អន្តរជាតិ
ប្រធានអាស៊ាន Duterte ៖«សាលក្រមសមុទ្រចិនខាងត្បូងឲ្យចិនចាញ់ក្តី មិនមែនរឿងអាស៊ានទេ» 28, Apr 2017 , 8:39 pm
រូបភាព៖ Presidential Communications Office
× ហ្វីលីពីនមិនដាក់ចំណុចទាក់ទិនសេចក្តីសម្រេចតុលាការមជ្ឈត្តការអន្តរជាតិ (PCA) លើសមុទ្រចិនខាងត្បូងដែលប្រកាសឲ្យហ្វីលីពីនឈ្នះក្តីចិនក្នុងកិច្ចពិភាក្សានាកិច្ចប្រជុំកំពូលអាស៊ានលើកទី ៣០ឡើយ។ លោកថា សេចក្តីសម្រេចនេះមិនមែនជារឿងរបស់អាស៊ានឡើយ ហើយលោកយល់ថា វាមិនខុសពីការបង្កើតបញ្ហាធំសម្រាប់ហ្វីលីពីនផងនិងអាស៊ាន បើនៅបន្តបង្ខំមហាអំណាចចិនឲ្យគោរពសេចក្តីសម្រេចតុលាការរបៀបនេះ។
«យើងនឹងមិនដាក់សេចក្តីសម្រេចរបស់តុលាការមជ្ឈត្តការក្នុងកិច្ចពិភាក្សាឡើយ។ វាមិនមែនជាបញ្ហាក្នុងអាស៊ានឡើយ»។ នេះជាសម្តីរបស់ប្រធានាធិបតីហ្វីលីពីនលោក Rodrigo Duterte ដែលប្រកាសពេញមាត់ពាក់ព័ន្ធកិច្ចប្រជុំកំពូលអាស៊ានលើកទី៣០ ក្នុងសន្និសីទសារព័ត៌មាននាថ្ងៃព្រហស្បតិ៍ទី ២៧មេសា។
យោងតាមសារព័ត៌មានហ្វីលីពីន Rappler ប្រធានាធិបតីហ្វីលីពីន Rodrigo Duterte បានពន្យល់ថា ថ្វីបើជម្លោះសមុទ្រចិនខាងត្បូងមានពាក់ព័ន្ធរដ្ឋអាស៊ានបួនក៏ដោយ វាមិនមែនជារឿងដែលគួរយកមកឡូកឡំជាមួយអាស៊ានទាំងមូលឡើយ។ ប្រមុខរដ្ឋហ្វីលីពីនដែលប្រឹងស្តារចំណងមិត្តភាពជាមួយចិននេះបានសង្កត់ធ្ងន់ថា សេចក្តីសម្រេចរបស់តុលាការអន្តរជាតិនឹងត្រូវយកទៅជជែកជាមួយចិនជាលក្ខណៈទ្វេភាគីនៅពេលណាមួយខាងមុខវិញ។
«សេចក្តីសម្រេចរបស់តុលាការមជ្ឈត្តការអន្តរជាតិ វាជារឿងរវាងចិននិងហ្វីលីពីន។ ដូច្នេះយើងមិនដាក់វាក្នុងកិច្ចពិភាក្សាឡើយ។យើងមិនជជែកពីអធិបតេយ្យនៃកោះក្នុងដែនជម្លោះឡើយព្រោះថា វាមិនមែនជាបញ្ហានៃកិច្ចប្រជុំកំពូលអាស៊ាននោះឡើយ»។
ក្នុងនាមជាប្រធានអាស៊ានប្តូរវេនឆ្នាំ ២០១៥ នេះ លោក Duterte មានសិទ្ធិអំណាចក្នុងការសម្រេចិត្តពាក់ព័ន្ធការចេញសេចក្តីថ្លែងការណ៍ប្រធានអាស៊ាន និងឯកសារសំខាន់ៗ ផ្សេងទៀត។ ហើយយោងតាមសារព័ត៌មានហ្វីលីពីន Rappler ដែលបានឃើញសេចក្តីព្រាងសេចក្តីថ្លែងការណ៍អាស៊ានផ្ទាល់ វាគ្មានឡើយការលើកឡើងពីសាលក្រមតុលាការនៅក្នុងសេចក្តីថ្លែងការណ៍អាស៊ាន។
ត្រឡប់មកវិញ លោក Duterte បានព្យាយាមបកស្រាយប្រាប់គ្រប់គ្នាឲ្យអស់មន្ទិលសង្ស័យជុំវិញការសម្រេចចិត្តរបស់លោកមិនដាក់សេចក្តីសម្រេចរបស់តុលាការក្នុងកិច្ចពិភាក្សានៃវេទិកាអាស៊ាន។ លោកប្រកាសថា គ្មានការលូកលាន់ពីចិន ឬមានអ្នកណាម្នាក់ប្រាប់លោកឲ្យធ្វើអ្វីឬត្រូវនិយាយអ្វីឡើយ។ ប៉ុន្តែគ្រប់យ៉ាងដែលលោកធ្វើគឺលោកមើលឃើញពីគ្រោះថ្នាក់ដែលអាចកើតមានឡើងនៅពេលដែលមានការប្រឈមមុខដាក់គ្នារវាងចិននិងហ្វីលីពីនឬអាស៊ាន។
មេដឹកនាំហ្វីលីពីនរូបនេះពន្យល់បន្ថែមថា បើប្រៀបធៀបជាមួយហ្វីលីពីន ចិនជាយក្សទាំងសេដ្ឋកិច្ចនិងយោធា។ហ្វីលីពីនគ្មានលទ្ធភាពឯណាទៅតតាំង ឬបង្ខំឲ្យចិនគោរពតាមសេចក្តីសម្រេចរបស់តុលាការនៅពេលដែលចិនថាខ្លួនមិនគោរពនោះឡើយ។ លោកចោទសួរថា «បើបង្ខំចិនឲ្យគោរពសេចក្តីសម្រេចតុលាការតើ អាស៊ានត្រៀមខ្លួនកម្រិតណាដើម្បីប្រឈមនិងដោះស្រាយបញ្ហា?»
សូមបញ្ជាក់ថា ក្រោយពេលប្រធានាធិបតី Rodrigo Duterte ឡើងកាន់តំណែង រដ្ឋាភិបាលក្រុងម៉ានីលផ្លាស់ប្តូរជំហររបស់ខ្លួន ១៨០ដឺក្រេពាក់ព័ន្ធគោលជំហររបស់ខ្លួនក្នុងបញ្ហាជម្លោះសមុទ្រចិនខាងត្បូង។ ហ្វីលីពីនប្រឹងស្តារទំនាក់ទំនងជាមួយក្រុងប៉េកាំងវិញនិងប្រកាសថាខ្លួនចង់ចរចាទ្វេភាគីជាមួយចិនលើបញ្ហាជម្លោះនេះ។ Duterte បានអះអាងថា គោលនយោបាយការបរទេសរបស់លោកមិនមែនអែបអបចិនឲ្យខាតប្រយោជន៍ទេ តែជាគោលនយោបាយឯករាជ្យនិងអព្យាក្រឹត្រមិនរណបមហាអំណាចថែមទៀត៕
Tag:
អាស៊ាន
Rodrigo Duterte
PCA
សមុទ្រចិនខាងត្បូង
© រក្សាសិទ្ធិដោយ thmeythmey.com