អន្តរជាតិ
បារាំង៖ សិស្សសាលាប៉ូលិសម្នាក់រងពិន័យដោយសារផ្សាយវីដេអូមួយរបស់ក្រុម ISIS 24, May 2017 , 8:39 am
× សិស្សម្នាក់ដែលរៀននៅសាលាប៉ូលិសក្នុងទីក្រុង Nimes ប្រទេសបារាំង ត្រូវបានព្យួរការសិក្សា បន្ទាប់ពីរូបគេបានផ្សព្វផ្សាយវីដេអូមួយរបស់ក្រុមភេវរកម្ម ISIS នៅក្នុងសាលារបស់ខ្លួន។ ក្រោយការឃ្លាំមើលយ៉ាងយកចិត្តទុកដាក់ នាយកសាលាបានអះអាងថា សិស្សរូបនោះ មិនមានការជាប់ពាក់ព័ន្ធអ្វីនោះឡើយជាមួយក្រុមភេរវជន។
សាលាហ្វឹកហ្វឺនប៉ូលិសនៅទីក្រុង Nimes ប្រទេសបារាំង បានសម្រេចព្យួរសិស្សម្នាក់ពីការសិក្សា និងដាក់ក្រោមការត្រួតពិនិត្យរបស់ក្រុមប្រឹក្សាវិន័យនៅទីក្រុងប៉ារីស យ៉ាងហោចណាស់រយៈពេល១ខែ។ បើតាមការផ្សាយរបស់សារព័ត៌មានតំបន់ France Bleu Gard Lozere សិស្សរូបនោះ បានផ្សព្វផ្សាយវីដេអូមួយរបស់ក្រុមភេរវកម្ម ISIS នៅក្នុងសាលា កាលពីថ្ងៃទី២០ ខែឧសភា កន្លងមក។
សិស្សប៉ូលិសដែលមានវ័យប្រមាណ៣០ឆ្នាំ បានយកវីដេអូនៅក្នុងទូរសព្ទដៃរបស់ខ្លួនទៅបង្ហាញមិត្តរួមថ្នាក់ និងមិត្តរួមសាលាហ្វឹកហ្វឺនទាំងមូល។ ថ្នាក់ដឹកនាំសាលាបានធ្វើការហាមឃាត់ និងសួរនាំភ្លាមៗ មុននឹងឈានដល់ការសម្រេចចិត្តព្យួរការសិក្សារបស់សិស្សនោះ។
លោក Gil Andreau នាយកសាលាប៉ូលិស Nimes បានអះអាងថា ក្រោយការស៊ើបអង្កេតរួមគ្នារវាងប៉ូលិសជំនាញ ប៉ូលិសយុត្តិធម៌ និងថ្នាក់ដឹកនាំសាលា គេរកមិនឃើញទំនាក់ទំនងណាមួយឡើយរវាងសិស្សដែលមានបញ្ហា ជាមួយបណ្តាញភេរវកម្ម។
សាលារង់ចាំមើលការសម្រេចរបស់ក្រុមប្រឹក្សាវិន័យថាតើសិស្សរូបនោះ អាចរៀនបន្តទៀត ឬយ៉ាងណា។ បើតាមលោក Gil Andreau នេះជាការសម្រេចដ៏លឿនបំផុតមួយ ហើយវាក៏ជាឧទាហរណ៍មួយផងដែរសម្រាប់សិស្សដែលអនុវត្តច្បាប់ តែបែរជាចែកចាយវីដេអូពីសកម្មភាពព្រៃផ្សៃ៕
© រក្សាសិទ្ធិដោយ thmeythmey.com