អន្តរជាតិ
ហ្វីលីពីន៖ «អាស៊ាននិងចិនត្រូវព្យាយាមរកដំណោះស្រាយឈ្នះៗលើជម្លោះសមុទ្រចិនដើម្បីរក្សាប្រយោជន៍រួម» 27, Apr 2017 , 10:39 pm
រូបភាព៖ Presidential Photographers Division
× មន្ត្រីហ្វីលីពីនយល់ថា អាស៊ាននិងចិនត្រូវការដំណោះស្រាយឈ្នះៗទាំងសងខាងក្នុងការដោះស្រាយបញ្ហាជម្លោះសមុទ្រដើម្បីប្រយោជន៍ពាណិជ្ជកម្មទ្វេភាគីនិងប្រយោជន៍តំបន់ទាំងមូល។ ការលើកឡើងនេះស្របពេលដែលហ្វីលីពីនកំពុងធ្វើជាប្រធានអាស៊ាននៅក្នុងឆ្នាំ ២០១៧នេះ ហើយរដ្ឋអាស៊ានសង្ឃឹមថាហ្វីលីពីន អាចនឹងជំរុញឲ្យមានការសម្រេចបាននូវក្រមប្រតិបត្តិសមុទ្រចិនខាងត្បូង (COC) ដែលមានអនុភាពគតិយុត្តិនៅក្នុងឆ្នាំនេះផង និងអាចលើកស្ទួយទំនាក់ទំនងទ្វេភាគីរវាងអាស៊ាននិងអាស៊ានដែរ។
ប្រធានក្រុមប្រឹក្សាផ្តល់យោបល់ធុរៈកិច្ច Joey Concepcion បានថ្លែងប្រាប់យោងតាមសារព័ត៌មានហ្វីលីពីន ABS-CBN ការសម្រេចចិត្តរបស់ប្រធានាធិបតីហ្វីលីពីន Rodrigo Duterte ដើម្បីស្តារទំនាក់ទំនងទ្វេភាគីជាមួយមហាយក្សចិនជាជំហានវិជ្ជមានមួយ ព្រោះហ្វីលីពីនគ្មានលទ្ធភាពទប់ទល់ជាមួយចិនឡើយនិយាយដល់ការប្រើប្រាស់កម្លាំងយោធានោះ។
លោក Joey Concepcion បានពន្យល់ថា យកខ្លួនទៅប្រឆាំងចិនរឿងជម្លោះសមុទ្រចិនខាងត្បូងមិនខុសពីធ្វើអត្តឃាតខ្លួនឯងឡើយ។ ប៉ុន្តែបើគេអាចសម្រេចបាននូវដំណោះស្រាយឈ្នះៗមួយនោះ វានឹងបង្កើតផលប្រយោជន៍ច្រើនសម្រាប់ភាគីទាំងសងខាង។
«យើងទាំងអស់គ្នាដឹងថា ចិនជាប្រទេសដ៏ខ្លាំងមួយ ហើយវាជាប្រយោជន៍របស់យើងដែលត្រូវស្វែងរកដំណោះស្រាយឈ្នះៗទាំងសងខាងដើម្បីដោះស្រាយបញ្ហាដែលកំពុងកើតឡើងបច្ចុប្បន្ន។ ទំនាក់ទំនងរវាងអាស៊ាននិងចិនមានសារៈសំខាន់សម្រាប់ភាគីទាំងពីរ ហើយវាជារឿងចាំបាច់បំផុតដែលត្រូវប្រឹងប្រែងធ្វើយ៉ាងណាសម្រេចឲ្យបាននូវទំនាក់ទំនងឈ្នះឈ្នះ»។ នេះជាការបញ្ជាក់របស់លោក Joey Concepcion ។
មន្ត្រីរូបនេះបានបន្ថែមថា៖«យើងគ្មានកម្លាំងយោធាឯណាដើម្បីប្រឆាំងប្រទេសធំៗឡើយ។ វាប្រៀបដូចជាការធ្វើអត្តឃាតឡើយ។ ប៉ុន្តែយើងមានអំណាចដើម្បីអភិវឌ្ឍទំនាក់ទំនងជាមួយប្រទេសជិតខាងព្រោះប្រជាជនហ្វីលីពីនជាពេលរដ្ឋដែលរស់រាយរាក់ទាក់និងមានសណ្តានចិត្តល្អ»។
បច្ចុប្បន្ននេះ ហ្វីលីពីនកំពុងធ្វើជាប្រធានអាស៊ានប្តូរវេន ហើយកិច្ចប្រជុំកំពូលអាស៊ានលើកទី៣០នឹងត្រូវរៀបចំឡើងនៅថ្ងៃ ២៩មេសាខាងមុខនេះ។ បញ្ហាជម្លោះសមុទ្រចិនខាងត្បូងនៅតែជាបញ្ហាចម្រូងចម្រាសសម្រាប់តំបន់ទាំងមូលផងដែរ ហើយវាក៏នឹងក្លាយជាប្រធានបទសំខាន់ក្នុងកិច្ចប្រជុំកំពូលអាស៊ានប៉ុន្មានថ្ងៃខាងមុខដូចគ្នា។ ប្រទេសអាស៊ានជាពិសេសភាគីជម្លោះសមុទ្រចិនខាងត្បូងចង់ឲ្យក្រមប្រតិបត្តិសមុទ្រចិនខាងត្បូងដែលមានអនុភាពគតិយុត្តិចេញរូបរាងជាផ្លូវការនៅក្នុងឆ្នាំ ២០១៧ ក្នុងពេលហ្វីលីពីនទទួលបន្ទុករៀបចំកិច្ចប្រជុំនេះតែម្តង។
សូមរម្លឹកបន្តិចថា ប្រទេសសមាជិកអាស៊ានដូចជាម៉ាឡេស៊ី, ព្រុយណេ, វៀតណាម និងហ្វីលីពីនជាភាគីជម្លោះសមុទ្រចិនខាងត្បូង។ ប៉ុន្តែស្ថានភាពជម្លោះហាក់តានតឹង ដោយសារតែមហាយក្សចិនបន្តសកម្មភាពវាតទី និងធ្វើយោធូបនីយកម្មនៅក្នុងតំបន់ជម្លោះ និងបានទាត់ចោលសេចក្តីសម្រេចរបស់តុលាការមជ្ឈត្តការអន្តរជាតិដែលបដិសេធការទាមទាររបស់ចិនលើតំបន់ជម្លោះស្ទើតែទាំងស្រុងថែមទៀតផង។
យ៉ាងណាក៏ដោយ ចាប់ពីពេលឡើងកាន់អំណាចពាក់កណ្តាលឆ្នាំ ២០១៦ ប្រធានាធិបតីហ្វីលីពីនលោក Rodrigo Duterte បានផ្លាស់ប្តូរនយោបាយការបរទេសហ្វីលីពីន១៨០ដឺក្រេដោយលោកងាកទៅស្តារទំនាក់ទំនងជាមួយក្រុងប៉េកាំងឡើងវិញ និងប្រកាសថាលោកអនុវត្តគោលនយោបាយការបរទេសដែលមានភាពឯករាជនិងអាព្យាក្រឹត្យថែមទៀតផង៕
Tag:
Rodrigo Duterte
Joey Concepcion
អាស៊ាន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com