អន្តរជាតិ
ត្រាំ នឹងទៅទស្សនកិច្ចអារ៉ាប៊ីសាអូឌីត និងអ៊ីស្រាអែល ក្នុងគោលបំណងបង្កើតសន្តិភាពតំបន់ 05, May 2017 , 9:59 pm
× ប្រធានាធិបតីអាមេរិកលោក ដូណាល់ ត្រាំ បានប្រកាសទៅទស្សនកិច្ចនៅប្រទេសអារ៉ាប៊ីសាអូឌីត, អ៊ីស្រាអែល និងបន្តទៅបុរីវ៉ាទីកង់ផងដែរនៅចុងខែឧសភាខាងមុខ។ ត្រាំ ប្រកាសទៅទស្សនកិច្ចនៅមជ្ឈិមបូព៌ានេះកើតឡើងមួយថ្ងៃប៉ុណ្ណោះ ក្រោយពេលលោកជួបជាមួយមេដឹកនាំប៉ាឡេស្ទីន និងសន្យាស្វែងរកសន្តិភាពសម្រាប់តំបន់មជ្ឈិបូព៌ាផងនោះ។
ក្នុងពេលធ្វើដំណើរទៅទស្សនកិច្ចស្នាក់ការកណ្តាលអង្គការណាតូនៅព្រុចសែល និងចូលរួមកិច្ចប្រជុំប្រទេស៧ នៅក្រុង Sicily ប្រទេសអ៊ីតាលី ចុងខែនេះ លោក ដូណាល់ ត្រាំ នឹងឈាងទៅទស្សនកិច្ចប្រទេសអារ៉ាប៊ីសាអូឌីត, អ៊ីស្រាអែល និងបុរីវ៉ាទីកង់ថែមទៀតផង។
លោក ដូណាល់ ត្រាំ បានប្រកាសនៅថ្ងៃព្រហស្បតិ៍ទី ៤ ឧសភាដូច្នេះថា៖« ដំណើរទស្សនកិច្ចនៅបរទេសលើកដំបូងរបស់ខ្ញុំជាប្រធានាធិបតីអាមេរិកគឺ ទៅកាន់អារ៉ាប៊ីសាអូឌីត បន្ទាប់មកទៅអ៊ីស្រាអែល និងបន្ទាប់មកទៀតគឺបុរីវ៉ាទីកង់នៅទីក្រុងរ៉ូម»។
យោងតាមទីភ្នាក់ងារព័ត៌មាន AFP ទាក់ទិនការធ្វើដំណើរទៅអារ៉ាប៊ីសាអូឌីតនៅពេលខាងមុខនេះដែរ លោក ដូណាល់ ត្រាំ មានគោលបំណងសំខាន់ពង្រឹងទំនាក់ទំនងឡើងវិញរវាងអាមេរិកនិងបណ្តាប្រទេសម៉ូស្លីមធំៗលើពិភពលោក។
ទំនាក់ទំនងរវាងសហរដ្ឋអាមេរិកនិងសម្ព័ន្ធមិត្តរដ្ឋឈូងសមុទ្រហាក់ល្អក់កករជំនាន់លោក បារ៉ាក់ អូបាម៉ា ដោយសារតែលោកជ្រើសរើសយកការភ្ជាប់ទំនាក់ទំនងជាមួយអ៊ីរ៉ង់ និងបង្កើតកិច្ចព្រមព្រៀងនុយក្លេអ៊ែរ។ ហើយមកដល់ជំនាន់លោក ដូណាល់ នេះទៀតទំនាក់ទំនងកាន់តែដុនដាប ដោយសារលោកជាប្រធានាធិបតីដែលត្រូវបានគេរិះគន់ខ្លាំងរឿងបញ្ឆេះគំនិតស្អប់ខ្ពើមប្រជាជនម៉ូស្លីមផង។
ដូចឃើញស្រាប់ ក្នុងពេលឃោសនាបោះឆ្នោងលោក ដូណាល់ ត្រាំ បានប្រើប្រាស់ពាក្យសម្តីបង្កប់អត្ថន័យរើសអើងសាសន៍និងបង្កការប៉ះពាល់ដល់ប្រជាជនម៉ូស្លីម។ ហើយក្រោយឡើងកាន់អំណាច លោកបានចេញក្រឹត្យហាមឃាត់អ្នកដំណើមកពីប្រទេសម៉ូស្លីមធំៗចំនួន ប្រាំមួយថែមទៀតដែលសកម្មភាពនេះបង្កឲ្យមានការខឹងសម្បារកាន់តែខ្លាំងក្នុងសហគមន៍ប្រជាជនម៉ូស្លីមថែមទៀត។
ដូច្នេះហើយ វាជាពេលវេលាសមស្របសម្រាប់ប្រធានាធិបតីអាមេរិកដែលត្រូវស្វះស្វែងរកឱកាសស្តារទំនាក់ទំនងនេះឡើងវិញដើម្បីប្រយោជន៍ទ្វេភាគីនិងប្រយោជន៍តំបន់ផងដែរ។
ដោយឡែកការបំពេញទស្សនកិច្ចទៅអារ៉ាប៊ីសាអូឌីត និងអ៊ីស្រាអែលនេះអាចជាផ្នែកមួយនៃគោលនយោបាយការបរទេសរបស់លោក ដូណាល់ ត្រាំ ទៅកាន់តំបន់មជ្ឈិមបូព៌ា។ចំណុចអាទិភាពរបស់លោក ដូណាល់ ត្រាំ គឺបង្កើតសន្តិភាពនៅមជ្ឈិមបូព៌ា ដូចជាជួយជ្រោមជ្រែងការដោះស្រាយជម្លោះអ៊ីស្រាអែល និងប៉ាឡេស្ទីនដែរ។
លោក ដូណាល់ ត្រាំប្រកាសទៅអារ៉ាប៊ីសាអូឌីត និងអ៊ីស្រាអែល មួយថ្ងៃប៉ុណ្ណោះក្រោយពេលដែលលោកទទួលស្វាគមន៍មេដឹកនាំប៉ាឡេស្ទីនលោក Mahmoud Abbas ហើយលោកថែមទាំងហ៊ានសន្យាជួយដោះស្រាយបញ្ហាជម្លោះរ៉ាំរ៉ៃខ្លាំងជាងគេលើលោកនេះទៀត។
ក្នុងពេលទៅអ៊ីស្រាអែល លោក ដូណាល់ ត្រាំ នឹងជួបជាមួយនាយករដ្ឋមន្ត្រី បេនចាមិន ណេតាន់យ៉ាហ៊ូ និងប្រធានាធិបតីប៉ាឡេស្ទីនលោក Mahmoud Abbas ម្តងទៀតដែរ។ មន្ត្រីសេតវិមានបានបង្ហើបថា ការទៅទស្សនកិច្ចនៅតំបន់ West Bank ដោយប្រធានាធិបតីអាមេរិកក្នុងពេលលោកបំពេញទស្សនកិច្ចនៅអ៊ីស្រាអែលអាចកើតឡើងដែរ។
បន្ទាប់ពីចាកចេញពីអ៊ីស្រាអែល លោក ដូណាល់ ត្រាំ នឹងបន្តដំណើរទៅកាន់បុរីវ៉ាទីកង់ ហើយលោកជួយសំណេះសំណាលជាមួយសម្តេច ប៉ាបហ្វ្រង់ស៊ីស នៅថ្ងៃ ២៤ ឧសភា។ ក្រៅពីនេះលោកនឹងជួបមេដឹកនាំសមាជិកបក្សសម្ព័ន្ធណាតូ និងបន្តចូលរួមវេទិកាមេដឹកនាំក្រុមប្រទេស ៧ថែមទៀត។ វត្តមានលោកនៅក្នុងកិច្ចប្រជុំណាតូ មានសារៈសំខាន់និងជាសារមួយច្បាស់លាស់បញ្ជាក់ប្រាប់មេដឹកនាំសមាជិកណាតូថា អាមេរិកមិនចាត់ទុកណាតូជាអង្គការហួសសម័យដូចលោក ដូណាល់ ត្រាំ ធ្លាប់លើកឡើងទៀតហើយ៕
Tag:
ដូណាល់ ត្រាំ
អាមេរិក
អារ៉ាប៊ីសាអូឌីត
បេនចាមិន ណេតាន់យ៉ាហ៊ូ
Mahmoud Abbas
© រក្សាសិទ្ធិដោយ thmeythmey.com