អន្តរជាតិ
ក្រុមប្រទេស ៧ ដាក់សម្ពាធឲ្យ ត្រាំ គិតគូរដោះស្រាយរឿងប្រែប្រួលអាកាសធាតុ 12, May 2017 , 9:26 am
× ប្រធានាធិបតីអាមេរិកលោក ដូណាល់ ត្រាំ នឹងអញ្ជើញចូលរួមក្នុងកិច្ចប្រជុំមេដឹកនាំប្រទេស ៧នៅប្រទេសអ៊ីតាលីចុងខែឧសភាខាងមុខ។ លោកនឹងប្រឈមការដាក់សម្ពាធពីបណ្តាប្រទេស៦ផ្សេងទៀតពាក់ព័ន្ធការបន្តគាំទ្រកិច្ចព្រមព្រៀងអាកាសធាតុក្រុងប៉ារីស។ បច្ចុប្បន្ននេះ ត្រាំ កំពុងពិចារណាសិនថា លោកគួរនាំអាមេរិកចេញពីកិច្ចព្រមព្រៀងឬអត់។
ប្រធានាធិបតីអាមេរិកលោក ដូណាល់ ត្រាំ មិនជឿជាក់ថា ការប្រែប្រួលអាកាសធាតុជារឿងពិតឡើយ ឬប្រហែលជាលោកមានទំនាក់ទំនងស្និទ្ធស្នាលហើយជាមួយម្ចាស់រោងចក្រឧស្សាហកម្មធំៗទើបបានជាលោកយល់ឃើញបែបនេះ។
មុនជាប់ឆ្នោតលោកសន្យាឈប់គាំទ្រកិច្ចព្រមព្រៀងអាកាសធាតុក្រុងប៉ារីស ប៉ុន្តែបច្ចុប្បន្នលោកកំពុងពិចារណាសិនថាតើលោកត្រូវបញ្ចប់សមាជិកភាពអាមេរិកក្នុងកិច្ចព្រមព្រៀងអាកាសធាតុនេះឬអត់។ បើយោតាមសារព័ត៌មាន AFP លោក ត្រាំពន្យារពេលសម្រេចចិត្តពាក់ព័ន្ធបញ្ហានេះសិនទោះបីជាលោកត្រូវសម្រេចចិត្តសប្តាហ៍នេះក៏ដោយ។
ប៉ុន្តែវាមិនមែនជារឿងងាយស្រួលឡើយសម្រាប់លោក ត្រាំ ព្រោះលោកនឹងត្រូវប្រឈមសម្ពាធពីបណ្តាក្រុមប្រទេស៧ ពាក់ព័ន្ធបញ្ហានេះ។ នាកិច្ចប្រជុំនៅចុងខែឧសភាខាងមុខនៅអ៊ីតាលី វាច្បាស់ណាស់ថា មេដឹកនាំរដ្ឋសមាជិក ៦ផ្សេងទៀតនឹងលើកយកបញ្ហានេះដាក់លើតុ និងទទូចឲ្យលោក ត្រាំ បន្តជួយដោះស្រាយបញ្ហាប្រែប្រួលអាកាសធាតុសកលនេះ។
ដោយឡែក អ្នកនាំពាក្យសេតវិមានលោក Sean Spicer បានលើកឡើងថា ពន្យារពេលសម្រេចចិត្តនេះរហូតដល់ពេលដែលលោកត្រឡប់ពីចូលរួមកិច្ចប្រជុំវិញ។ វាជាយុទ្ធសាស្ត្រមួយដែរក្នុងការទុកពេលវេលាដើម្បីជជែកពិភាក្សាជាមួយទីប្រឹក្សាសិនទម្រាំលោកសម្រេចចិត្តចុងក្រោយដើម្បីរក្សាប្រយោជន៍ល្អបំផុតសម្រាប់សហរដ្ឋអាមេរិក។
ពាក់ព័ន្ធការពន្យារពេលនេះដែរ វានឹងអាចផ្តល់ឱកាសឲ្យក្រុមប្រទេស ៧ ដែលសុទ្ធសឹងតែជារដ្ឋគាំទ្រកិច្ចព្រមព្រៀងក្រុងប៉ារីស ជួបជជែកពិភាក្សាជាមួយលោក ដូណាល់ ត្រាំ ផ្ទាល់មាត់។ ពួកប្រទេសមហាអំណាចសមាជិកក្រុមប្រទេស៧នេះគាំទ្រកិច្ចព្រមព្រៀងអាកាសធាតុនេះ ដោយពួកគេមានគោលដៅជំរុញការឈប់ប្រើប្រាស់ឥន្ធនៈហ្វូស៊ីលទៅប្រើប្រាស់ថាមពលកកើតឡើងវិញ ដើម្បីធ្វើយ៉ាងណាកាត់បន្ថយគ្រោះថ្នាក់ដែលបង្កឡើងដោយការប្រែប្រួលអាកាសធាតុ។
មន្ត្រីបារាំងម្នាក់ដែលមិនបានបង្ហាញអត្តសញ្ញាណបានលើកឡើងថា៖«ការសម្រេចចិត្តពន្យារពេលដោយសេតវិមាននេះជាឱកាសដើម្បីពិភាក្សាពីបញ្ហាទាំងអស់ឲ្យបានស៊ីជម្រៅ។ វេទិកាកិច្ចប្រជុំប្រទេស ៧ជាកន្លែងដែលល្អបំផុតសម្រាប់ការពិភាក្សានេះព្រោះវាជាវេទិកាមិនផ្លូវការដែលគេអាចនិយាយពីបញ្ហាធំៗរបស់ពិភពលោកបានច្រើន ហើយការពិភាក្សានេះជារឿងអាទិភាព»។
តាមពិតទៅ សូម្បីតែប្រធានាធិបតីបារាំងទើបជាប់ឆ្នោតលោក អេម៉ានុយអែល ម៉ាក្រុង ក៏បានផ្ញើសារទៅរដ្ឋាភិបាលក្រុងវ៉ាស៊ីនតោនរួចរាល់ហើយថា បារាំងមិនបោះបង់ការប្រឹងប្រែងដោះស្រាយបញ្ហាប្រែប្រួលអាកាសធាតុឡើយ។ បារាំងស្វាគមន៍និងបើទ្វារទទួលរាល់អ្នកវិទ្យាសាស្ត្រនិងអ្នកជំនាញអាមេរិកដែលជឿជាក់លើបញ្ហាប្រឈមនៃការប្រែប្រួលអាកាសធាតុនិងចង់ដោះស្រាយបញ្ហាប្រឈមនេះផងដែរ៕
Tag:
ដូណាល់ ត្រាំ
អាកាសធាតុ
© រក្សាសិទ្ធិដោយ thmeythmey.com