អន្តរជាតិ
លោក ម៉ាក្រុង កាន់តែមានប្រជាប្រិយភាព ក្រោយលោក អូបាម៉ា ចេញមុខគាំទ្រ 05, May 2017 , 8:19 pm
× ខណៈការបោះឆ្នោតប្រធានាធិបតីបារាំងជុំទី២ នៅចាប់ផ្ដើមនៅថ្ងៃទី៧ ខែឧសភា អតីតប្រធានាធិបតី បារ៉ាក់ អូបាម៉ា បានចេញមកប្រកាសគាំទ្របេក្ខជនកណ្ដាលនិយម អេម៉ានុយអែល ម៉ាក្រុង (Emmanuel Macron) ដែលត្រូវតទល់នឹងបេក្ខជនស្ដាំនិយមជ្រុល ម៉ារីន ឡឹប៉ែន (Marine Le Pen) ។ ក្នុងសារវីដេអូមួយដែលបង្ហោះលើគណនី Twitter របស់លោក ម៉ាក្រុង លោក អូបាម៉ា ចាត់ទុកការបោះឆ្នោតនៅបារាំង គឺជាបញ្ហាសម្រាប់ពិភពលោកទាំងមូល ហើយជោគជ័យរបស់បារាំង ក៏ជាជោគជ័យរបស់ពិភពលោកដែរ។
អនាគតរបស់បារាំង នឹងត្រូវសម្រេចក្នុងការបោះឆ្នោតជុំចុងក្រោយនៅចុងសប្ដាហ៍នេះ ដោយ បេក្ខជន គ្មានបក្ស Emmanuel Macron ត្រូវប្រជែងកៅអីប្រធានាធិបតីជាមួយបេក្ខជនបក្សរណសិរ្សជាតិ Marine Le Pen ។ ជាការបោះឆ្នោតជ្រើសរើសរវាងការបន្តនៅជាសមាជិកសហភាពអឺរ៉ុប ឬត្រូវចាកចេញ រវាងនយោបាយបើកចំហ ឬការរឹត្បិតលំហូរជនអន្តោប្រវេសន៍ រវាងការបន្តប្រើលុយអឺរ៉ុប ឬការចាយលុយក្នុងស្រុក និងរវាងនយោបាយគាំទ្រសកលភាវូបនីយកម្ម ឬគាំទ្រការគាំពារនិយម។
ដោយហេតុថានេះជាការបោះឆ្នោតយ៉ាងសំខាន់ អតីតប្រធានាធិបតីអាមេរិក បារ៉ាក់ អូបាម៉ា ដែលនៅឆ្ងាយពីរឿងនយោបាយចាប់តាំងពីចាកចេញពីសេតវិមានមកនោះ ក៏បានចេញមកអន្តរាគមន៍ ដោយលោកប្រកាសគាំទ្រលោក Macron ។ នេះ ជារឿងកម្រដែលលោក អូបាម៉ា និយាយលូកលាន់កិច្ចការបោះឆ្នោតប្រទេសផ្សេង បើទោះជាលោកធ្លាប់និយាយដល់ប្រជាមតិអង់គ្លេសក្ដី ប៉ុន្តែសម្រាប់លោក អូបាម៉ា បារាំងជាករណីលើកលែង ព្រោះពាក់ព័ន្ធអនាគតរបស់អឺរ៉ុបផង និងពិភពលោកផង។
ជាមួយនឹងការលើកសរសើរនយោបាយសេរីនិយមរបស់លោក Macron អតីតប្រធានាធិបតីអាមេរិករូបនេះ ក៏បាននិយាយដែរថា ការបោះឆ្នោតនៅបារាំងនៅពេលនេះ ជាបញ្ហារបស់របស់ពិភពលោកទាំងមូល ដែលរឿងនេះតម្រូវឲ្យលោកចេញមកអន្តរាគមន៍ ទោះលោកគ្មានតំណែងអ្វីក៏ដោយ។ ក្នុងវីដេអូខាងលើ លោក អូបាម៉ា បន្តថា លោកយល់ដឹងពីបញ្ហាប្រឈមដែលប្រជាជនបារាំងកំពុងជួប ដូច្នេះទើបលោកគាំទ្របេក្ខជន Macron ដើម្បីដឹកនាំបារាំង។
១. អន្តរាគមន៍របស់លោក អូបាម៉ា ជួយឲ្យលោក Macron ឈ្នះឆ្នោត
ជាពិតការប្រកាសគាំទ្រលោក Macron ពីសំណាក់អតីតប្រធានាធិបតី បារ៉ាក់ អូបាម៉ា គឺជាផ្នែកមួយនៃយុទ្ធនាការប្រមូលការគាំទ្រសម្រាប់លោក Macron មុនការបោះឆ្នោតមកដល់។ នេះក៏ព្រោះលោក Macron និងលោក អូបាម៉ា មាននយោបាយស្រដៀងគ្នាជាច្រើនចំណុចដូចជាការគាំទ្រការបើកចំហសេដ្ឋកិច្ចសេរី ការបើកចំហព្រំដែនទទួលយកជនអន្តោប្រវេសន៍ និងការឲ្យតម្លៃលើកិច្ចសហប្រតិបត្តិការជាមួយប្រទេសផ្សេង។
ប៉ុន្តែអតីតមន្ត្រីរដ្ឋបាលលោក អូបាម៉ា ក៏បានព្រមានដែរថា អន្តរាគមន៍របស់អតីតប្រធានាធិបតីអាមេរិកនៅពេលនេះ ទំនងជាមិនអាចជួយអ្វីបានឡើយ។ បើតាមសារព័ត៌មាន The Guardian លោក Philip Gordon អតីតឧបការីរដ្ឋមន្ត្រីការបរទេសទទួលបន្ទុកកិច្ចការអឺរ៉ុបព្រមានថា បើទោះជាលោក អូបាម៉ា នៅមានប្រជាប្រិយភាពក្នុងចំណោមប្រជាជនបារាំងក្ដី អន្តរាគមន៍របស់លោកអាចក្លាយជាការជួយលោកស្រី Le Pen វិញ។
ក្នុងន័យនេះ លោក Philip Gordon ទំនងចង់បញ្ជាក់ថា អន្តរាគមន៍របស់លោក អូបាម៉ា នៅវិនាទីចុងក្រោយមុនការបោះឆ្នោត គឺជាកាំបិតដែលចាក់លោក Macron ពីក្រោយខ្នងទៅវិញ។ នេះក៏ព្រោះតែប្រជាជនបារាំងខ្លះក៏ប្រកាន់គំនិតប្រឆាំងអាមេរិក មិនចូលចិត្តចរិតអុងអាត់ដឹកនាំគេឯងរបស់អាមេរិក ហើយខ្លះទៀតថែមទាំងមានគំនិតរើសអើងពូជសាសន៍នៅឡើយ។
២. ប្រជាប្រិយភាពរបស់លោក Macron កើនខ្ពស់ក្នុងការស្ទាបស្ទង់ចុងក្រោយ
នៅថ្ងៃទី៣ ខែឧសភា បេក្ខជនចុងក្រោយទាំង២ បានទាស់សម្ដីគ្នាយ៉ាងខ្លាំង ហើយថែមទាំងវាយប្រហារគ្នាទៅវិញទៅមកទៀតមិនថាគោលនយោបាយ ឬរឿងរ៉ាវបុគ្គលអ្វីឡើយ។ បេក្ខជនទាំង២ ព្យាយាមរកចំណុចខ្សោយរបស់ភាគីម្ខាងទៀត រួចវាយប្រហារតែម្ដង ក្នុងន័យដណ្ដើមយកសំឡេងគាំទ្រពីប្រជាជនបារាំងមានសិទ្ធិបោះឆ្នោតរាប់លាននាក់ ដែលតាមដានការជជែកដេញដោលតាមទូរទស្សន៍។
ក្រោយការជជែកដេញដោលបែកផ្សែងមកនោះ ប្រជាប្រិយភាពរបស់លោក Emmanuel Macron បាននាំមុខក្នុងគម្លាតធំគួរសមបើប្រៀបធៀបនឹងលោកស្រី Marine Le Pen ។ បើទោះជាប្រើឱកាសចុងក្រោយនៃការជជែកដេញដោលទល់មុខក្ដី បេក្ខជនស្ដាំនិយមជ្រុល Le Pen នៅតែមិនអាចទាក់ទាញសំឡេងពីអ្នកបោះឆ្នោតបារាំងបានច្រើនគ្រប់គ្រាន់ដែរ ហើយលោកស្រី នៅស្ថិតក្រោមលោក Macron ដដែល។
ទីភ្នាក់ងារព័ត៌មាន Reuters ផ្សាយថា អ្នកបោះឆ្នោតចំនួន ៦២ភាគរយជ្រើសរើសយក Macron ខណៈ ៣៨ភាគរយទៀតជ្រើសរើសលោកស្រី Le Pen ។ នេះគឺជាលទ្ធផលស្ទង់មតិក្នុងចំណោមអ្នកបោះឆ្នោតបារាំងនៅក្រោយការជជែកពិភាក្សាតាមទូរទស្សន៍។ ជាមួយលទ្ធផលបែបនេះ តើប្រជាជនបារាំង មិនចង់ចាកចេញពីអឺរ៉ុប មិនចង់រឹតត្បិតសេដ្ឋកិច្ចរបស់ខ្លួន ហើយក៏មិនចង់មាន ដូណាល់ ត្រាំ បារាំងឬ?
Tag:
បារាំង
បារ៉ាក់ អូបាម៉ា
Emmanuel Macron
Marine Le Pen
© រក្សាសិទ្ធិដោយ thmeythmey.com