អន្តរជាតិ
កូរ៉េខាងត្បូង៖ ៣៨នាក់របួសក្នុងចលនាបាតុកម្មប្រឆាំងនឹងការដាក់ដំឡើងខែលការពារមីស៊ីល THAAD 07, Sep 2017 , 5:16 pm
× ប៉ូលិសកូរ៉េខាងត្បូងបានបង្ក្រាប បាតុករជាច្រើននាក់ដែលបាននាំគ្នាបាតុកម្មប្រឆាំងនឹងការដំឡើងប្រព័ន្ធការពារមីស៊ីល(THAAD)របស់អាមេរិកបន្ថែដើម្បីឆ្លើយតបនឹងការបន្តបាញ់សាកល្បងមីស៊ីលឥតឈប់របស់កូរ៉េខាងជើងនោះ។ បាតុករប្រហែល ៣៨នាក់ បានរងរបួសដោយសារការប៉ះទង្គិចគ្នាជាមួយកងកម្លាំងសន្តិសុខនោះ។
ការពង្រាយប្រព័ន្ធការពារមីស៊ីលអាមេរិក(THAAD )បង្កឲ្យប្រជាជនរស់ភូមិ Soseong-ri ដែលនៅក្បែរតំបន់នោះខឹងសម្បារ និងបាតុកម្មប្រឆាំងខ្លាំងៗផងដែរ។ ថ្ងៃព្រហស្បតិ៍ទី ៧ខែកញ្ញានេះ គេសង្កេតឃើញបាតុករជាង៣០០នាក់ បានប្រមូលផ្តុំគ្នាតវ៉ា ខណៈប៉ូលិសប្រហែល ៨០០០នាក់ឯណោះត្រូវបានគេបញ្ជូនមកទប់ទល់បាតុករ។
ទីភ្នាក់ងារព័ត៌មាន Reuters បានចុះផ្សាយថា ការបាតុកម្មនេះបានឈានដល់មានការប៉ះទង្គិចគ្នាផងដែរ។ ចំណែក ប្រជាជនប្រហែល ៣៨នាក់បានរងរបួសដោយសារការប្រវ៉ាយប្រតប់ជាមួយនឹងប៉ូលិស ហើយមនុស្ស ២១នាក់ ត្រូវគេបញ្ចូនទៅមន្ទីរពេទ្យ។
ប្រជាជនមួយចំនួននៅភូមិ Soseong-ri បានអះអាងថា ពួកគេតវ៉ាមិនមែនផ្អែកលើហេតុផលនយោបាយឡើយ ប៉ុន្តែពួកគេរងការរំខានខ្លាំងដោយសារការពង្រាយអាវុធនេះ។ ពួកគេលើកឡើងដូច្នេះថា៖«ពួកយើងប្រឆាំងនឹងការដាក់ពង្រាយប្រព័ន្ធការពារមីស៊ីលមិនមែនដោយសារហេតុផលនយោបាយនោះទេ ប៉ុន្តែវាមកពីសំឡេងរំខានរបស់ឧទ្ធម្ភាគចក្រ រថយន្តក្រុង និងរថយន្តដឹកទំនិញដែលបើកឆ្លងតាមផ្លូវជិតតំបន់ដែលយើងរស់នៅ»។
ថ្វីបើមានការរិះគន់ដូច្នេះក្តី ភាគីរដ្ឋាភិបាល បានចាត់ទុកការពង្រាយអាវុធទំនើបនេះជាការឆ្លើយតបយ៉ាងចាំបាច់ចំពោះស្ថានការណ៍សន្តិសុខបច្ចុប្បន្ន។ រដ្ឋមន្ត្រីក្រសួងការពារជាតិកូរ៉េខាងត្បូងបានពន្យល់ថា កូរ៉េខាងត្បូងសម្រេចចិត្តពង្រាយប្រព័ន្ធការពារមីស៊ីល នោះក៏ដោយសារតែការគំរាមកំហែងពីកូរ៉េខាងជើងដែលអាចសាកល្បងការបាញ់មីស៊ីលបន្តបន្ទាប់ក្រោយពេលដែលលោកប្រធានាធិបតីកូរ៉េខាងត្បូងថ្មី ឡើងកាន់តំណែង។
ប៉ុន្តែចិនដែលជាមិត្តជិតខាងកូរ៉េខាងត្បូងតែងតែប្រឆាំងគម្រោងបំពាក់ប្រព័ន្ធការពារ(THAAD)អាមេរិកនេះជាញយដងដែរកន្លងមក។ ចិនយល់ថាប្រព័ន្ធការពារមីស៊ីលនេះអាចក្លាយជាឧបករណ៍សម្រាប់ឃ្លាំមើលដល់ទឹកដីខ្លួន និងអាចប៉ះពាល់ដល់សន្តិសុខខ្លួនផងដែរ។
គួរបញ្ជាក់ដែរថា កូរ៉េខាងត្បូងធ្លាប់បានបំពាក់ប្រព័ន្ធការពារមីស៊ីលទំនើបនេះពីរគ្រឿងរួចហើយនៅជិតក្រុងSeongju ហើយលើកនេះកូរ៉េខាងត្បូងបានបំពាក់ប្រព័ន្ធការពារមីស៊ីលបួនដើមបន្ថែមទៀតនៅក្បែរកន្លែងដដែល៕
Tag:
THAAD
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com