 , 9:59 pm
× សំណើកាត់បន្ថយថវិកាសម្រាប់វិស័យការទូតឆ្នាំ ២០១៨ របស់រដ្ឋបាលលោក ដូណាល់ ត្រាំ បានធ្វើឲ្យមានការបារម្ភទូទាំងពិភពលោក។ តាមរបាយការណ៍លម្អិតពាក់ព័ន្ធការកាត់បន្ថយលុយជំនួយបរទេសសម្រាប់ក្រសួងការបរទេសអាមេរិក ប្រទេសជាច្រើននៅអាស៊ី, អាហ្វ្រិក ក៏ដូចជាអឺរ៉ុបផងនោះនឹងប្រឈមការបាត់បង់ជំនួយអភិវឌ្ឍន៍ដែលអាមេរិកធ្លាប់ផ្តល់ឲ្យកន្លងមកដែរ។ គ្រាន់តែនៅតំបន់អាស៊ីអាគ្នេយ៍ ក្រៅពីកម្ពុជា ឡាវ,ឥណ្ឌូណេស៊ី, វៀតណាម និងសម្ព័ន្ធមិត្ត ថៃ និងហ្វីលីពីនក៏នឹងប្រឈមការបាត់បង់លុយជំនួយអាមេរិកដូចគ្នា។
នៅដើមខែមីនា ប្រធានាធិបតីអាមេរិក លោក ដូណាល់ ត្រាំ បានស្នើកាត់បន្ថយថវិកាជាង ២៨ភាគរយដែលមានទំហំស្មើនឹង ១១ពាន់លានដុល្លារអាមេរិកសម្រាប់ក្រសួងការបរទេសដែលក្នុងនោះមានទាំងថវិកាសម្រាប់ជំនួយអភិវឌ្ឍផងដែរ។ វាជាផ្នែកមួយនៃគោលនយោបាយ «តម្កល់ប្រយោជន៍អាមេរិកជាធំ»របស់ប្រធានាធិបតីផ្ទាល់ ប៉ុន្តែវាបង្កផលប៉ះពាល់ដល់ប្រទេសជាច្រើនទូទាំងពិភពលោក ពេលដែលបន្ថយថវិកាសម្រាប់ក្រសួងការបរទេសកាន់តែស្តួចស្តើង។
-ក្រៅពីកម្ពុជា ជំនួយអភិវឌ្ឍន៍សម្រាប់ឡាវ,ឥណ្ឌូណេស៊ី,ថៃ,ហ្វីលីពីន និងវៀតណាមក៏ធ្លាក់ដល់កម្រិតសូន្យដែរ
របាយការណ៍ពាក់ព័ន្ធថវិកាជាតិអាមេរិកឆ្នាំ២០១៨ ដែលទទួលបានដោយទស្សនាវដ្តីគោលនយោបាយការបរទេស (Foreign Policy Magazine) បង្ហាញថា ជំនួយសម្រាប់កម្ពុជាត្រូវបានកាត់បន្ថយអស់ ៧០,៥ភាគរយ ដោយធ្លាក់ចុះពី ៧៧,៤លានដល់ត្រឹម ២២,៩ លានដុល្លារប៉ុណ្ណោះ។ ក្នុងនោះមូលនិធិសម្រាប់ទ្រទ្រង់សេដ្ឋកិច្ចដែលមានទំហំ ៨លានដុល្លារ និងជំនួយអភិវឌ្ឍមានទំហំ ៣៤ លានដុល្លារត្រូវកាត់ទាំងស្រុង។
ប៉ុន្តែ វាគ្មានអ្វីដែលត្រូវភ្ងាក់ផ្អើលឡើយនៅពេល នៅពេលដែលជំនួយអភិវឌ្ឍសម្រាប់កម្ពុជាត្រូវកាត់បន្ថយបែបនេះ។ ដូចបានបញ្ជាក់ខាងលើស្រាប់ ការស្នើសុំកាត់បន្ថយថវិកាសម្រាប់វិស័យការទូតជាពិសេសជំនួយអភិវឌ្ឍនឹងប៉ះពាល់ប្រទេសទាំងអស់ទូទាំងពិភពលោក មិនមែនតែកម្ពុជាឡើយ។
របាយការណ៍ដដែលនោះបានបង្ហាញឲ្យឃើញថា អាមេរិកក៏មានគោលដៅកាត់បន្ថយជំនួយអភិវឌ្ឍប្រទេសផ្សេងទៀតក្នុងតំបន់អាស៊ានឲ្យដល់កម្រិតសូន្យដែរ។ ក្នុងចំណោមនោះមានឥណ្ឌូណេស៊ី, វៀតណាម, ឡាវ និងសម្ព័ន្ធមិត្តអាមេរិកមានថៃ និងហ្វីលីពីនផងដែរ។ បើសិនមានការសម្រេចជាផ្លូវការដោយសភាតាមសំណើររបស់ប្រធានាធិបតី ឥណ្ឌូណេស៊ីនឹងបាត់បង់លុយជំនួយអភិវឌ្ឍពីអាមេរិក ៥៧ លានដុល្លារ ខណៈដែលវៀតណាមបាត់បង់ ៤៥លានដុល្លារ។ ចំណែកឯឡាវឯណោះវិញអាចនឹងបាត់បង់ថវិកាជំនួយអាមេរិកប្រមាណ៧,២លានដុល្លារប៉ុណ្ណោះក្នុងនោះមានជំនួយអភិវឌ្ឍន៍ ៤,៥លានដុល្លារ និង ជំនួយក្នុងកម្មវិធីសុខភាពសកលក្រោមជំនួយ USAID ត្រឹម២,៧ លានដុល្លារប៉ុណ្ណោះ។
រីឯសម្ព័ន្ធមិត្តអាមេរិកថៃ ប្រឈមនឹងការបាត់បង់លុយជំនួយអភិវឌ្ឍន៍ប្រចាំឆ្នាំដែលមានទំហំ ២,៤លានដុល្លាអាមេរិក ស្របពេលដែលហ្វីលីពីន អាចនឹងបាត់បង់ជំនួយពីអាមេរិកក្នុងទំហំ ៦២លានដុល្លារឯណោះ។
យ៉ាងណាក៏ដោយ ក្រសួងការបរទេសអាមេរិកបានការពារការកាត់បន្ថយថវិកាសម្រាប់ក្រសួងខ្លួនកន្លងមកដែរ។ រដ្ឋមន្ត្រីការបរទេសអាមេរិកលោក Rex Tillerson បានលើកឡើងកាលពីខែមីនាថា ថវិកាដែលអាមេរិកប្រើប្រាស់ក្នុងវិស័យការបរទេសមានកម្រិតខ្ពស់បំផុតក្នុងប្រវត្តិសាស្ត្រ។ ដូច្នេះហើយ លោក Tillerson សង្ឃឹមថា វាជាការកែទម្រង់របៀបរបបនិងប្រសិទ្ធភាពការងារ ដោយចំណាយតិចតែមានប្រសិទ្ធភាពនិងប្រសិទ្ធផលខ្ពស់។
ត្រឡប់មកវិញ នេះគ្រាន់តែជាសំណើរបស់ប្រធានាធិបតី ដូណាល់ ត្រាំ ដើម្បីកាត់បន្ថយថវិកាជាតិដែលផ្គត់ផ្គង់ដល់ក្រសួងការបរទេសសម្រាប់ឆ្នាំ ២០១៨ ប៉ុណ្ណោះ។ សំណើនេះនឹងត្រូវសម្រេចដោយសភាទាំងពីរទៀត ហើយគេរំពឹងថាវានឹងមានការកែតម្រូវច្រើន មុននឹងច្បាប់ថវិកានេះត្រូវសភាសម្រេចជាផ្លូវការ។ នេះក៏ដោយសារបណ្តាសមាជិកសភាទាំងពីរបក្ស មិនពេញចិត្តនឹងសំណើកាត់បន្ថយថវិកាច្រើនបែបនេះសម្រាប់ជំនួយបរទេសនិងវិស័យការទូតដែលជួយពង្រឹងឥទ្ធិពលអាមេរិកនៅបរទេសឡើយ៕
Tag:
ដូណាល់ ត្រាំ
កម្ពុជា
អាស៊ាន
ក្រសួងការបរទេសអាមេរិក
© រក្សាសិទ្ធិដោយ thmeythmey.com