អន្តរជាតិ
បង់ក្លាដែសចោទថា មីយ៉ាន់ម៉ាបង្កប់មីនតាមព្រំដែនទប់ស្កាត់ជនភៀសខ្លួនរ៉ូហ៊ីងយ៉ាត្រឡប់ចូលស្រុកវិញ 07, Sep 2017 , 10:59 am
រូបភាព៖ Hindustan Times
× បង់ក្លាដែសសង្ស័យថាកងសន្តិសុខមីយ៉ាន់ម៉ាបានបង្កប់មីននៅតាមរបងព្រំដែនមីយ៉ាន់ម៉ា-បង់ក្លាដែសក្នុងគោលបំណងទប់ស្កាត់ជនភៀសខ្លួនរ៉ូហ៊ីងយ៉ាត្រឡប់ទៅស្រុកកំណើតវិញ បន្ទាប់ពីមានមនុស្សរងរបួសដោយសារផ្ទុះមីន។ មេដឹកនាំមីយ៉ាន់ម៉ាមិនអាចឆ្លើយតបភ្លាមៗជុំវិញហេតុការណ៍នេះឡើយ។
ប្រភពខាងរដ្ឋាភិបាលបង់ក្លាដែសពីរបានបង្ហើបថា កងសន្តិសុខមីយ៉ាន់ម៉ាបានលួចបង្កប់មីននៅតាមរបងព្រំដែនមីយ៉ាន់ម៉ា-បង់ក្លាដែសដើម្បីទប់ស្កាត់ជនភៀសខ្លួនរ៉ូហ៊ីងយ៉ាដែលចង់ត្រឡប់ទៅមាតុភូមិវិញ។ ប្រភពដដែលនោះបន្ថែមថា នៅថ្ងៃពុធទី ៦ខែកញ្ញា រដ្ឋាភិបាលបង់ក្លាដែសជាផ្លូវការប្រឆាំងការបង្កប់មីននៅតាមព្រំដែននេះដែរ។
បើតាមទីភ្នាក់ងារព័ត៌មានReuter ប្រភពរដ្ឋាភិបាលបង់ក្លាដែសដេលមិនបង្ហាញអត្តសញ្ញាណនោះបានអះអាងដូច្នេះថា៖«ក្រុមសន្តិសុខមីយ៉ាន់ម៉ាបានបង្កប់មីននៅព្រំដែនដែលស្ថិតក្នុងទឹកដីពួកគេ។ ហើយពួកយើងដឹងថា វាគឺជាមីនដោយសម្អាងលើរូបភាពដែលថតបាន និងមានគេប្រាប់ផង»។ ក្រុមសន្តិសុខបង់ក្លាដែសក៏បានឃើញកងសន្តិសុខមីយ៉ាន់ម៉ាបីទៅបួនក្រុមបានបង្កប់អ្វីម្យ៉ាងទៅក្នុងដីជិតរបងព្រំប្រទល់ ក្រោយមកទើបដឹងថានោះគឺជាមីន។
បើតាមមន្ត្រីព្រំដែនបង់ក្លាដែសលោកManzurul Hassan Khan កាលពីថ្ងៃចន្ទមានករណីផ្ទុះនៅតំបន់ព្រំដែនពីរលើក ហើយនៅថ្ងៃអង្គារគេលឺសំឡេងផ្ទុះពីរដងទៀត។ ករណីផ្ទុះកាលពីថ្ងៃអង្គារបានធ្វើឲ្យក្មេងប្រុសម្នាក់ដាច់ជើង ហើយត្រូវបានដឹកមកសង្គ្រោះនៅបង់ក្លាដែស។ ចំណែកឯក្មេងប្រុសម្នាក់ទៀតបានរងរបួសស្រាល។
ទីភ្នាក់ងារព័ត៌មានដដែលបានស្រង់សម្ដីជនភៀសខ្លួនពីរនាក់ថា កាលពីថ្ងៃចន្ទ មុនពេលគ្រាប់មីនផ្ទុះ ពួកគេទាំងនោះបានឃើញកងសន្តិសុខមីយ៉ាន់ម៉ានៅជិតកន្លែងផ្ទុះ។
ទោះជាបែបនេះក្ដី ទីភ្នាក់ងារព័ត៌មានReuter មិនអាចផ្ទៀងផ្ទាត់ឲ្យបានច្បាស់ថា កងសន្តិសុខមីយ៉ាន់ម៉ាពិតជាអ្នកបង្កប់មីនមែនឬយ៉ាងណាឡើយ។ តំណាងកងទ័ពមីយ៉ាន់ម៉ាមិនបានផ្តល់យោបល់ឡើយពាក់ព័ន្ធការផ្ទុះមីននេះ។
ឯអ្នកនាំពាក្យទីប្រឹក្សារដ្ឋលោកស្រី អ៊ុងសាន ស៊ូជី លោក Zaw Htay ប្រាប់ទីភ្នាក់ងារព័ត៌មាន Reuters ថា វាចាំបាច់ត្រូវមានការស្រាវជ្រាវច្បាស់លាស់មុនពេលសន្និដ្ឋានថាអ្នកណាជាអ្នកបង្កប់មីន។ លោកបានចោទសួរដូច្នេះថា៖« តើមីនផ្ទុះនៅកន្លែងណា? តើអ្នកណាខ្លះអាចទៅកន្លែងផ្ទុះបាន?តើអ្នកណាជាអ្នកបង្កប់មីនទាំងនោះ? ថាមិនត្រូវអ្នកបង្កប់មីនអាចជាក្រុមភេរវករផង»។
សូមជម្រាបថា ទាក់ទិននឹងការផ្ទុះនេះ មីយ៉ាន់ម៉ាបានទទួលស្គាល់ថា ខ្លួនធ្លាប់បង្កប់មីននៅតាមព្រំដែនពិតប្រាកដមែន ប៉ុន្តែគ្រាប់មីនទាំងនោះបានបង្កប់ក្នុងអំឡុងឆ្នាំ១៩៩០ មកម្ល៉េះដើម្បីការពារការឈ្លានពានប៉ុណ្ណោះ។ កងសន្តិសុខមីយ៉ាន់ម៉ាកន្លងមកក៏បានព្យាយាមបោសសម្អាតមីនទាំងនោះដែរ៕
Tag:
បង់ក្លាដែស
Manzurul Hassan Khan
Zaw Htay
© រក្សាសិទ្ធិដោយ thmeythmey.com