អន្តរជាតិ
ដូណាល់ ត្រាំ ត្រៀមធ្វើជាតួឯកជួយដោះស្រាយជម្លោះអ៊ីស្រាអែលនិងប៉ាឡេស្ទីន? 04, May 2017 , 10:39 pm
× ប្រធានាធិបតី ដូណាល់ ត្រាំ សន្យាជាមួយប្រធានាធិបតីប៉ាឡេស្ទីនថារដ្ឋបាលលោកនឹងប្រឹងធ្វើគ្រប់យ៉ាងដើម្បីជួយសម្របសម្រួលនិងជ្រោមជ្រែងអ៊ីស្រាអែលនិងប៉ាឡេស្ទីនដើម្បីស្វែងរកសន្តិភាពពិតប្រាកដមួយ។លោកបានព្រលយពាក្យថា ការដោះស្រាយបញ្ហាជម្លោះមជ្ឈិមបូព៌ាមិនលំបាកដូចគ្រប់គ្នាធ្លាប់គិតឡើយ ហើយលោករំពឹងមុតមាំថា ដំណោះស្រាយនិងសន្តិភាពនឹង ចេញរូបរាងឡើងនៅពេលខាងមុខ។ មេដឹកនាំប៉ាឡេស្ទីន ក៏បង្ហាញក្តីសង្ឃឹមខ្ពស់ផងដែរចំពោះការសន្យារបស់ប្រធានាធិបតីអាមេរិករូបនេះ។ ប៉ុន្តែ ដូណាល់ ត្រាំ មានសុទិដ្ឋនិយមខ្ពស់ពេក ហើយដូចជាមើលស្រាលភាពស្មុគស្មាញពីធម្មជាតិនៃជម្លោះមជ្ឈិមបូព៌ាដែរ។
ថ្ងៃពុធទី ៣ឧសភា ប្រធានាធិបតីអាមេរិក ដូណាល់ ត្រាំ ឈរទន្ទឹមជាមួយប្រធានាធិបតីប៉ាឡេស្ទីនលោក Mahmoud Abbas ក្នុងសន្និសីទសារព័ត៌មានមួយនៅក្នុងសេតវិមានក្រោយជំនួបពិភាក្សាទ្វេភាគី។ ការស្វែងរកសន្តិភាពសម្រាប់ប៉ាឡេស្ទីននិងអ៊ីស្រាអែលជាប្រធានបទស្នូលនៃកិច្ចពិភាក្សាទ្វាភាគី ហើយអ្វីដែលវិជ្ជមានប្រធានាធិបតីអាមេរិកបានប្រកាសថា លោកនឹងប្រឹងប្រែងឲ្យអស់ពីសមត្ថភាពដើម្បីធ្វើឲ្យកិច្ចចរចាសន្តិភាពប៉ាឡេស្ទីន និងអ៊ីស្រាអែលរស់ឡើងវិញ និងបង្កើតកិច្ចព្រមព្រៀងសន្តិភាពយូរអង្វែងមួយផងដែរ។
«យើងចង់បង្កើតសន្តិភាពរវាងអ៊ីស្រាអែលនិងប៉ាឡេស្ទីន។ យើងនឹងសម្រេចវាឲ្យបាន។ យើងនឹងប្រឹងប្រែងបំផុតដើម្បីសម្រេចវា ហើយខ្ញុំគិតថាវាជាឱកាសល្អមួយ ហើយខ្ញុំគិតថាយើងអាចធ្វើបាន»។ នេះជាសម្តីរបស់លោក ដូណាល់ ត្រាំ ថ្លែងប្រាប់អ្នកសារព័ត៌មាននិងមេដឹកនាំជើងចាស់ប៉ាឡេស្ទីនវ័យ ៨២ ឆ្នាំដែលឈរទន្ទឹមគ្នាជាមួយលោកនោះ។
គោលនយោបាយការបរទេសអាទិភាពរបស់ប្រធានាធិបតីដូណាល់ ត្រាំ គឺជួយស្វែងរកសន្តិភាពឲ្យតំបន់មជ្ឈិបូព៌ា ហើយលោកយកចិត្តទុកដាក់ខ្លាំងលើការប្រឆាំងភេរវកម្មនៅតំបន់នេះផងដែរ។ ប៉ុន្តែ ដូណាល់ ត្រាំ មិនមែនជាប្រធានាធិបតីទីមួយទេដែលតាំងខ្លួនជាអ្នកបង្កើតសន្តិភាពនៅមជ្ឈិមបូព៌ានិងជាអ្នកផ្សះផ្សាជម្លោះប៉ាឡេស្ទីននិងអ៊ីស្រាអែល។
សូម្បីតែបារ៉ាក់ អូបាម៉ា ពេលឡើងកាន់តំណែងដំបូងក៏តាំងចិត្តសម្រេចឲ្យបាននូវសន្តិភាពរវាងប៉ាឡេស្ទីននិងអ៊ីស្រាអែលផងដែរ ដោយលោកកំណត់យកការបង្កើតដំណោះស្រាយរដ្ឋពីរ «Two-State Solution» ជាគោល។ ប៉ុន្តែចុងក្រោយ ការចរចាសន្តិភាពរវាងប៉ាឡេស្ទីននិងអ៊ីស្រាអែលនៅតែជាប់គាំងទៅមុខមិនរួច ហើយបង្កើតរដ្ឋពីរដែលមានអ៊ីស្រាអែលនិងប៉ាឡេស្ទីនលើបន្ទាត់ព្រំដែនឆ្នាំ ១៩៦៧ ក៏នៅត្រឹមតែជាសុបិនរហូតមក។
ទោះជាបែបណាក៏ដោយ ប្រធានាធិបតីប៉ាឡេស្ទីនវ័យ ៨២ឆ្នាំលោក Mahmoud Abbas បានស្វាគមន៍ចំពោះការប្តេជ្ញាចិត្តបង្កើតសន្តិភាពសម្រាប់ប៉ាឡេស្ទីននិងអ៊ីស្រាអែលរបស់ប្រធានាធិបតីអាមេរិកដូណាល់ ត្រាំ។ លោកសង្ឃឹមថា កិច្ចព្រមព្រៀងសនិ្តភាពជាប្រវត្តិសាស្ត្ររវាងប៉ាឡេស្ទីន និងអ៊ីស្រាអែលនឹងចេញរូបរាងឡើងក្នុងអាណត្តិរបស់លោក ដូណាល់ ត្រាំថែមទៀត។
ប៉ុន្តែក្នុងសន្និសីទសារព័ត៌មានជាមួយប្រធានាធិបតី ដូណាល់ ត្រាំ លោក Abass បានបញ្ជាក់ពេញៗមាត់ថា ជម្រើសជាយុទ្ធសាស្ត្ររបស់ប៉ាឡេស្ទីនគឺ សន្តិភាពផ្អែកលើការអនុវត្តដំណោះស្រាយរដ្ឋពីរ។ លោកក៏អំពាវនាវចំពោះមុខប្រធានាធិបតីអាមរិកទៅកាន់ភាគីអ៊ីស្រាអែលឲ្យបញ្ចប់រាល់ការកាន់កាប់ទឹកដីប៉ាឡេស្ទីន និងការសាងសង់សំណង់លំនៅដ្ឋានជាលក្ខណៈអាណានិគមបែបថ្មីផងដែរ។
លោកបានបញ្ជាក់ដូច្នេះ៖«ជម្រើសយុទ្ធសាស្ត្រនិងជម្រើសតែមួយគត់របស់យើងគឺសម្រេចឲ្យបាននូវដំណោះស្រាយរដ្ឋពីរ មានរដ្ឋប៉ាឡេស្ទីនដោយមានក្រុងហ្ស៊េរុយសាឡិមខាងកើតជារដ្ឋធានី នៅទន្ទឹមជាមួយរដ្ឋអ៊ីស្រាអែលដោយសន្តិភាព ស្ថិរភាព និងសុវត្ថិភាពស្របតាមបន្ទាត់ព្រំដែនឆ្នាំ ១៩៦៧»។
ថ្វីបើ ត្រាំ សន្យាយ៉ាងហំហានចង់ធ្វើជាសន្ធានការីឬជាអាជ្ញាកណ្តាល ឬត្រឹមជាអ្នកសម្របសម្រួលដើម្បីបង្កើតសន្តិភាពដល់តំបន់មជ្ឈិមបូព៌ាដូច្នេះក្តី គេមិនទាន់ឃើញគោលនយោបាយឬចំណាត់ការអ្វីច្បាស់លាស់ដែលប្រធានាធិបតីម្នាក់នេះដាក់ចេញនៅឡើយទេ។ និយាយឲ្យអាក្រក់ស្តាប់បន្តិច លោក ដូណាល់ ត្រាំ ព្យាយាមសន្យា ខណៈដែលលោក មិនទាន់យល់ច្បាស់ពីជម្លោះរ៉ាំរ៉ៃអ៊ីស្រាអែលនិងប៉ាឡេស្ទីន និងភាពស្មុគស្មាញនៅតំបន់មជ្ឈិមបូព៌ានោះឡើយ។
១.បញ្ចប់ជម្លោះមជ្ឈិមបូព៌ាមិនពិបាកដូចលោក ដូណាល់ ត្រាំនិយាយមែនឬ?
បន្ទាប់ពីសន្និសីទសារព័ត៌មានប្រធានាធិបតីអាមេរិកដែលធ្លាប់តែធ្វើជំនួញនោះបានព្រលយពាក្យថាការបញ្ចប់ជម្លោះនៅមជ្ឈិមបូព៌មិនលំបាកដូចមនុស្សគ្រប់គ្នាធ្លាប់គិតឡើយ។ លោក ត្រាំ ប្រហែលជាមានសុទិដ្ឋិនិយមពេកហើយ។ ឬនិយាយម្យ៉ាងទៀតថា លោកនិយាយឲ្យតែរួចពីមាត់ប៉ុណ្ណោះ ព្រោះដូចបញ្ជាក់ខាងដើមស្រាប់ ត្រាំទំនងជាមិនទាន់យល់ពីជម្រៅនិងភាពសាំញ៉ាំនៃជម្លោះមជ្ឈិមបូព៌ាឡើយ។
បើសិនដោះស្រាយជម្លោះដ៏ស្មុគស្មាញចាក់ស្រេះរាប់សតវត្សនៅមជ្ឈិមបូព៌ា និងជម្លោះអ៊ីស្រាអែលនិងប៉ាឡេស្ទីនស្រួលមែន ធ្វើជាប្រធានាធិបតីអាមេរិកក៏មិនមែនជារឿងលំបាកប៉ុន្មានដែរ។ ដូច្នេះលោកក៏មិនចាំបាច់ពោលរអ៊ូប្រាប់អ្នកកាសែត ថាធ្វើប្រធានាធិបតីអាមេរិកពិបាកជាងការការរំពឹងគិតដែរ។
ដំណើរដើមទងនៃជម្លោះអ៊ីស្រាអែល ប៉ាឡេស្ទីន ស្មុគស្មាញខ្លាំង ហើយបើមើលផ្លូវឈានឆ្ពោះទៅរកការចរចារវាងភាគីរឹតតែលំបាកថែមទៀត។ និយាយត្រឹមភាគីដែលត្រូវអង្គុយចរចាសិនចុះ មុនឈានទៅផ្តោតលើកម្មវត្ថុនៃការចរចា។ ប៉ាឡេស្ទីនមិនមែនជាក្រុមដែលរួមគ្នាជាធ្លុងមួយឡើយ។ វានៅមានការបែកខ្ញែកគ្នាគ្នារវាងក្រុមហ្វាតា (Fatah) នៅ West Bank និងក្រុមប្រដាប់អាវុធ ហាម៉ាស (Hamas) នៅកាហ្សា (Gaza) ហើយវាជាហេតុផលមួយធំដែលប៉ាឡេស្ទីនពិបាកចូលចរចាជាមួយអ៊ីស្រាអែល។ ម្ខាងជ្រុលនិយមអាងអាវុធបាញ់បោះប្រឆាំងអ៊ីស្រាអែល ឯម្ខាងទៀតអាចដឹងខុសត្រូវអាចនិយាយឬចរចាគ្នាបាន ។
សូម្បីតែលោក Mahmoud Abbas ដែលតំណាងឲ្យអាជ្ញាធរប៉ាឡេស្ទីន និងដែលលោក ដូណាល់ ត្រាំ អញ្ជើញទៅជួបនៅសេតវិមាននៅពេលនេះក៏មិនមានលទ្ធភាពបង្រួបង្រួមមនុស្សក្នុងក្រុមហ្វាតារបស់ឡើយពេលនេះ។ លោកផុតអាណត្តិទាំងពីឆ្នាំ ២០០៩ ប៉ុន្តែលោកបានបន្តកាន់តំណែងជាប្រធានអាជ្ញាធរដោយមិនឆ្លងកាត់ការបោះឆ្នោតមកដល់បច្ចុប្បន្នខណៈដែលប្រជាប្រិយភាពលោកបន្តធ្លាក់ចុះ។ អ្វីដែលគួរឲ្យបារម្ភ ចលនាផ្ទៃក្នុងដែលចង់ប្រជែងយកតំណែងលោកក៏កើនឡើងខ្លាំងថែមទៀតនៅពេលបច្ចុប្បន្ន។ ដូច្នេះហើយវានឹងអាចមានការប្រែប្រួលឬផ្លាស់ប្តូរក្នុងរចនាសម្ព័ន្ធដឹកនាំរបស់ក្រុមហ្វាតាផងនាពេលណាមួយខាងមុខ។
ប៉ុន្តែគេឃើញសញ្ញាវិជ្ជមានចេញពីខាងក្រុមប្រដាប់អាវុធហាម៉ាសនៅមុនពេលលោក Abbas ធ្វើដំណើរទៅជួបលោក ដូណាល់ ត្រាំ នៅសេតវិមាន។ ក្រុមប្រដាប់អាវុធដែលមាននិន្នាការជ្រុលនិយមនេះបង្ហាញជំហរទន់ភ្លន់និងចង់រកផ្លូវចូលចរចា។ យោងតាមសារព័ត៌មាន New York Times ក្រុមនេះបានបញ្ចេញឯកសារមួយច្បាប់ដែលជាគោលការណ៍រួមរបស់ខ្លួន ដោយឯកសារនេះបានអំពាវនាវឲ្យមានការពង្រឹងទំនាក់ទំនងជាមួយអេហ្ស៊ីបនិងបន្ថយការប្រើប្រាស់ភាសាប្រឆាំងអ៊ីស្រាអែលដែលចែងក្នុងធម្មនុញ្ញខ្លួន រួមទាំងទទួលយករដ្ឋប៉ាឡេស្ទីនបណ្តោះអាសន្នផង។
២.រដ្ឋបាល ត្រាំ ខ្លួនឯងកំពុងបំផ្លាញផ្លូវទៅរកសន្តិភាពរវាងប៉ាឡេស្ទីននិងអ៊ីស្រាអែល?
ក្រៅពីភាពស្មុគស្មាញនៃភាគីជម្លោះ យើងគួរផ្តោតលើកម្មវត្ថុដ៏ចម្រូងចម្រាសក្នុងដំណើរការនៃការចរចាសន្តិភាពវិជ្ជមាន។ ដំណោះស្រាយរដ្ឋពីរជាអ្វីដែលគេលឺជាយូរយារមកហើយ ប៉ុន្តែវាមិនត្រូវបានអ៊ីស្រាអែលទទួលយកឡើយ។ដូចបានបញ្ជាក់ខាងលើ ដំណោះស្រាយស្រាយរដ្ឋពីគឺ ជាការបង្កើតរដ្ឋប៉ាឡេស្ទីនស្ថិតនៅលើបន្ទាត់ព្រំដែនឆ្នាំ ១៩៦៧ ហើយប៉ាឡេស្ទីនត្រូវរស់នៅទន្ទឹមអ៊ីស្រាអែលក្នុងនាមជាមិត្តជិតខាងដោយសន្តិសហវិជ្ជមាន។
អ៊ីស្រាអែលបង្កើតឧបសគ្គរារាំងការស្វែងរកដំណោះស្រាយរដ្ឋពីរនេះ ព្រោះអ៊ីស្រាអែលបន្តគម្រោងសាងសង់សំណង់លំនៅដ្ឋានលើដីប៉ាឡេស្ទីន និងមិនខ្វល់ខ្វាយពីការថ្កោលទោរបស់សហគមន៍អន្តរជាតិទៀត។
កាលពីខែធ្នូឆ្នាំមុន រដ្ឋបាលលោកបារ៉ាក់ អូបាម៉ា បានបើកភ្លើងខៀវឲ្យក្រុមប្រឹក្សាសន្តិសុខចេញដំណោះស្រាយថ្កោលទោសអ៊ីស្រាអែល ដែលវាធ្វើឲ្យអ៊ីស្រាអែលក្តៅក្រហាយខ្លាំង។ ប៉ុន្តែប្រធានាធិបតីអាមរិកដែលចង់ដោះស្រាយជម្លោះអ៊ីស្រាអែលប៉ាឡេស្ទីន ដូណាល់ ត្រាំ ចេញមុខរិះគន់និង ព្រមានអង្គការសហប្រជាជាតិជុំវិញការចេញដំណោះស្រាយថ្កោលទោសអ៊ីស្រាអែល។ ហើយអ្វីដែលគួរឲ្យភ្ងាក់ផ្អើល ដូណាល់ ត្រាំ ព្រមានកែទម្រង់អង្គការសហប្រជាតិ និងដុសក្អែលរដ្ឋដែលប្រឆាំងអ៊ីស្រាអែលក្នុងអង្គការសហប្រជាជាតិទៀត។ វាបង្ហាញឲ្យឃើញច្បាស់ថា លោកព្យាយាមការពារសកម្មភាពរបស់អ៊ីស្រាអែលនៅលើទឹកដីប៉ាឡេស្ទីន និងមិនខ្វាយខ្វល់ពីច្បាប់អន្តរជាតិដែលគ្រប់គ្នាមានកាតព្វកិច្ចគោរពនោះឡើយ។
បញ្ហាធំមួយទៀតដែលអាចបំផ្លាញផ្លូវឆ្ពោះទៅរកសន្តិភាពរវាងអ៊ីស្រាអែលនិងប៉ាឡេស្ទីន គឺ រដ្ឋបាលលោក ដូណាល់ ត្រាំ ប្រកាសត្រៀមប្តូរស្ថានទូតអាមេរិកពីក្រុង Tel Aviv ទៅតាំងនៅទីក្រុងហ្ស៊េរុយសាឡិមកន្លងមក។
បើសិនជា ដូណាល់ ត្រាំ ប្តូរទីតាំងស្ថានទូតទៅក្រុងហ្ស៊េរុយសាឡិមមែន ប៉ាឡេស្ទីននឹងឈប់ទទួលស្គាល់រដ្ឋប៉ាឡេស្ទីន និងឈប់ចរចា។ បញ្ចប់ការទទួលស្គាល់អ៊ីស្រាអែលមានន័យថា ប៉ាឡេស្ទីនមិនរើសយកការចរចាទៀតឡើយ ហើយ ដំណោះស្រាយរដ្ឋពីរដែលអាមេរិកនិងសហគមន៍អន្តរជាតិជ្រោមជ្រែងនោះនឹងក្លាយជាសម្រាម។
សូមទាញការចាប់អារម្មណ៍បន្តិចថា ក្រៅពីភាពពិសិដ្ឋ ហ្ស៊េរុយសាឡិមជាទីក្រុងមួយដ៏ចម្រូងចម្រាសដែលគេមិនទាន់កំណត់ដាច់ស្រេចថាជារបស់ភាគីណា ទោះជាវាស្ថិតក្រោមការកាន់កាប់របស់អ៊ីស្រាអែលក៏ដោយ។ ហើយវាក៏ជាចំណុចស្នូលនៃការចរចាសន្តិភាពរវាងអ៊ីស្រាអែលនិងប៉ាឡេស្ទីនដែរ។
តាមពិតទៅ អ៊ីស្រាអែល បានវាយដណ្តើមកាន់កាប់តំបន់នៅភាគខាងកើតហ្ស៊េរុយសាឡិមនៅក្នុងសង្គ្រាម ៦ថ្ងៃ រវាងអារ៉ាប់-អ៊ីស្រាអែលនៅក្នុងឆ្នាំ ១៩៦៧។ ហើយអាជ្ញាធរអ៊ីស្រាអែលក៏បានភ្ជាប់ទឹកដីនេះនិងដាក់បញ្ចូលក្នុងឧបសម្ព័ន្ធរបស់ខ្លួនដោយបង្រួបបង្រួមទីក្រុងហ្ស៊េរុយសាឡិមទាំងមូលជាផ្លូវការក្នុងឆ្នាំ ១៩៨០ តែម្តង។ ចាប់ពីពេលនោះមក ទឹកដី ហ្ស៊េរុយសាឡិមស្ថិតក្រោមការកាន់កាប់របស់អ៊ីស្រាអែល៕
Tag:
ដូណាល់ ត្រាំ
Two-State Solution
Mahmoud Abbas
© រក្សាសិទ្ធិដោយ thmeythmey.com