អន្តរជាតិ
អគ្គលេខាធិការអាស៊ាន៖ អាស៊ាននឹងពិភាក្សាបញ្ហាឧបទ្វីបកូរ៉េ ហើយចង់ឃើញកិច្ចចរចា ៦ ភាគីចាប់ផ្តើមវិញ 28, Apr 2017 , 10:39 pm
អាស៊ាន, Le Luong Minh, បញ្ហាឧបទ្វីបកូរ៉េ, Six-Party Talks
× ស្របពេលដែលមានក្តីបារម្ភពាក់ព័ន្ធបញ្ហាឧបទ្វីបកូរ៉េ អគ្គលេខាធិការអាស៊ានលោក Le Luong Minh បានបញ្ជាក់ថា គោលជំហររបស់អាស៊ានមិនប្រែប្រួលនិងនៅតែច្បាស់លាស់ដោយអំពាវនាវឲ្យភាគីពាក់ព័ន្ធត្រឡប់ចូលតុចរចាដែលមានស្រាប់, បន្ថយភាពតានតឹងនិងញ្ចៀសសង្គ្រាម។ អគ្គលេខាធិការអាស៊ានលើកឡើងនេះ ស្របពេលដែលកូរ៉េខាងជើងស្វះស្វែងរកការគាំទ្រពីរដ្ឋអាស៊ានដើម្បីដោះស្រាយបញ្ហាជាមួយអាមេរិផងដែរ។
ក្នុងបទសម្ភាសផ្តាច់មុខជាមួយសារព័ត៌មាន Channel News Asiaនាថ្ងៃ ២៨ មេសា អគ្គលេខាធិការអាស៊ានលោក Le Luong Minh បានលើកឡើងថា គោលជំហររបស់អាស៊ាននៅតែច្បាស់លាស់និងមិនប្រែប្រួល។ គោលជំហររបស់អាស៊ានក្នុងនាមជាអង្គការតំបន់ដ៏មានឥទ្ធិពលនិងទឹកមាត់ប្រៃ មានដូចជាការអំពាវនាវឲ្យភាគីទាំងអស់ធ្វើយ៉ាងណាបន្ធូរបន្ថយកម្តៅនិងការប្រឈមមុខដាក់គ្នា, ការរំសាយអាវុធនុយក្លេអ៊ែរ និងជ្រោមជ្រែងការឈានទៅចាប់ផ្តើមកិច្ចចរចាប្រាំមួយភាគី (Six-Party Talks) ឡើងវិញ។
សូមបញ្ជាក់បន្តិចថា កិច្ចចរចាប្រាំមួយភាគីនេះមានប្រទេសចូលរួមដូចជាកូរ៉េខាងជើង, កូរ៉េខាងត្បូង, ចិន, អាមេរិក, ជប៉ុន និងរុស្ស៊ី។ វាត្រូវបានបង្កើតឡើងនៅក្នុងឆ្នាំ ២០០៣ ដើម្បីត្រួសត្រាយផ្លូវឲ្យភាគីទាំងអស់ជជែកពិក្សានិងចរចាគ្នាលើបញ្ហានុយក្លេអ៊ែរកូរ៉េខាងជើង។ ប៉ុន្តែជាអកុសលកិច្ចពិភាក្សានេះរលំរលាយនៅឆ្នាំ ២០០៨ ក្រោយពេលដែលក្រុងព្យុងយ៉ាងសម្រេចបាញ់មីស៊ីលផ្គើនសហគមន៍អន្តរជាតិ។
ត្រឡប់មកវិញ មុនផ្តល់បទសម្ភាសឲ្យសារព័ត៌មានសិង្ហបុរីនេះ អគ្គលេខាធិការអាស៊ានខាងលើបានទទួលសំបុត្រដ៏កម្រមួយរួចហើយពីកូរ៉េខាងជើងពាក់ព័ន្ធស្ថានការណ៍កូរ៉េខាងជើងនិងស្ថានភាពប្រឈមមុខគ្នាជាមួយអាមេរិក ។ ប្រមុខការទូតកូរ៉េខាងជើងលោក Ri Yong-ho បានទទូចឲ្យអគ្គលេខាធិការអាស៊ាន ជួយផ្សព្វផ្សាយព័ត៌មាននៃស្ថានការណ៍គ្រោះថ្នាក់នៅឧបទ្វីបកូរ៉េ និងលើកជាសំណើសមស្របសម្រាប់ដោះស្រាយបញ្ហានេះដែរ។ ឆ្លៀតពេលនោះ កូរ៉េខាងជើង ក៏មិនភ្លេចរិះគន់សមយុទ្ធប្រចាំឆ្នាំរួមគ្នារវាងអាមេរិក និងកូរ៉េខាងត្បូង ដែលជាមូលហេតុដ៏សំខាន់នាំឲ្យកូរ៉េខាងជើងប្រឹងប្រែងអភិវឌ្ឍកម្មវិធីនុយក្លេអ៊ែរ ទុកការពារខ្លួននោះ។
ទាក់ទិនស្ថានភាពដ៏គ្រោះថ្នាក់នៅឧបទ្វីបកូរ៉េនេះ អគ្គលេខាធិការអាស៊ានខាងលើបានបញ្ជាក់ប្រាប់ផងដែរថា វេទិកាមេដឹកនាំអាស៊ានលើកទី៣០ នៅថ្ងៃសៅរ៍ស្អែកនឹងមានជជែកពិភាក្សាគ្នាពីបញ្ហាសន្តិសុខនិងបញ្ហាអន្តរជាតិផ្សេងទៀតផងដែរ។ ក្នុងចំណោមបញ្ហាទាំងនោះមានភាពតានតឹងនៅឧបទ្វីបកូរ៉េផងដែរ។ កិច្ចប្រជុំកំពូលអាស៊ានលើកទី៣០ ត្រូវរៀបចំឡើងនៅក្រុងម៉ានីលប្រទេសហ្វីលីពីន មុនវេទិកាតំបន់អាស៊ាន (ARF) ដែលកូរ៉េខាងជើងចូលរួមដែរនោះ ចាប់ផ្តើមនៅខែសីហាខាងមុខ៕
Tag:
អាស៊ាន
Le Luong Minh
បញ្ហាឧបទ្វីបកូរ៉េ
Six-Party Talks
© រក្សាសិទ្ធិដោយ thmeythmey.com