អន្តរជាតិ
ប៉ូលិសអាហ្សង់ទីនបាញ់សម្លាប់ព្រាប១ក្បាលដែលនាំគ្រឿងញៀនចូលពន្ធនាគារ 05, Sep 2017 , 8:39 pm
× សត្វព្រាបមួយក្បាលត្រូវបានបាញ់សម្លាប់កាលពីពេលថ្មីៗកន្លងមកនេះ បន្ទាប់ពីប៉ូលិសអាហ្សង់ទីន ពិនិត្យឃើញថា វាបាននាំគ្រឿងញៀនចូលទៅក្នុងពន្ធនាគារមួយក្នុងខេត្ត Pampa ចំកណ្តាលនៃប្រទេសអាហ្សង់ទីន។ នេះបើតាមការសផ្សាយរបស់សារព័ត៌មាន Clarin.com ។
ក្នុងដំណើរឆ្ពោះទៅកាន់មន្ទីរឃុំឃាំង Santa Rosa ក្នុងខេត្ត Pampa សត្វព្រាបដែលអ្នកកាសែតអាហ្សង់ទីនដាក់ឈ្មោះថា «ព្រាបថ្នាំញៀន» (Narcopigeon) បានរងការបាញ់ប្រហារពីប៉ូលិស រហូតដល់ងាប់។ របាយការណ៍បានបង្ហាញថា ព្រាបនោះ បានហើរនាំយកកញ្ឆា ៧.៥ក្រាម ថ្នាំ Rivrotril និង Clonazepam ៤៤គ្រាប់ រួមទាំង USB មួយ។
ប៉ូលិសដែលប្រចាំការនៅពន្ធនាគារ បានអះអាងថា ពួកគេធ្វើការកត់សម្គាល់ បន្ទាប់ពីឃើញសត្វហើរឆ្លងកាត់អគារអស់ជាច្រើនថ្ងៃ។ ឆ្លងកាត់ការស៊ើបអង្កេត គេបានរកឃើញថា សត្វព្រាបនោះ ទទួលបានការហ្វឹកហាត់យ៉ាងត្រឹមត្រូវ ដោយវាអាចធ្វើដំណើរបាន១៥លើកក្នុង១ថ្ងៃ។
ជាមួយគ្នានេះ ប៉ូលិសបានរកឃើញអ្នកទោសសង្ស័យ៣នាក់ ហើយចាប់បានសត្វព្រាប១៥ក្បាលផ្សេងទៀត ដែលជាប់ពាក់ព័ន្ធនឹងការនាំយកគ្រឿងញៀនចូលពន្ធនាគារ។
ករណីបែបនេះ ធ្លាប់បានកើតឡើងកាលពីឆ្នាំ២០១៣ម្តងរួចហើយ ដោយវាជាការរៀបចំរបស់ក្រុមជើងកាងដែលជាប់ពន្ធនាគារ។ ព្រាបនាំគ្រឿងញៀនចូលពន្ធនាគារក៏ធ្លាប់បានអនុវត្តនៅក្រុង Buenos Aires និងពន្ធនាគារនៅក្នុងប្រទេសគូវែតផងដែរ៕
© រក្សាសិទ្ធិដោយ thmeythmey.com