អន្តរជាតិ
Malala ទទូចឲ្យលោកស្រី ស៊ូជី ថ្កោលទោសអំពើហិង្សាប្រឆាំងជនជាតិរ៉ូហ៊ីយ៉ា 05, Sep 2017 , 5:13 pm
× ម្ចាស់ពានរង្វាន់ណូបែលសន្តិភាពវ័យក្មេងជាងគេ Malala Yousafzai បានទទូចឲ្យមដឹកនាំកំពូលមីយ៉ាន់ម៉ា លោកស្រី អ៊ុងសាន ស៊ូជី ដែលជាម្ចាស់រង្វាន់ណូបែលសន្តិភាពដូចគ្នានោះ ចូលរួមចេញថ្លែងការណ៍ថ្កោលទោសប្រឆាំងហិង្សាលើជនជាតិភាគតិចរ៉ូហ៊ីងយ៉ា ។ Malala បានផ្ញើសារទៅកាន់លោកស្រី ស៊ូជី ថា ពិភពលោក កំពុងតែរង់ចាំ ការបង្ហាញជំហររបស់លោកស្រីលើវិបត្តិ រ៉ូហ៊ីងយ៉ា ។
បើយោងតាមការចុះផ្សាយរបស់សារព័ត៌មាន មីយ៉ាន់ម៉ា Irrawaddy នៅថ្ងៃទី០៤ កញ្ញា មកទល់ពេលនេះ មានជនជាតិភាគតិចឥស្លាមរ៉ូហ៊ីងយ៉ាប្រមាណ ប្រាំបួនម៉ឺននាក់ហើយ បានភៀសខ្លួនចេញពីមីយ៉ាន់ម៉ា ទៅកាន់បង់ក្លាដែស ដោយសារតែការប៉ះទង្គិចគ្នាប្រដាប់អាវុធរវាងកងកម្លាំងរដ្ឋាភិបាលមីយ៉ា់ន់ម៉ា និងក្រុមសកម្មប្រយុទ្ធ ។
ស្ថាប័នអន្តរជាតិ ជាពិសេសពិសេសអង្គការសិទ្ធិមនុស្ស បានចេញសេចក្តីថ្លែងការណ៍ព្រួយបារម្ភ និងថ្កោលទោសហិង្សានេះជាបន្តបន្ទាប់ និងថែមទាំងបានទទូចឲ្យរដ្ឋាភិបាលមីយ៉ាន់ម៉ា ដែលកំពុងតែដឹកនាំដោយលោកស្រី អ៊ុងសាន ស៊ូជី ចាត់វិធានដើម្បីជួយសង្គ្រោះជនរងគ្រោះ និងបញ្ឈប់ហិង្សា ។
ម្ចាស់ពានរង្វាន់ណូប៊ែលសន្តិភាពវ័យក្មេងជាងគេ ក៏បានចូលរួមចេញសេចក្តីថ្លែងជុំវិញវិបត្តិរ៉ូហ៊ីងយ៉ាផងដែរ ។ Malala Yousafzai បានសរសេរនៅក្នុងគណនី Twitter យ៉ាងដូច្នេះថា៖«រយៈពេលប៉ុន្មានឆ្នាំចុងក្រោយនេះ ខ្ញុំ តែងតែថ្លែងការណ៍ថ្កោលទោសម្តងហើយម្តងទៀតលើសោកនាដកម្ម និងការគាំពារដ៏គួរឲ្យខ្មាសនេះ(បញ្ហារ៉ូហ៊ីងយ៉ា)។ ហើយខ្ញុំ ក៏តែងតែរង់ចាំសហជីវិនី ម្ចាស់ពានរង្វាន់ណូប៊ែលសន្តិភាព លោកស្រី អ៊ុងសាន ស៊ូជី ចូលរួមថ្កោលទោសផងដែរ ។ ពិភពលោក កំពុងតែរង់ចាំ ហើយ រ៉ូហ៊ីងយ៉ា ក៏កំពុងតែរង់ចាំ ដូចគ្នាដែរ» ។
សូមជម្រាបផងដែរថា Malala Yousafzai គឺជាម្ចាស់ពានរង្វាន់ណូប៊ែលសន្តិភាពសម្រាប់ឆ្នាំ២០១៤ ។ Malala ដែលបានពានរង្វាន់លើការតស៊ូ និងទាមទារសិទ្ធិដើម្បីការអប់រំកុមារ និងប្រឆាំងការរឹតត្បិតកុមារ បច្ចុប្បន្ម មានអាយុ ២០ឆ្នាំហើយ។ រីឯលោកស្រី អ៊ុងសាន ស៊ូជី ដែលបច្ចុប្បន្ន ជាទីប្រឹក្សារដ្ឋមីយ៉ាន់ម៉ា បានទទួលពានរង្វាន់ណូប៊ែលសន្តិភាពនៅឆ្នាំ 1991 ។ លោកស្រី ស៊ូជី គឺជានិមិត្តរូបនៃសិទ្ធិមនុស្ស និងការតស៊ូដើម្បីប្រជាធិបតេយ្យដោយគ្មានហិង្សា ៕
Tag:
Rohingya
មីយ៉ា់ន់ម៉ា
Malala Yousafzai
© រក្សាសិទ្ធិដោយ thmeythmey.com