អន្តរជាតិ
ដូណាល់ ត្រាំ ពឹង Duterte ឲ្យជួយបញ្ចុះបញ្ចូល ស៊ី ជីនភីង ដើម្បីដោះស្រាយបញ្ហាកូរ៉េខាងជើង 05, May 2017 , 10:44 am
× ជាប្រធានអាស៊ានប្តូរវេនក្នុងឆ្នាំ២០១៧ ហ្វីលីពីន លេចមុខមាត់ខ្លាំងលើឆាកអន្តរជាតិ។ ជារឿងមិននឹកស្មានដល់ ប្រធានាធិបតី Rodrigo Duterte បានក្លាយជាអ្នកសម្របសម្រួលរវាងមហាអំណាចអាមេរិក និងចិន ដែលកំពុងខ្វល់ខ្វាយរឿងនុយក្លេអ៊ែរកូរ៉េខាងជើង។ លោក Duterte បានចាប់ផ្ដើមជជែកតាមទូរសព្ទជាមួយប្រធានាធិបតី ដូណាល់ ត្រាំ ហើយលោក ត្រាំ ក៏បានស្នើឲ្យលោកនិយាយទូរសព្ទជាមួយមេដឹកនាំចិន ស៊ី ជីនភីង ទៀត ដើម្បីរកដំណោះស្រាយវិបត្តិឧបកូរ៉េ។
ប្រធានាធិបតីហ្វីលីពីន Rodrigo Duterte បានលើកឡើងថា កិច្ចសន្ទនាតាមទូរសព្ទរវាងលោក និងសមភាគីចិន ស៊ី ជីនភីង ដើម្បីពិភាក្សាលើបញ្ហានុយក្លេអ៊ែរឧបទ្វីបកូរ៉េ ធ្វើឡើងតាមការបង្គាប់របស់ប្រធានាធិបតីអាមេរិក ដូណាល់ ត្រាំ ។ លោក Duterte បានជជែកតាមទូរសព្ទជាមួយលោក ស៊ី នៅថ្ងៃទី៣ ខែឧសភា ហើយលោកក៏បានប្រាប់លោកមេដឹកនាំចិន ពីតួនាទីមិនអាចខ្វះបានរបស់ចិនក្នុងការដោះស្រាយវិបត្តិនុយក្លេអ៊ែរ។
ថ្លែងពីកម្មវិធីមួយនៅទីក្រុង Davao នៅថ្ងៃទី៤ ខែឧសភា ប្រធានាធិបតីហ្វីលីពីនបានទម្លាយពីខ្លឹមសារមួយចំនួនក្នុងការសន្ទនាតាមទូរសព្ទជាមួយប្រធានាធិបតីចិន។ លោក Duterte និយាយថា លោកបានស្នើឲ្យប្រធានាធិបតី ស៊ី ជីនភីង បង្កើនការប្រឹងប្រែងបន្ថែមទៀតដើម្បីបន្ថយកម្ដៅតានតឹងបង្កដោយការបាញ់មីស៊ីល និងការសាកល្បងនុយក្លេអ៊ែររបស់កូរ៉េខាងជើង។
«ខ្ញុំបាននិយាយទូរសព្ទជាមួយប្រធានាធិបតី ស៊ី ជីនភីង។ ខ្ញុំទូរសព្ទទៅលោក (ស៊ី ជីនភីង) តាមសំណើរបស់ប្រធានាធិបតីអាមេរិក។ សមាជិកអាស៊ានទាំងអស់ រួមទាំងប្រធានាធិបតី ត្រាំ ផង សុទ្ធតែយល់ឃើញដូចគ្នាថា លោក ពិតជាអាចជួយបាន។ អន្តរាគមន៍របស់លោក គឺជាការរួមចំណែកដ៏ធំបំផុត»។ នេះជាការរំឮកឡើងវិញរបស់លោក Duterte ទាក់ទងអត្ថន័យនៃការសន្ទនារវាងលោក និងមេដឹកនាំចិន ដែលផ្សាយដោយទីភ្នាក់ងារព័ត៌មាន Reuters ។
នៅមុនការជជែកតាមទូរសព្ទជាមួយប្រធានាធិបតីចិនប៉ុន្មានថ្ងៃ លោក Duterte បាននិយាយទូរសព្ទជាមួយលោក ត្រាំ ខណៈលោកកំពុងរៀបចំកិច្ចប្រជុំអាស៊ានក្នុងនាមជាប្រធានប្ដូរវេនសម្រាប់ឆ្នាំនេះ។ ពោល គឺទំនងជាពេលនោះហើយដែលលោក ត្រាំ ប្រាប់ឲ្យលោក Duterte ជួយនិយាយជាមួយលោក ស៊ី និងបញ្ចុះបញ្ចូលមេដឹកនាំចិនឲ្យចាត់វិធានការបន្ថែមទៀតលើបញ្ហានុយក្លេអ៊ែរកូរ៉េខាងជើងតែម្ដងទៅ។
តាមពិតទៅ នេះក៏មិនមែនជារឿងចំឡែកអ្វីដែរ ដែលប្រធានាធិបតីអាមេរិក ពឹងសមភាគីហ្វីលីពីនឲ្យជួយដើរតួជាអ្នកសម្របសម្រួលជាមួយសមភាគីម្ខាងទៀតនោះ។ ម្យ៉ាងហ្វីលីពីន ជាប្រធានអាស៊ានស្រាប់ ដែលកូរ៉េខាងជើងជាសមាជិកនៃវេទិកាតំបន់អាស៊ានមួយដែរ ហើយណាមួយហ្វីលីពីន ក៏កំពុងមានទំនាក់ទំនងជិតស្និទ្ធជាមួយចិន ដូច្នេះហ្វីលីពីន អាចដើរតួនាទីសំខាន់ដែរក្នុងការរក្សាសន្តិភាព និងស្ថិរភាពតំបន់បាន៕
Tag:
អាមេរិក
ហ្វីលីពីន
ចិន
កូរ៉េខាងជើង
Rodrigo Duterte
ដូណាល់ ត្រាំ
ស៊ី ជីនភីង
© រក្សាសិទ្ធិដោយ thmeythmey.com