អន្តរជាតិ
ស៊ី ជីនភីង ជជែករឿងនុយក្លេអ៊ែរកូរ៉េខាងជើងជាមួយប្រធានាធិបតីថ្មីកូរ៉េខាងត្បូង 11, May 2017 , 2:08 pm
× ប្រធានាធិបតីចិន ស៊ីន ជីនភីង បានទូរសព្ទដោយផ្ទាល់ទៅកាន់សមភាគីកូរ៉េខាងត្បូង មូន ចេអ៊ីន (Moon Jae-in) ដែលទើបចូលកាន់តំណែង។ ក្រៅពីការសាទរលោក មូន ចេអ៊ីន ដែឈ្នះឆ្នោតក្លាយជាប្រធានាធិបតីថ្មីកូរ៉េខាងត្បូង ប្រធានាធិបតីចិន និងដៃគូពិភាក្សាថ្មីរបស់ខ្លួន ក៏បានជជែកលើបញ្ហានុយក្លេអ៊ែរកូរ៉េខាងជើង ដែលជាបញ្ហាក្ដៅ និងបានសន្យាពង្រឹងទំនាក់ទំនងទ្វេភាគីឲ្យកាន់តែប្រសើរ ដែរ។
វិបត្តិនុយក្លេអ៊ែរកូរ៉េខាងជើង ជាប្រធានបទក្ដៅក្នុងកិច្ចសន្ទនាតាមទូរសព្ទរវាងប្រធានាធិបតីចិន ស៊ី ជីនភីង និងប្រធានាធិបតីថ្មីកូរ៉េខាងត្បូង មូន ចេអ៊ីន នៅថ្ងៃទី១១ ខែឧសភា។ មេដឹកនាំប្រទេសក្បែរខាងទាំង២ បានផ្លាស់ប្ដូរយោបល់គ្នាលើបញ្ហាឧបទ្វីបកូរ៉េ ក៏ដូចជាទំនាក់ទំនងទ្វេភាគីដែលកំពុងជូរចត់នារយៈពេលចុងក្រោយផងដែរ។ នេះជាលើកទី១ ដែលមេដឹកនាំចិនទូរសព្ទទៅកាន់មេដឹកនាំកូរ៉េខាងត្បូង ដើម្បីអបអរជ័យជម្នះនៃការបោះឆ្នោត។
បើតាមទូរទស្សន៍រដ្ឋចិន ប្រធានាធិបតី ស៊ី ជីនភីង ក៏បានប្រាប់ជំហររបស់ចិនក្នុងការដោះស្រាយបញ្ហាកូរ៉េខាងជើងតាមផ្លូវចរចា ព្រោះវាជាផ្លូវដែលគ្រប់គ្នាចង់បាន។ លោក ស៊ី ជីនភីង ក៏បានប្រាប់សមភាគីកូរ៉េខាងត្បូងដែរថា ចិននៅតែចង់ឲ្យឧបទ្វីបកូរ៉េក្លាយជាតំបន់គ្មាននុយក្លេអ៊ែរដដែល ហើយចិនមានឆន្ទះក្នុងការពួតដៃគ្នាជាមួយភាគីពាក់ព័ន្ធផ្សេងទៀត រួមទាំងកូរ៉េខាងត្បូងផង ដើម្បីរក្សាសន្តិភាព និងស្ថិរភាពនៅឧបទ្វីបកូរ៉េ។
បន្ថែមពីលើវិបត្តិនុយក្លេអ៊ែរកូរ៉េខាងជើងជាបញ្ហារួមគ្នានោះ ចិន និងកូរ៉េខាងត្បូង ក៏មានបញ្ហាលើការពង្រាយប្រព័ន្ធការពារ THAAD ដែរ។ តាំងពីដើមមក ចិន មិនពេញចិត្តឡើយការពង្រាយប្រព័ន្ធការពារនេះ ហើយតែងប្រាប់ឲ្យកូរ៉េខាងត្បូង និងអាមេរិកបញ្ឈប់ការពង្រាយទៀតផង។ ក្នុងការសន្ទនាជាមួយលោក មូន ចេអ៊ីន ប្រធានាធិបតីចិននិយាយបែបបញ្ឆិតបញ្ឆៀងបញ្ហានេះថា ចិន និងកូរ៉េខាងត្បូង គួរដោះស្រាយជម្លោះដែលកើតឡើងឲ្យបានសមស្រប។
ក្រៅពីបញ្ហាកូរ៉េខាងជើង មេដឹកនាំទាំង២ ក៏ឆ្លៀតលើកឡើងបញ្ហាទ្វេភាគីមួយចំនួន និងបានបង្ហាញបំណងជួបគ្នាឆាប់ៗទៀតផង។ បើតាមទីភ្នាក់ងារព័ត៌មាន Yonhap មន្ត្រីកូរ៉េខាងត្បូងនិយាយថា ប្រធានាធិបតីចិន ស៊ី ជីនភីង បានអញ្ជើញលោក មូន ចេអ៊ីន ទស្សនកិច្ចផ្លូវរដ្ឋនៅចិន ខណៈលោក មូន វិញ ក៏ចង់ជួបលោក ស៊ី នៅពេលខ្លីខាងមុខដែរ សំដៅពង្រឹងទំនាក់ទំនងឲ្យកាន់តែល្អទៅមុខ។
ចិន ទំនងជាសប្បាយចិត្តខ្លាំងពេលឃើញលោក មូន ចេអ៊ីន ឈ្នះឆ្នោត។ ម្យ៉ាងក៏ព្រោះប្រធានាធិបតីថ្មីរូបនេះ មានជំហរទន់ភ្លន់ក្នុងការដោះស្រាយបញ្ហាឧបទ្វីបកូរ៉េ ដល់ថ្នាក់ចង់ទៅកូរ៉េខាងជើងដើម្បីដោះស្រាយបញ្ហាទៅទៀត។ ម្យ៉ាងទៀតក៏ដោយសារប្រធានាធិបតីសេរីនិយមនេះ ក៏មានជំហរចង់ចរចាឡើងវិញលើការពង្រាយប្រព័ន្ធការពារ THAAD ដែលចិនមិនចូលចិត្តផង។ ទំនងដោយសារហេតុផលនេះ បានជាចិនប្រឹងរូតរះមកចាប់ដៃកូរ៉េខាងត្បូងដើម្បីរកច្រកចេញនោះ៕
Tag:
ចិន
កូរ៉េខាងត្បូង
កូរ៉េខាងជើង
ស៊ី ជីនភីង
មូន ចេអ៊ីន
© រក្សាសិទ្ធិដោយ thmeythmey.com