អន្តរជាតិ
ពូទីន៖«លីប៊ី និងអ៊ីរ៉ាក់ ធ្វើឲ្យកូរ៉េខាងជើងគិតថា នុយក្លេអ៊ែរសំខាន់សម្រាប់សុវត្ថិភាពខ្លួន» 05, Sep 2017 , 10:59 pm
× ប្រធានាធិបតីរុស្ស៊ីលោក វ្ល៉ាឌីមៀ ពូទីន ជឿជាក់ថា ទោះដាក់ទណ្ឌកម្មធ្ងន់យ៉ាងណាក៏ដោយ ក៏មិនអាចបង្ខមឲ្យកូរ៉េខាងជើងបោះបង់មហិច្ឆតាផលិតអាវុធនុយក្លេអ៊ែររបស់ខ្លួនឡើយ។ មេដឹកនាំរូបនេះពន្យល់ថា បញ្ហានៅអ៊ីរ៉ាក់ និងលីប៊ីជាហេតុធ្វើឲ្យកូរ៉េខាងជើងជឿថា អាវុធនុយក្លេអ៊ែរវាសំខាន់សម្រាប់សន្តិសុខរបស់ខ្លួន។
ពីក្រុងប៉េកាំង នាថ្ងៃអង្គានេះ ប្រមុខរដ្ឋរុស្ស៊ីលោក វ៉ា្លឌីមៀ ពូទីន បានផ្តល់យោបល់មួយចំនួនពាក់ព័ន្ធភាពតានតឹងដែលកើតមានឡើងនៅឧបទ្វីបកូរ៉េក្នុងសន្និសីទសារព័ត៌មានមួយក្រៅកិច្ចប្រជុំប្រទេស BRICS នៅចិន។ លោកផ្តល់យោបល់ថា ទណ្ឌកម្ម ឬការគំរាមដោយប្រើកម្លាំងគ្មានប្រសិទ្ធិភាពក្នុងការបង្ខំឲ្យកូរ៉េខាងជើងលះបង់អាវុធនុយក្លេអ៊ែររបស់ខ្លួនឡើយ។
សារព័ត៌មានរដ្ឋរុស្ស៊ី RT បានស្រង់សម្តីមេដឹកនាំរុស្ស៊ីរូបនេះថា កូរ៉េខាងជើងមើលឃើញអ្វីដែលកើតឡើងនៅអ៊ីរ៉ាក់ និងលីប៊ី ជាមេរៀនមួយដែលតម្រូវឲ្យខ្លួនផលិតអាវុធនុយក្លេអ៊ែរដើម្បីសុវត្ថិភាព និងសន្តិសុខផ្ទាល់ខ្លួន។ លោក ក៏ព្រមានផងដែរពីគ្រោះមហន្តរាយដែលអាចកើតមានឡើងដោយសារការប្រឈមមុខដាក់គ្នារវាងភាគីពាក់ព័ន្ធក្នុងបញ្ហាកូរ៉េកន្លងមក។
ដោយលើកយកឈ្មោះលីប៊ី និងអ៊ីរ៉ាក់ លោក ពូទីន ចង់សំដៅលើការអន្តរាគមន៍របស់អាមេរិកនៅអ៊ីរ៉ាក់ឆ្នាំ ២០០៣ និងនៅលីប៊ីនៅក្នុងឆ្នាំ ២០១១ ក្រោយពេលដែលមេដឹកនាំប្រទេសទាំងពីរព្រមបោះបង់កម្មវិធីអាវុធនុយក្លេអ៊ែររបស់ខ្លួននិងព្រមគោរពតាមច្បាប់អន្តរជាតិនោះ។
« ការសម្ញែងសាច់ដុំយោធា ក្នុងស្ថានភាពនេះគឺគ្មានប្រយោជន៍ទេ។ វាចប់ទៅវិញដោយគ្រោះថ្នាក់។ វាអាចនាំទៅរកគ្រោះមហន្តរាយយ៉ាងធំធេងមួយ និងបាត់បង់ជីវិតមនុស្សច្រើនសន្ធឹកផង។ វាគ្មានផ្លូវណាផ្សេងទៀតក្នុងការដោះស្រាយបញ្ហានុយក្លេអ៊ែរកូរ៉េ ក្រៅពីសង្គ្រោះការសន្ទនាគា្នដោយសន្តិវិធីឡើយ»។ លោក ពូទីន បានពន្យល់ដូច្នេះ។
ប្រមុខរដ្ឋរុស្ស៊ីរូបនេះបានបន្តថែមទៀតថា៖« ដូចខ្ញុំបានប្រាប់សហសេវិកខ្ញុំកាលពីម្សិលមិញអ៊ីចឹ ង កូរ៉េខាងជើងសុខចិត្តប្រឈមការលំបាកគ្រប់យ៉ាង តែគេមិនព្រមឈប់ផលិតអាវុធឡើយ ដរាបណាគេមិនមានអារម្មណ៍ថាខ្លួនមានសុវត្ថិភាពនោះ។ ដូច្នេះ តើអ្វីដែលអាចធានាសន្តិសុខរបស់គេបាន? វាមានតែការស្តារឡើងវិញនូវច្បាប់អន្តរជាតិប៉ុណ្ណោះ»។
លោក ពូទីន លើកឡើងពីបញ្ហានេះ ចំពេលដែលក្រុមប្រឹក្សាសន្តិសុខបន្តជជែកពិភាក្សាគ្នាដើម្បីរកទណ្ឌកម្មធ្ងន់ធ្ងរជាងមុនដើម្បីដាក់គំនាបលើកូរ៉េខាងជើងជាពិសេសផ្តាច់ចរន្តសេដ្ឋកិច្ច ក្រោយពេលប្រទេសនេះបាញ់សាកល្បងអាវុធនុយក្លេអ៊ែរជាថ្មីទៀតកាលពីសប្តាហ៍មុន។ ចំណែកអាមេរិកនិងកូរ៉េខាងត្បូងក៏បន្តធ្វើសមយុទ្ធយោធាសម្ញែងសាច់ដុំ និងចង់ពង្រឹងកម្លាំងយោធាដើម្បីទប់ទល់កូរ៉េខាងជើងផងដែរនោះ។ កូរ៉េខាងជើងបានទិតៀនសមយុទ្ធនេះ ហើយក៏អះអាងផងដែរថា អាមេរិកនិងកូរ៉េខាងត្បូងមានមហិច្ឆតាត្រៀមឈ្លានពានខ្លួនផងដែរ៕
Tag:
លីប៊ី
អ៊ីរ៉ាក់ BRICS
វ្ល៉ាឌីមៀ ពូទីន
កូរ៉េខាងជើង
© រក្សាសិទ្ធិដោយ thmeythmey.com