អន្តរជាតិ
អាមេរិកពឹងឲ្យអាស៊ាន បន្ថយកម្រិតការទូត និងផ្តាច់លំហូរហិរញ្ញវត្ថុដើម្បីដាក់សម្ពាធកូរ៉េខាងជើង 05, May 2017 , 3:14 pm
រដ្ឋមន្រ្តីការបរទេសអាមេរិកលោក Rex Tillerson ក្នុងជំនួបជាមួយរដ្ឋមន្ត្រីការបរទេសអាស៊ានថ្ងៃ ៤ឧសភា នៅក្រុងវ៉ាស៊ីនតោន (រូបភាព៖ Department of State)
× រដ្ឋមន្ត្រីការបរទេសអាមេរិកលោក Rex Tillerson បានស្នើឲ្យអាស៊ានជួយសហការដើម្បីកាត់ផ្តាច់ចរន្តចំណូលរបស់ក្រុងព្យុងយ៉ាង និងកាត់បន្ថយទំនាក់ទំនងការទូតជាមួយរបបដឹកនាំនេះឲ្យដល់កម្រិតអប្បបរមា។ អាមេរិកមិនជំរុញឲ្យអាស៊ានផ្តាច់ចំណងការទូតជាមួយកូរ៉េខាងជើងឡើយ ប៉ុន្តែវាជារឿងចាំបាច់ដែលរដ្ឋអាស៊ានត្រូវបន្ថយកម្រិតការទូតខ្លះដែលមិនចាំបាច់។
សមុទ្រចិនខាងត្បូង,អតុល្យភាពពាណិជ្ជកម្មនិងបញ្ហាសន្តិសុខតំបន់ ក្លាយជាប្រធានបទស្នូលនៃកិច្ចប្រជុំរវាងរដ្ឋមន្ត្រីការបរទេសអាមេរិកនិងរដ្ឋមន្ត្រីការបរទេសអាស៊ាននៅថ្ងៃ ៤ ឧសភានៅក្រុងវ៉ាស៊ីនតោន។ ប៉ុន្តែភាពតានតឹងនៅឧបទ្វីបកូរ៉េ ជាប្រធានបទក្តៅនិងសំខាន់ជាងគេ។
មន្ត្រីជាន់ខ្ពស់អាមេរិកបានបញ្ជាក់ថា ប្រមុខការទូតអាមេរិក Rex Tillerson បានយកឱកាសនៃជំនួបនេះបញ្ចុះបញ្ចូលឲ្យសមភាគីអាស៊ានចូលរួមផ្តាច់លំហូរហិរញ្ញវត្ថុទៅកាន់កូរ៉េខាងជើង និងបន្ថយកម្រិតទំនាក់ទំនងការទូតជាមួយកូរ៉េខាងជើងឲ្យនៅត្រឹមកម្រិតអប្បមរមាថែមទៀត។
ក្នុងកិច្ចប្រជុំនេះ គេឃើញមានវត្តមានរដ្ឋមន្ត្រីការបរទេសរដ្ឋអាស៊ានចំនួន ៨ និងមន្ត្រីជាន់ខ្ពស់តំណាងប្រទេសពីរទៀត។ រដ្ឋមន្ត្រីការបរទេសមីយ៉ាន់ម៉ានិងទីប្រឹក្សារដ្ឋលោកស្រី អ៊ុងសាន ស៊ូជី មិនបានទៅចូលរួមក្នុងកិច្ចប្រជុំនេះទេព្រោះលោកស្រីជាប់បំពេញទស្សនកិច្ចនៅអឺរ៉ុប។
ក្នុងសន្និសីទសារព័ត៌មានតាមទូរសព្ទថ្ងៃសុក្រទី៥ ឧសភា ឧបការីរងរដ្ឋមន្ត្រីការបរទេសអាមេរិកទទួលបន្ទុកកិច្ចការអាស៊ីបូព៌ានិងប៉ាស៊ីហ្វិកលោក Patrick Murphy បានថ្លែងប្រាប់អ្នកសារព័ត៌មានថា អាមេរិកចង់បានភាពជាដៃគូនិងកិច្ចសហការជាមួយអាស៊ានដើម្បីដោះស្រាយបញ្ហារួមគ្នា មិនមែនជាការដាក់សម្ពាធលើអាស៊ានឲ្យដោះស្រាយបញ្ហាប្រឈមក្នុងជាពិសេសវិបត្តិកូរ៉េទេ។
លោក Murphy បានបញ្ជាក់ដូច្នេះ« យើងជំរុញឲ្យបណ្តាប្រទេសអាស៊ានអនុវត្តឲ្យបានខ្ជាប់ខ្ជួននូវដំណោះស្រាយក្រុមប្រឹក្សាសន្តិសុខអង្គការសហប្រជាជាតិ។ និយាយទៅវិធានការជាក់លាក់ដែលយើងស្នើគឺ សុំឲ្យអាស៊ានជួយសហការដើម្បីកាត់ផ្តាច់ប្រភពហិរញ្ញវត្ថុដែលកូរ៉េខាងជើងប្រើប្រាស់សម្រាប់អភិវឌ្ឍមីស៊ីលនិងនុយក្លេអ៊ែរ និងបន្ថយកម្រិតចំណង ការទូតជាមួយក្រុងព្យុងយ៉ាងផង»។
តំណាងក្រុងវ៉ាស៊ីនតោននេះបានបន្តថា ថា រដ្ឋអាស៊ានទាំង១០ មានទំនាក់ទំនងល្អនិងកក់ក្តៅជាមួយរដ្ឋឯកោកូរ៉េខាងជើង។ ដូចឃើញស្រាប់ហើយរដ្ឋ ប្រាំ ក្នុងចំណោមរដ្ឋអាស៊ានទាំងដប់មានស្ថានទូតនៅកូរ៉េខាងជើង ដែលវាបង្ហាញថាទំនាក់ទំនងការទូតនេះមានច្រើនហួសការចាំបាច់។ ដូច្នេះរដ្ឋអាស៊ានអាចធ្វើសកម្មភាពបានច្រើនជាងនេះដើម្បីបន្ថយទំនាក់ទំនងនេះ។
កន្លងមករដ្ឋបាលលោក ដូណាល់ ត្រាំ បានប្រឹងប្រែងស្វះស្វែងរកការសហការជាមួយបណ្តាប្រទេសក្នុងតំបន់ជាពិសេសមហាយក្សចិន និងប្រទេសអាស៊ាន។ ដូណាល់ ត្រាំ បានទទូចឲ្យចិនធ្វើសកម្មភាពច្រើនជាងមុនដើម្បីដោះស្រាយបញ្ហាកូរ៉េខាងជើង ហើយលោក ក៏បានទូរសព្ទមកកាន់មេដឹកនាំអាស៊ានមួយចំនួនទៀតផងដែរដើម្បីសុំការសហការ។
កាលពីសប្តាហ៍មុនលោក ដូណាល់ ត្រាំ បានទូរសព្ទមកប្រធានអាស៊ានប្រធានាធិបតីហ្វីលីពីនលោក Rodrigo Duterte , នាយករដ្ឋមន្ត្រីថៃលោក ប្រាយុទ្ធ ចាន់អូចា និងនាយករដ្ឋមន្ត្រីសិង្ហបុរី លី សៀនឡុង ដើម្បីជជែកពីបញ្ហាប្រឈមនិងអញ្ជើញអ្នកទាំងបីទៅបំពេញទស្សនកិច្ចនៅសហរដ្ឋអាមេរិកថែមទៀត។
-ពឹងអាស៊ានឲ្យជួយ ប្រធានាធិបតី ដូណាល់ ត្រាំ មិនមានអ្វីផ្តល់ឲ្យអាស៊ានជាថ្នូរ
ជាលើកដំបូងបំផុតដែលអាមេរិករត់មកពឹងរដ្ឋអាស៊ានឲ្យជួយលូកដៃដោះស្រាយបញ្ហានុយក្លេអ៊ែរកូរ៉េខាងជើង ចាប់ពី ដូណាល់ ត្រាំ ស្បថចូលកាន់តំណែងខែមករា។ ការពឹងពាក់អាស៊ានកើតឡើង ក្រោយលោក ដូណាល់ ត្រាំ ដកខ្លួនចេញពីកិច្ចព្រមព្រៀងពាណិជ្ជកម្មភាពជាដៃគូអន្តរប៉ាស៊ីហ្វិក ដែលបង្កក្តីបារម្ភក្នុងតំបន់ទាំងមូល។
គេបារម្ភថាអាមេរិកនឹងដកខ្លួន ឈប់ភ្ជាប់ទំនាក់ទំនងជាមួយអាស៊ានទៀតនៅពេលអនាគត ខុសស្រឡះពីគោលនយោបាយរបស់លោក បារ៉ាក់ អូបាម៉ា នោះ។ ដូច្នេះគេឆ្ងល់ថា តើអាមេរិកមានអ្វីជាថ្នូរដើម្បី ពឹងឲ្យអាស៊ានធ្វើតាមសំណូមពរខ្លួនដោយកាត់ផ្តាច់លំហូរហិរញ្ញវត្ថុនិងបន្ថយកម្រិតទំនាក់ទំនងការទូតនោះ?
ក្នុងសន្និសីទសារព័ត៌ាមនថ្ងៃសុក្រ ឧបការរីរងរដ្ឋមន្ត្រីការបរទេស Patrick Murphy បានព្យាយាមបញ្ជាក់ថា អាមេរិកនៅចាត់ទុកអាស៊ានជាដៃគូខ្វះមិនបាន ហើយអាស៊ាននឹងនៅបន្តទទួលបានប្រយោជន៍សង្គម, សេដ្ឋកិច្ច និងសន្តិសុខពីការបន្តតួនាទីនិងពង្រឹងឥទ្ធិពលរបស់អាមេរិកក្នុងតំបន់។
«អាស៊ានសំខាន់ណាស់សម្រាប់អាមេរិកពេលនិយាយពីទំនាក់ទំនងសេដ្ឋកិច្ច ហើយអាមេរិកមានគោលបំណងបន្តអភិវឌ្ឍទំនាក់ទំនងសេដ្ឋកិច្ច ហើយបណ្តាប្រទេសអាស៊ានអាចនឹងឃើញទំនាក់ទំនងសេដ្ឋកិច្ចនិងពាណិជ្ជកម្មជាមួយអាមេរិកកាន់តែរីកធំធាត់ឡើងនៅពេលអនាគតដ៏ខ្លីខាងមុខនេះ»។ នេះជាការគូសបញ្ជាក់របស់លោក Murphy។
ឧបការរីរងរូបន្តបន្តថា ក្នុងជំនួបលើកដំបូងនេះ រដ្ឋមន្ត្រីកាបរទេសអាមេរិកលោក Rex Tillerson ប្រាប់រដ្ឋមន្ត្រីការបរទេសអាស៊ានថា អាស៊ានជាដៃគូយុទ្ធសាស្ត្រសំខាន់បំផុតមួយសម្រាប់សហរដ្ឋអាមេរិកក្នុងកិច្ចសហការដោះស្រាយបញ្ហាសន្តិសុខនិងពង្រឹងទំនាក់ទំនង ពាណិជ្ជកម្ម និងសេដ្ឋកិច្ចជាដើម។ លោកក៏បានរំលឹកឡើងវិញពីការប្តេជ្ញាចិត្តរបស់អាមេរិកក្នុងការបន្តកសាងនិងលើកស្ទូយទំនាក់ទំនងជាមួយអាស៊ាននៅពេលអនាគតខាងមុខ។
ដូចឃើញស្រាប់ប្រធានាធិបតី ដូណាល់ ត្រាំ ប្រកាសថានឹងអញ្ជើញមកចូលរួមក្នុងកិច្ចប្រជុំមេដឹកនាំកិច្ចសហប្រតិបតិ្តការសេដ្ឋកិច្ចអាស៊ីប៉ាស៊ីហ្វិក (APEC) នៅវៀតណាម និងបន្តមកចូលរួមកិច្ចប្រជុំសំខាន់ពីទៀតនៅហ្វីលីពីនមានកិច្ចប្រជុំកំពូលអាស៊ីបូព៌ានិងកិច្ចប្រជុំអាស៊ាន-អាមេរិកផងដែរ៕
Tag:
Rex Tillerson
Patrick Murphy
អាស៊ាន
កូរ៉េខាងជើង
© រក្សាសិទ្ធិដោយ thmeythmey.com