អន្តរជាតិ
ក្រោយគ្រូៗប្តឹងថា កូនពូកែឡូឡា ឪពុកទៅអង្គុយក្នុងថ្នាក់ដើម្បីតាមដានកូនខ្លួន 12, May 2017 , 8:19 am
× ឪពុករបស់សិស្សកម្រិតវិទ្យាល័យម្នាក់ បានចំណាយពេលអង្គុយក្នុងថ្នាក់រៀនជាមួយកូន ដើម្បីឲ្យរក្សាភាពស្ងៀមស្ងាប់ ជៀសវាងការនិយាយច្រើនឥតប្រយោជន៍។ នេះបើតាមការផ្សាយរបស់សារព័ត៌មាន BuzzFeed News។
សិស្សឈ្មោះ Bradley Howard អាយុ១៧ឆ្នាំ ដែលរៀននៅវិទ្យាល័យមួយក្នុងរដ្ឋតិចសាស សហរដ្ឋអាមេរិក ត្រូវបានខាងសាលារាយការណ៍ទៅអាណាព្យាបាលថា រូបគេជាសិស្សដែលចូលចិត្តនិយាយឡូឡាច្រើននៅម៉ោងសិក្សាថ្នាក់រូបវិទ្យា។ ឪពុក Bradley បានរៀបរាប់ថា៖ «ខ្ញុំសម្រេចចិត្តទៅអង្គុយជាមួយ Bradley នៅក្នុងថ្នាក់រៀន ដោយសារតែគេចូលចិត្តបង្កបញ្ហានៅក្នុងថ្នាក់ ជាពិសេសនិយាយច្រើន»។
ឪពុកម្នាក់នេះ បានអះអាងថា បណ្តឹងជាច្រើនពីសំណាក់គ្រូបង្រៀន ត្រូវបានផ្ញើទៅដល់ផ្ទះរបស់លោក ដោយគ្រូទាំងនោះ ពោលគ្រូដែលបង្រៀនម៉ោងរូបវិទ្យា សុទ្ធតែត្អូញត្អែរទាក់ទងនឹងអាកប្បកិរិយាមិនល្អរបស់ Bradley។ លោករៀបរាប់ប្រាប់ BuzzFeed News ថា៖ «ខ្ញុំពិតជាមានការពិបាកដែលអង្គុយក្នុងថ្នាក់រៀនជាមួយក្មេងៗជំទង់។ ខ្ញុំមិនដែលបានត្រៀមខ្លួនសម្រាប់ស្ថានភាពបែបនេះឡើយ»។
លោកបានអះអាងថា មិត្តភក្តិមួយចំនួន សង្កេតឃើញថា Bradley ហាក់ដូចជាមានការប្រែច្រើន បើទោះបីជារូបគេមានការតប់ប្រម៉ល់ជាមួយនឹងវត្តមានរបស់ឪពុកក៏ដោយ។ សម្រាប់បុរសដែលជាឪពុក នេះជាលើកដំបូង និងជាលើកចុងក្រោយផងដែរ ហើយលោកសង្ឃឹមថា កូនប្រុសខ្លួននឹងក្លាយជាសិស្សល្អ៕
© រក្សាសិទ្ធិដោយ thmeythmey.com