អន្តរជាតិ
នាយករដ្ឋមន្ត្រីអាបេ ៖ កូរ៉េខាងជើងគ្មានអនាគតល្អទេ បើបន្តដើរលើផ្លូវដូចសព្វថ្ងៃ 06, Sep 2017 , 9:19 pm
× នាយករដ្ឋមន្ត្រីជប៉ុន ស៊ីនហ្សូ អាបេ នៅថ្ងៃទី៦ ខែកញ្ញា បានប្រាប់ឲ្យមេដឹកនាំកូរ៉េខាងជើងមើលអនាគតឲ្យបានវែងឆ្ងាយ ព្រោះផ្លូវដើរបច្ចុប្បន្នរបស់កូរ៉េខាងជើងគ្មាននាំអ្វីល្អដល់ខ្លួនទេ។ លោក អាបេ ក៏បានប្រាប់ឲ្យកូរ៉េខាងជើងផ្លាស់ប្ដូរគោលនយោបាយរបស់ខ្លួនដែរ។ លោក អាបេ និយាយបែបនេះ បន្ទាប់ពីកូរ៉េខាងជើងទើបសាកល្បងគ្រាប់អ៊ីដ្រូសែន ដែលគេជឿថាមានអានុភាពខ្លាំងគ្រាប់បរមាណូអាមេរិកទម្លាក់លើជប៉ុនកាលពីសង្គ្រាមលោកលើកទីពីរទៅទៀត។
កូរ៉េខាងជើងកំពុងដើរលើផ្លូវខុសហើយ។ នេះគឺជាសម្ដីព្រមានរបស់នាយករដ្ឋមន្ត្រីជប៉ុន ស៊ីនហ្សូ អាបេ ចំពោះមេដឹកនាំកូរ៉េខាងជើង ដែលនៅតែបន្តអភិវឌ្ឍកម្មវិធីនុយក្លអ៊ែរទាំងងងើល ផ្ទុយពីបម្រាមរបស់ក្រុមប្រឹក្សាសន្តិសុខ។ ជប៉ុនព្រួយបារម្ភជាខ្លាំងនឹងទង្វើផ្គើនជាបន្តបន្ទាប់របស់កូរ៉េខាងជើង ជាពិសេសការបាញ់មីស៊ីលរំលងដែនអាកាសរបស់ខ្លួន និងការសាកល្បគ្រាប់បែកអ៊ីដ្រូសែនកាលពីចុងសប្ដាហ៍ជាដើម។
មុនដំណើរទៅកាន់ទឹកដីរុស្ស៊ីដើម្បីចូលរួមកិច្ចប្រជុំតំបន់ នាយករដ្ឋមន្ត្រីជប៉ុនរូបនេះបានណែនាំឲ្យរបបដឹកនាំកូរ៉េខាងជើងពិនិត្យមើលនយោបាយរបស់ខ្លួនឡើងវិញព្រោះកូរ៉េខាងជើងនឹងគ្មានអនាគតភ្លឺស្វាងទេ បើបន្តធ្វើសកម្មភាពដូចសព្វថ្ងៃនេះទៀតនោះ។ លោកនាយករដ្ឋមន្ត្រី អាបេ ក៏បានស្នើឲ្យមេដឹកនាំក្រុងព្យុងយ៉ាងផ្លាស់ប្ដូរនយោបាយរបស់ខ្លួនម្ដងទៀត ដ្បិតគោលនយោបាយចាស់គ្មានបានផលអ្វីឡើយ។
យោងតាមសារព័ត៌មាន The Japan Times លោក អាបេ ក៏នឹងលើកបញ្ហាកូរ៉េខាងជើងនេះក្នុងជំនួបជាមួយប្រធានាធិបតីរុស្ស៊ី វ្ល៉ាឌីមៀ ពូទីន និងប្រធានាធិបតីកូរ៉េខាងត្បូង មូន ចេអ៊ីន នៅឯទីក្រុងវ្ល៉ាឌីវ៉ូស្តុក ដែលស្ថិតនៅតំបន់ចុងបូព៌ាដែរ។ មិនមែនតែជប៉ុនទេដែលបារម្ភ សូម្បីតែកូរ៉េខាងត្បូងក៏មិនសូវស្រួលចិត្តនឹងសកម្មភាពរបស់កូរ៉េខាងជើងដែរ ខណៈដែលរុស្ស៊ីមិនបានគាំទ្រការដាក់ទណ្ឌកម្មឡើយ។
ទោះជាបានថ្កោលទោសទង្វើកូរ៉េខាងជើងក្ដី រុស្ស៊ីក៏នៅតែរក្សាជំហរដោះស្រាយបញ្ហាដោយសន្តិវិធីដដែល។ ខុសពីមេដឹកនាំជប៉ុន និងកូរ៉េខាងត្បូង ប្រធានាធិបតី ពូទីន ជឿជាក់ថា ការដាក់ទណ្ឌកម្មជារឿងគ្មានបានការ ហើយក៏មិនអាចបង្ខំឲ្យកូរ៉េខាងជើងបោះបង់មហិច្ឆតាអភិវឌ្ឍនុយក្លេអ៊ែរបានដែរ។ ជាមួយគ្នានោះ លោក ពូទីន ក៏ព្រមានដែរថា ស្ថានការណ៍នៅឧបទ្វីបកូរ៉េអាចក្លាយជាបញ្ហាដ៏មហន្តរាយសម្រាប់ពិភពលោកទៅទៀត។
ដោយសារទង្វើរបស់កូរ៉េខាងជើង ទាំងជប៉ុន ទាំងកូរ៉េខាងត្បូងក៏មានគំនិតចង់ពង្រឹងគ្រឹះការពារជាតិរបស់ខ្លួនផងដែរ។ កូរ៉េខាងត្បូងស្វះស្វែងនាំអាវុធចូលពីអាមេរិកបន្ថែមទៀតដើម្បីពង្រឹងសមត្ថភាពទប់ទល់ការគំរាមកំហែងពីខាងក្រៅ ហើយប្រព័ន្ធផ្សព្វផ្សាយកូរ៉េមួយចំនួនចង់ឲ្យរដ្ឋាភិបាលអភិវឌ្ឍអាវុធនុយក្លេអ៊ែរផ្ទាល់ខ្លួនផង។ ចំណែកឯជប៉ុនវិញ ក៏គ្រោងបង្កើនថវិកាចំណាយលើវិស័យការពារជាតិ សំដៅត្រៀមទប់ទល់កូរ៉េខាងជើង៕
Tag:
ជប៉ុន
កូរ៉េខាងជើង
ស៊ីនហ្សូ អាបេ
© រក្សាសិទ្ធិដោយ thmeythmey.com