អន្តរជាតិ
រដ្ឋមន្ត្រីការបរទេសអាមេរិកប្រាប់អាស៊ានថា ជំហរអាមេរិកក្នុងជម្លោះសមុទ្រចិនខាងត្បូងមិនប្រែប្រួល 05, May 2017 , 4:53 pm
× បញ្ហាសមុទ្រចិនខាងត្បូង បានក្លាយជាប្រធានបទសំខាន់មួយដែរក្នុងកិច្ចប្រជុំរដ្ឋមន្ត្រីការបរទេសអាមេរិក និងអាស៊ានថ្ងៃ ៤ ខែឧសភា។ រដ្ឋមន្ត្រីការបរទេសអាមេរិកបានបញ្ជាក់ថា គោលជំហរអាមេរិកមិនប្រែប្រួលឡើយចំពោះបញ្ហាសមុទ្រចិនខាងត្បូង ពោលគឺអាមេរិកយកច្បាប់អន្តរជាតិជាធំ និងស្នើឲ្យបណ្តាភាគីពាក់ព័ន្ធបញ្ឈប់រាល់សកម្មភាពសាងសង់ ឬវាតទី ឬធ្វើយោធូបនីយកម្មនៅក្នុងតំបន់ជម្លោះដើម្បីឈានទៅដោះស្រាយជម្លោះនេះបាន។
គោលជំហររបស់អាមេរិកក្នុងជម្លោះសមុទ្រចិនខាងត្បូងមិនមានការប្រែប្រួលឡើយក្នុងបញ្ហាជម្លោះសមុទ្រចិនខាងត្បូង ហើយអាស៊ានពឹងផ្អែកលើកម្ពុជាក្នុងការរក្សានិងអនុវត្តសិទ្ធិដ៏សំខាន់នេះដើម្បីរក្សាប្រយោជន៍តំបន់និងភាគីពាក់ព័ន្ធ។ នេះជាការអ្វីដែលរដ្ឋមន្ត្រីការបរទេសអាមេរិកលោក Rex Tillerson ប្រាប់រដ្ឋមន្ត្រីការបរទេសអាស៊ានក្នុងជំនួបលើកដំបូងនៅក្រុងវ៉ាស៊ីនតោន។
ក្នុងសន្និសីទសារព័ត៌មានតាមទូរសព្ទថ្ងៃសុក្រទី ៥ ខែឧសភា លោក Patrick Murphy ឧបការីរងរដ្ឋមន្ត្រីការបរទេសអាមេរិកទទួលបន្ទុកកិច្ចការអាស៊ីបូព៌ានិងប៉ាស៊ីហ្វិកបានបញ្ជាក់ប្រាប់អ្នកសារព័ត៌មានថា លោក Rex Tillerson និងសមភាគីអាស៊ានចំណាយពេលច្រើនដែរដើម្បីជជែកគ្នាបញ្ហាសមុទ្រចិនខាងត្បូង។
លោកបន្តថា អាមេរិកផ្ញើសារច្បាស់លាស់ទៅកាន់អាស៊ានច្បាស់លាស់ដោយជំហរអាមេរិកឥតងាករេក្នុងការដោះស្រាយបញ្ហាជម្លោះសមុទ្រចិនខាងត្បូងនិងការពារសេរីភាពនាវាចរណ៍និងសេរីភាពនៃការហោះហើរ។ ហើយ រដ្ឋមន្ត្រីការបរទេសអាមេរិក និងអាស៊ានពិភាក្សាគ្នាពាក់ព័ន្ធបញ្ហាសមុទ្រចិនខាងត្បូងនេះ ផ្អែកតាមស្មារតីនៃសេចក្តីថ្លែងការណ៍រួមកិច្ចប្រជុំអាមេរិក អាស៊ាននៅ Sunnylands កាលពីខែកុម្ភៈឆ្នាំ ២០១៦។
«វាច្បាស់លាស់ណាស់ថា អាមេរិកចង់រក្សាសេរីភាពនាវាចរណ៍និងការហោះហើរ ហើយថាដៃគូយើងនៅអាស៊ានអាចពឹងផ្អែកលើអាមេរិកដើម្បីអនុវត្តសិទ្ធិខាងលើនេះ ។ វាមានសារៈសំខាន់ សម្រាប់ពាណិជ្ជកម្ម ហើយវារឹតតែសំខាន់ទៀតសម្រាប់សន្តិភាព សន្តិសុខ និងស្ថិរភាពក្នុងតំបន់និងពិភពលោកទាំងមូល»។
តំណាងរដ្ឋមន្ត្រីការបរទេសអាមេរិកខាងលើក៏បានពន្យល់បន្ថែមផងដែរថា ថ្វីបើមិនមែនជាភាគីជម្លោះក្តី អាមេរិកមានផលប្រយោជន៍ព្រោះអាមេរិកជារដ្ឋស្ថិតក្នុងតំបន់សមុទ្រចិនខាងត្បូង។ រដ្ឋមន្ត្រីការបរទេសអាមេរិកយល់ថា គេអាចដោះស្រាយបញ្ហាជម្លោះនេះបានដោយការជជែកពិភាក្សា ដោយយកគោលការណ៍អន្តរជាតិ និងច្បាប់អន្តរជាតិជាធំ ហើយភាគីត្រូវបញ្ឈប់រាល់សកម្មភាពសាងសង់, យោធូបនីយកម្ម និងវាតទីយកតំបន់ជម្លោះជាដើម។
«រដ្ឋមន្ត្រី Rex Tillerson បានអំពាវនាវទៅកាន់ភាគីពាក់ព័ន្ធ និងស្នើឲ្យភាគីទាំងអស់បញ្ឈប់រាល់ការធ្វើយោធូបនីយកម្ម,សាងសង់សំណង់ ឬវាតទីយកតំបន់ជម្លោះ ស្របពេលដែលការជជែកពិភាក្សារកដំណោះស្រាយនៅតែបន្ត។ វានៅតែមានមធ្យោបាយសមស្របដោយសន្តិវិធី ដូចជាការចរចា និងពិភាក្សា ដើម្បីសម្រេចបានដំណោះស្រាយមួយយូរអង្វែង»។ នេះជាការគូសបញ្ជាក់របស់ឧបការីរងរដ្ឋមន្ត្រីការបរទេស Murphy។
ថ្វីបើអាមេរិកមានគោលជំហរមិនប្រែប្រួលចំពោះបញ្ហាសមុទ្រចិនខាងត្បូងក្តី រដ្ឋដែលតែងតតាំងជាមួយចិន ហ្វីលីពីនស្រាប់តែងាកទៅរកចិនមួយទំហឹងក្រោយលោក Rodrigo Duterte ឡើងកាន់អំណាចខែមិថុនាឆ្នាំ២០១៦។ ហើយអ្វីដែលរឹតតែភ្ញាក់ផ្អើលគឺ ហ្វីលីពីនដែលជាប្រធានអាស៊ានប្តូរវេននោះបានសម្រេចមិនដាក់ចំណុចពាក់ព័ន្ធសាលក្រមតុលាការមជ្ឈត្តការអន្តរជាតិ និងក្តីបារម្ភរឿងយោធូបនីយកម្មរបស់ចិននៅតំបន់ជម្លោះសមុទ្រចិនខាងត្បូងនៅក្នុងសេចក្តីថ្លែងការណ៍រួមរបស់អាស៊ានក្រោយកិច្ចប្រជុំកំពូលអាស៊ានចុងខែមេសាទៀត៕
Tag:
អាមេរិក
Rex Tillerson
អាស៊ាន
Patrick Murphy
© រក្សាសិទ្ធិដោយ thmeythmey.com