អន្តរជាតិ
ស្នេហ៍មិនសាបសូន្យ៖ រៀបការជាមួយគ្នា៧១ឆ្នាំ ហើយស្លាប់ខុសគ្នាតែ៤នាទី 07, May 2017 , 8:39 pm
×
លោកតា Wilf Russell អាយុ៩៣ឆ្នាំ និងលោកយាយ Vera Russell អាយុ៩១ឆ្នាំ បានទទួលមរណភាពនៅថ្ងៃតែមួយ ដោយខុសគ្នាតែ៤នាទីប៉ុណ្ណោះ ខណៈពួកគាត់ស្ថិតនៅទីតាំងផ្សេងគ្នា។ គូស្វាមីអង់គ្លេសមួយគូនេះ បានរៀបអាពាហ៍ពិពាហ៍កាលពីថ្ងៃទី៥ ខែកញ្ញា ឆ្នាំ១៩៤៥ ពោលគឺមានរយៈពេល៧១ឆ្នាំ។
ប្រវត្តិស្នេហ៍ដ៏អស្ចារ្យរបស់លោកតា Wilf Russell និងលោកយាយ Vera បានធ្វើឲ្យបណ្តាញព័ត៌មានជាច្រើនចាប់អារម្មណ៍យ៉ាងខ្លាំង។ កាលពីថ្ងៃទី២៩ ខែមីនា កន្លងមក លោកតា Wilf បានទទួលមរណភាពក្នុងអាយុ៩៣ឆ្នាំ នៅមណ្ឌលចាស់ជរាមួយក្នុងក្រុង Leicester នាវេលាម៉ោង ៦ និង៥០នាទីព្រឹក។ មិនយូរប៉ុន្មាន លោកយាយ Vera ដែលជាភរិយា បានទទួលមរណភាពក្នុងអាយុ៩១ឆ្នាំ នាវេលាម៉ោង ៦ និង៥៤នាទីព្រឹក នៅមន្ទីរពេទ្យ ដែលស្ថិតនៅចម្ងាយប្រមាណ ៥គីឡូម៉ែត្រពីគ្នា។
យោងតាមការផ្សាយរបស់ Telegraph លោក Wilf Russell ជាអតីតយុទ្ធជនសម័យសង្គ្រាមលោកលើកទីពីរ ដែលធ្លាប់បម្រើការនៅអ៊ីតាលី និងអាមេរិកខាងជើង ជាមួយកងទ័ពជើងអាកាសអាមេរិក។ គាត់ត្រូវបានមជ្ឈមណ្ឌលចាស់ជរា Magna Care Home នៅតំបន់ Wigston ក្រោយចាប់ផ្តើមកើតជំងឺវង្វេងកាលពីឆ្នាំមុន។
គ្រួសារសាច់ញាតិបានអះអាងថា ស្ថានភាពសុខភាពលោកយាយ Vera ក៏បានចុះដុនដាបផងដែរ បន្ទាប់ពីគាត់បានទៅសួរសុខស្វាមី ហើយស្វាមីដែលរៀបការជាមួយគ្នា៧១ឆ្នាំ មើលគាត់ពុំស្គាល់។ លោកយាយ Vera ត្រូវបញ្ជូនទៅកាន់មន្ទីរពេទ្យកាលពីខែមករា ដោយគាត់បានទទួលមរណភាពដោយមិនដឹងថា ស្វាមីបានទៅមុនខ្លួន៤នាទីមុននោះឡើយ។
បើតាម Telegraph ពួកគាត់បានស្រឡាញ់គ្នាកាលពីអំឡុងអាយុ១៨ឆ្នាំ និង១៦ឆ្នាំ មុននឹងឈានដល់ថ្ងៃរៀបអាពាហ៍ពិពាហ៍កាលពីថ្ងៃទី៥ ខែកញ្ញា ឆ្នាំ១៩៤៥ ។ អ្នកស្រី Stephanie Welch អាយុ៤៤ឆ្នាំ ដែលជាចៅស្រី បានរៀបរាប់ថា ជីដូនជីតារបស់ខ្លួនស្រឡាញ់គ្នាខ្លាំងណាស់ រហូតដល់ពួកគាត់ធ្លាក់ខ្លួនឈឺរៀងៗខ្លួន។
អ្នកស្រីបានបញ្ជាក់ថា ស្ថានភាពជំងឺរបស់ដីដូន បានដុនដាប បន្ទាប់ពីគាត់ស្រងាកចិត្តដែលស្វាមីគាត់មើលគាត់មិនស្គាល់។ នៅក្នុងមន្ទីរពេទ្យ ពេលបើកភ្នែកម្តងៗ លោកយាយ Vera តែងតែដង្ហោយរកស្វាមីជានិច្ច។ ពេលនេះ ពួកគាត់បានទៅជួបគ្នានៅឋានសួគ៌ហើយ៕
© រក្សាសិទ្ធិដោយ thmeythmey.com