អន្តរជាតិ
កូរ៉េខាងជើងបាញ់មីស៊ីលទៀត ធ្វើឲ្យប្រធានាធិបតីកូរ៉េខាងត្បូងថ្មីក្រពុលមុខខ្លាំង 14, May 2017 , 11:02 am
× ថ្ងៃអាទិត្យនេះ កូរ៉េខាងជើងបានបាញ់សាកល្បងមីស៊ីលរបស់ខ្លួនជាថ្មីទៀត ដើម្បីផ្គើនសហគមន៍អន្តរជាតិជាពិសេសអាមេរិកដែលទាមទារឲ្យមានការបន្ថែមទណ្ឌកម្មប្រឆាំងខ្លួន។ ការបាញ់សាកល្បងមីស៊ីលនេះក៏នឹងក្លាយជាវិញ្ញសារថ្មីសម្រាប់ប្រធានាធិបតីកូរ៉េខាងត្បូងដែលមានជំហរទន់ភ្លន់ជាមួយកូរ៉េខាងជើងស្បថចូលកាន់តំណែងប៉ុន្មានថ្ងៃមុនដែរ។ ប្រធានាធិបតីថ្មីទំនងជាក្រពុលមុខ និងសោកស្តាយខ្លាំងដែរចំពោះឥរិយាបថកូរ៉េខាងជើងនេះ។
កុំឲ្យស្ងៀមស្ងាត់យូរ ក្រុងព្យុងយ៉ាងបានសម្រេចបាញ់សាកល្បងមីស៊ីលជាថ្មីទៀតនៅព្រឹកថ្ងៃអាទិត្យទី ១៤ ខែឧសភានេះ ។ ការបាញ់មីស៊ីលជាថ្មីនេះកើតឡើងបន្ទាប់ពីក្រុងវ៉ាស៊ីនតោនអំពាវនាវឲ្យមានការដាក់ទណ្ឌកម្មបន្ថែមប្រឆាំងរបបដឹកនាំឯកោមួយនេះ ដើម្បីជំរុញឲ្យមានការចរចានិងបញ្ឈប់សកម្មភាពបង្ករឿងផង។
យោងតាមទីភ្នាក់ងារព័ត៌មាន AFP ដែលស្រង់សម្តីមន្ត្រីកូរ៉េខាងត្បូង មីស៊ីលនេះបាញ់ចេញពីទីក្រុង Kusong ហើយវាហោះបានចម្ងាយ ៦៩០ គីឡូម៉ែត្រ មុនពេលធ្លាក់ចូលក្នុងសមុទ្រកូរ៉េខាងជើងនិងសមុទ្រជប៉ុន។បច្ចុប្បនេះរបាយការណ៍ពាក់ព័ន្ធការបាញ់សាកល្បងនេះស្ថិតនៅក្រោមការវិភាគរបស់កូរ៉េខាងត្បូងនៅឡើយ ហើយគេព្យាយាមកំណត់ប្រភេទមីស៊ីលដែលត្រូវបានបាញ់នេះ។
មុនបាញ់សាកល្បងអាវុធនេះ សេតវិមានបានចេញសេចក្តីថ្លែងការណ៍មួយដោយអំពាវនាវឲ្យមានការដាក់ទណ្ឌកម្មបន្ថែមទៀតប្រឆាំងកូរ៉េខាងជើង ហើយក៏ភ្ជាប់រឿងនេះជាមួយរុស្ស៊ីផង។ អាមេរិកលើកឡើងថា ការបាញ់សាកល្បងមីស៊ីលរបស់កូរ៉េខាងជើងប៉ះពាល់រុស្ស៊ីជាងប៉ះពាល់ជប៉ុនផង ហើយអាមេរិកដាក់ចម្ងល់ថា ហេតុអ្វីរុស្ស៊ីនៅតែមិនខ្វាយខ្វល់ទៀត។
តាមពិតទៅ នេះជាការបាញ់សាកល្បងមីស៊ីលលើកដំបូង បន្ទាប់ពីការបាញ់ចុងក្រោយថ្ងៃ ២៩ មេសាកន្លងទៅ ដោយបរាជ័យ ព្រោះមីស៊ីលនោះផ្ទុះភ្លាមក្រោយបាញ់ចេញ។ ដូច្នេះហើយបានជាមានការទទូចសុំជាបន្តបន្ទាប់ឲ្យមានការពង្រឹងការអនុវត្តដំណោះស្រាយក្រុមប្រឹក្សាសន្តិសុខអង្គការសហប្រជាជាតិនិងដាក់សម្ពាធកូរ៉េខាងជើងឲ្យកាន់តែខ្លាំងដើម្បីបង្ខំឲ្យប្រទេសនេះបញ្ឈប់ការបាញ់សាកល្បងអាវុធទៀត។
ស្របពេលដែលមានចលនាទាមទារឲ្យដាក់ទណ្ឌកម្មបន្ថែម បេសកជនពិសេសកូរ៉េខាងជើងប្រចាំអង្គការសហប្រជាជាតិបានចេញមុខប្រាប់ឲ្យសមាជិកអង្គការសហប្រជាជាតិ ទាំងឡាយគិតម្ដងទៀតលើការដាក់ទណ្ឌកម្មខ្លួន។ តំណាងកូរ៉េខាងជើង ថែមទាំងចោទថា អាមេរិកបានបង្ខំប្រទេសដទៃទៀតឲ្យដាក់ទណ្ឌកម្មលើខ្លួន ដោយគំរាមដាក់ទណ្ឌកម្មលើប្រទេសទាំងនោះ បើពួកគេមិនដាក់សម្ពាធលើកូរ៉េខាងជើងទេនោះ។
កូរ៉េខាងជើងបាញ់មីស៊ីលធ្វើឲ្យប្រធានាធិបតីកូរ៉េខាងត្បូងថ្មីក្រពុលមុខ
គេមិនភ្លេចឡើយថា កូរ៉េខាងជើងប្រហែលជាមានចេតនាផ្សេងទៀត ក្រៅពីផ្គើនសហគមន៍អន្តរជាតិដោយបាញ់មីស៊ីលជាថ្មី។ គោលដៅរបស់របបក្រុងព្យុងយ៉ាងប្រហែលជាប្រធានាធិបតីដែលមាននិន្នការទន់ភ្លន់ចង់ចរចាជាមួយកូរ៉េខាងជើង ដែលទើបស្បថចូលកាន់តំណែងប៉ុន្មានថ្ងៃមុនលោក មូន ចេអ៊ីន (Moon Jae-in) ។
លោក មូន ចេអ៊ីន ជាប់ឆ្នោតថ្ងៃ ៩ ឧសភា ហើយលោកបានស្បថចូលកាន់តំណែងភ្លាមៗនៅថ្ងៃ ១០ មួយថ្ងៃបន្ទាប់។ លោកជឿជាក់លើនយោបាយការទូត ហើយលោកចង់ប្រើភាពទន់ភ្លន់បង្កើតទំនាក់ទំនងជិតស្និទ្ធជាមួយកូរ៉េខាងជើងដើម្បីដោះស្រាយវិបត្តិផង។ អ្វីដែលគួរឲ្យកត់សម្គាល់ នៅថ្ងៃស្បថចូលកាន់តំណែង លោកបង្ហាញបំណងចង់ទៅកូរ៉េខាងជើងដើម្បីជួបមេដឹកនាំកូរ៉េខាងជើងថែមទៀតផង បើចាំបាច់។
ក្រោយការបាញ់សាកល្បងមីស៊ីល ប្រធានាធិបតីថ្មីរូបនេះបាបញ្ជាឲ្យមានកិច្ចប្រជុំបន្ទាន់មួយក្នុងចំណោមមន្ត្រីសន្តិសុខជាន់ខ្ពស់ ហើយលោកបានថ្កោលទោសការបាញ់សាកល្បងមីស៊ីលនេះផង។ លោកបញ្ជាក់ច្បាស់ថា វាជាការរំលោភដំណោះស្រាយក្រុមប្រឹក្សាសន្តិសុខ ហើយលោកក៏បញ្ជាឲ្យរាល់យោធាកូរ៉េខាងត្បូងត្រៀមប្រុងជើងការទប់ទល់រាល់ការគំរាមកំហែងនានាដែរ។
អ្វីដែលគួរឲ្យកត់សម្គាល់លោក មូន ចេអ៊ីន បានលើកឡើងថា លោកសោកស្តាយខ្លាំងចំពោះសកម្មភាពនេះ ព្រោះលោកទើបតែអំពាវនាវឲ្យមានការចាប់ផ្តើមសន្ទនាឡើងវិញជាមួយកូរ៉េខាងជើង។
«យើងរក្សាទ្វារចំហរសម្រាប់ការសន្ទនាគ្នាជាមួយកូរ៉េខាងជើង ប៉ុន្តែយើងត្រូវប្រឆាំងរាល់សកម្មភាពបង្ករឿងរបស់កូរ៉េខាងជើងយ៉ាងដាច់ណាត់បំផុត។ យើងត្រូវបង្ហាញឲ្យឃើញថា ការសន្ទនាអាចកើតឡើងបានដរាបណាកូរ៉េខាងជើងប្តូរឥរិយាបថរបស់ខ្លួន»។
ក្រៅពីនេះលោកក៏បានជំរុញឲ្យទាហានរបស់ខ្លួនប្រញាប់ពន្លឿនការងារអភិវឌ្ឍប្រព័ន្ធការពារមីសីលក្នុងស្រុករបស់ខ្លួនដែលអាចការពារមីស៊ីលបាលីស្ទិកបានផងដែរ៕
Tag:
កូរ៉េខាងជើង
មូន ចេអ៊ីន
កូរ៉េខាងត្បូង
© រក្សាសិទ្ធិដោយ thmeythmey.com