អន្តរជាតិ
Michelle៖«ខ្ញុំមិនឈរឈ្មោះជាប្រធានាធិបតីឡើយ ត្រឹមជាពលរដ្ឋសាមញ្ញក៏ជួយសង្គមបានដែរ» 29, Apr 2017 , 9:39 pm
× អតីតស្ត្រីទីមួយលោកស្រី Michel Obama បានប្រកាសជាថ្មីថា លោកស្រីមិនធ្លាប់គិត និងមិនឈរឈ្មោះសម្រាប់ប្រកួតយកតំណែងនយោបាយពោលគឺជាប្រធានាធិបតីអាមេរិកឡើយ។ លោកស្រីបានលើកឡើងដូច្នេះស្របពេលដែលមានការអំពាវនាវនិងស្នើសុំពីសំណាក់ប្រជាជនអាមេរិកឲ្យលោកស្រីឈរឈ្មោះដណ្តើមតំណែងនយោបាយនៅពេលខាងមុខ។
ក្នុងពេលថ្លែងសុន្ទរកថា ទៅកាន់និស្សិតនៃវិទ្យាស្ថានស្ថាបត្យកម្មនៅ Orlando ជាលើកដំបូងក្រោយចេញពីសេតវិមាន លោកស្រី Michelle Obama ដែលជាអតីតស្ត្រីទីមួយរបស់អាមេរិកដ៏ល្បីល្បាញបានប្រកាសជាសាធារណៈជាថ្មីថា លោកស្រីមិនឈរឈ្មោះដើម្បីប្រជែងយកតំណែងប្រធានាធិបតីឡើយ។
យោងតាមសារព័ត៌មាន The Hill លោកស្រី Michelle បានបញ្ជាក់ថា លោកស្រីមិនធ្លាប់គិតហើយក៏មិនចង់ឈរឈ្មោះដើម្បីដណ្តើមតំណែងនយោបាយនៅពេលណាមួយខាងមុខនោះឡើយ។ ផ្ទុយទៅវិញលោកស្រី ចង់ជួយប្រទេសជាតិក្នុងនាមជាប្រជាជនសាមញ្ញធម្មតា ជាជាងធ្វើជាមន្ត្រីកំពូលរដ្ឋ។ ហើយលោកស្រីក៏មិនអនុញ្ញាតឲ្យកូនលោកស្រីចូលប្រឡូកក្នុងវិស័យនយោបាយដូចស្មារមីលោកស្រីដូចគ្នា។
ក្នុងនាមជាអតីតស្ត្រីទីមួយ លោកស្រីចង់បន្តជួយជ្រោមជ្រែងក្មេងស្រីៗនិងស្ត្រីដែលកំពុងប្រឈមបញ្ហារឿងទទួលការអប់រំ, បញ្ហាសុខុមាលភាព, ជួបប្រទះហិង្សា និងវិសមភាពចំណូលជាដើមផងដែរ។
យ៉ាងណាមិញលោកស្រីបានអះអាងផងដែរថា ការចាកចេញពីសេតវិមានកន្លងមកជារឿងដែលពិបាកបំផុតសម្រាប់គ្រួសារព្រោះលោកស្រីនិងក្រុមគ្រួសារបានរស់នៅទីនោះយូរអង្វែងមកហើយដែរ ហើយអ្វីដែលសំខាន់កូនស្រីទាំងពីររបស់លោកស្រីបានលូតលាស់ធំធាតនៅទីនោះស្រាប់។ ប៉ុន្តែវាជាកាតព្វកិច្ច ហើយវាជាពេលដែលមេដឹកនាំថ្មីត្រូវចូលមកដឹកនាំប្រទេសជំនួយស្វាមីលោកស្រីហើយ។
លោកស្រីបានបញ្ជាក់ថា៖«វាជារឿងល្អមួយដែលយើងអាចចេញពីសេតវិមាន។ វាមិនមានរយៈពេលយូរឡើយចាប់ពីពេលដែលយើងចាកចេញពីសេតវិមាន។ វាជារឿងល្អមួយដែលស្មាររបស់យើងមិនមានបន្ទុកធ្ងន់រឿងដោះស្រាយបញ្ហាពិភពលោក»។
តាំងពីចាកចេញពីសេតវិមាននៅចុងខែមករា លោកបារ៉ាក់ អូបាម៉ា និងលោកស្រីមិនសូវលេចមុខមាត់ច្រើនឡើយ។ ក្រុមគ្រួសារវណ្ណៈទីមួយនេះបានចំណាយពេលវេលាយ៉ាងច្រើនលំហែរកាយក្នុងនាមជាប្រជាជនសាមញ្ញ ហើយទើបតែដល់សបា្តហ៍នេះទេដែលលោកស្រី Michelle និងលោក អូបាម៉ា ចេញមុខផ្តល់សុន្ទរកថាជាសាធារណៈនិងនិយាយពាក់ព័ន្ធបញ្ហានយោបាយមួយចំនួនផង៕
© រក្សាសិទ្ធិដោយ thmeythmey.com