អន្តរជាតិ
ស្វ៊ីសត្រៀមខ្លួនរួចស្រេចដើម្បីសម្របសម្រួលវិបត្តិឧបទ្វីបកូរ៉េ 05, Sep 2017 , 1:47 pm
ប្រធានាធិបតីស្វ៊ីស Doris Leuthard (រូបភាព Reuters)
× ប្រធានាធិបតីស្វ៊ីស លោកស្រី Doris Leuthard នៅថ្ងៃទី៤ ខែកញ្ញា បាននិយាយថា ប្រទេសលោកស្រីត្រៀមខ្លួនរួចហើយដើម្បីដើរតួជាអ្នកសម្របសម្រួលបញ្ហានុយក្លេអ៊ែរកូរ៉េខាងជើង ដែលកំពុងកើនកម្ដៅខ្លាំង។ លោកស្រីប្រធានាធិបតីនិយាយទៀតថា ស្វ៊ីសជាប្រទេសអព្យាក្រឹតដែលគេឯងទទួលស្គាល់ ដូចនេះស្វ៊ីសអាចជាកន្លែងសក្តិសមសម្រាប់កិច្ចប្រជុំរដ្ឋមន្ត្រីរវាងអាមេរិក និងកូរ៉េខាងជើងដើម្បីបញ្ចប់បញ្ហារ៉ាំរ៉ៃមួយនេះ។
ការសាកល្បងគ្រាប់បែកអ៊ីដ្រូសែនពីសំណាក់កូរ៉េខាងជើងនៅចុងសប្ដាហ៍មុន ធ្វើឲ្យស្ថានការណ៍នៅឧបទ្វីបកូរ៉េកាន់តែឡើងកម្ដៅខ្លាំង។ អាមេរិកព្រមានចាត់វិធានការណ៍យោធាប្រឆាំងកូរ៉េខាងជើង ព្រមគ្នានឹងការរិះរកទណ្ឌកម្មថ្មីបន្ថែមទៀតដើម្បីដាក់បន្ទុកលើកូរ៉េខាងជើង។ ឯការចរចាវិញហាក់គ្មានពន្លឺអ្វីសោះ ដោយសារភាគីទាំងសងខាងសុទ្ធតែគ្មានជំហរជាក់លាក់ក្នុងការពិភាក្សា ទោះជាមានការអំពាវនាវឲ្យមានការចរចាក្ដី។
ខណៈស្ថានភាពកាន់តែអាប់អួរ រដ្ឋអឺរ៉ុបស្វ៊ីស បានចេញមុខមកដើរតួជាអ្នកសម្របសម្រួលរវាងភាគីជម្លោះទាំងអស់ ដោយប្រធានាធិបតីស្វ៊ីស Doris Leuthard ប្រកាសថា ស្វ៊ីសអាចផ្ដល់កន្លែងសម្រាប់ការចរចាថ្នាក់រដ្ឋមន្ត្រីការបរទេសបាន។ ក្នុងសន្និសីទកាសែតថ្ងៃទី៤ ខែកញ្ញា លោកស្រី Leuthard និយាយថា ស្វ៊ីសត្រៀមខ្លួនដើម្បីសម្របសម្រួលជម្លោះ ព្រោះខ្លួនជាប្រទេសអព្យាក្រឹតតាំងពីដើមមក តែមហាអំណាចធំៗដូចជាចិន និងអាមេរិក ក៏ត្រូវរួមចំណែកដែរ។
ទីភ្នាក់ងារព័ត៌មាន Reuters ផ្សាយថា ប្រធានាធិបតីស្វ៊ីសរូបនេះក៏ឆ្លៀតរិះគន់ទណ្ឌកម្មលើកូរ៉េខាងជើង ដែលសំដៅបញ្ឈប់កម្មវិធីនុយក្លេអ៊ែររបស់រដ្ឋកុម្មុយនីស្តមួយនេះ ប៉ុន្តែប្រជាជនឯណោះទេដែលជាអ្នករងគ្រោះនោះ។ លោកស្រី Leuthard បន្ថែមថា ពេលវេលាចរចាគួរតែមកដល់ហើយ ហើយស្វ៊ីសត្រៀមខ្លួនរួចស្រេចដើម្បីរួមចំណែកក្នុងកិច្ចការនេះ ទោះជាអាមេរិក និងចិនជាអ្នកមានឥទ្ធិពលលើបញ្ហានេះក៏ដោយចុះ។
ជាការពិត ស្វ៊ីសត្រូវបានគេទទួលស្គាល់ជាប្រទេសដែលមាននយោបាយការបរទេសកណ្ដាល មិនលម្អៀង។ គឺប្រទេសស្វ៊ីសនេះហើយដែលមេដឹកនាំកំពូលកូរ៉េខាងជើង គីម ជុងអ៊ុន បានចំណាយពេលកាលពីកុមារដើម្បីទទួលការអប់រំ។ រដ្ឋអឺរ៉ុបនេះក៏ធ្លាប់ធ្វើជាម្ចាស់ផ្ទះការចរចារវាងអាមេរិក និងកូរ៉េខាងជើង រហូតឈានដល់ការសម្រេចបានកិច្ចព្រមព្រៀងមួយក្នុងឆ្នាំ១៩៩៤ ដែលកូរ៉េខាងជើងផ្អាកការសាងសង់រ៉េអាក់ទ័រនុយក្លេអ៊ែរ ជាថ្នូរនឹងការផ្ដល់រ៉េអាក់ទ័រធុនស្រាលវិញ។
ក្រោយការសាកល្បងគ្រាប់បែកចុងក្រោយនេះ អាមេរិកចង់ដាក់ទណ្ឌកម្មបន្ថែមទៀតលើកូរ៉េខាងជើង ខណៈដែលចិន និងរុស្ស៊ីនៅតែស្នើឲ្យមានការបញ្ចប់បញ្ហាដោយសន្តិវិធី។ អាមេរិកអះអាងហើយថា ខ្លួនអស់ការអត់ធ្មត់នឹងកូរ៉េខាងជើង ហើយការចរចារយៈពេលកន្លងមកក៏មិនបានហុចផលអ្វីដែរ។ ឯចិនវិញ ក៏ប្រកាសដែរថា ការចរចានៅតែជារឿងអាទិភាព ហើយខ្លួននឹងមិនអនុញ្ញាតឲ្យមានសង្គ្រាមក្បែរខ្លួនទេ៕
Tag:
ស្វ៊ីស
កូរ៉េខាងជើង
អាមេរិក
© រក្សាសិទ្ធិដោយ thmeythmey.com