អន្តរជាតិ
ប្រមុខការពារជាតិថៃ សន្យា នាំអ្នកជួយសម្រួលលោកស្រីយីងឡាក់មកទទួលខុសត្រូវចំពោះមុខច្បាប់ 08, Sep 2017 , 7:59 am
× ប្រមុខការពារជាតិថៃ លោកឧត្តមសេនីយ៍ Prawit Wongsuwan បានអះអាងថា លោក នឹងចាត់វិធានការផ្នែកច្បាប់ប្រឆាំងនឹងជនទាំងឡាយណា ដែលបានអន្តរាគមន៍ដល់អតីតនាយករដ្ឋមន្ត្រី យីងឡាក់ ស៊ីនណាវ៉ាត់ត្រាឲ្យចេញពីប្រទេស ។
« នៅពេលដែលពេលវេលាមួយសមរម្យបានមកដល់ គ្រប់យ៉ាង នឹងត្រូវបង្ហាញ។ អ្នក ដែលបានជួយសម្រួលលោកស្រី យីងឡាក់ ចេញពីប្រទេស ក៏នឹងត្រូវទទួលខុសត្រូវចំពោះមុខច្បាប់ផងដែរ»។ នេះគឺជាសេចក្តីថ្លែងការណ៍របស់លោកឧបនាយករដ្ឋមន្ត្រី និងជារដ្ឋមន្ត្រីការពារជាតិថៃ Prawit Wongsuwan ដែលបានដកស្រង់ដោយសារព័ត៌មានថៃ The Nation នៅថ្ងៃទី០៦ កញ្ញា ។
យ៉ាងណាក៏ដោយ ស្របនឹងការប្តេជ្ញានាំយកអ្នកនៅពីក្រោយនៃការគេចខ្លួនរបស់អតីតនាយករដ្ឋមន្ត្រីថៃមកទទួលខុសត្រូវផ្នែកច្បាប់នេះ លោកឧត្តមសេនីយ៍ Prawit ក៏បានបញ្ជាក់ដែរថា មកទល់ពេលនេះ លោក មិនទាន់បានដឹងថាតើ លោកស្រី យីងឡាក់ នៅទីណាឲ្យប្រាកដ ហើយ អ្នកណា ជាអ្នកសម្រួលមធ្យោបាយដល់លោកស្រីឡើយ ។
សូមរម្លឹកដែរថា អតីតនាយករដ្ឋមន្ត្រីថៃ លោកស្រី យីងឡាក់ ស៊ីនណាវ៉ាត់ត្រា ត្រូវបានជាប់ចោទពីបទធ្វេសប្រហែសក្នុងពេលដឹកនាំរដ្ឋាភិបាល ដែលបានបណ្តាលឲ្យបាត់បង់ថវិកាជាតិរាប់លានដុល្លារ ។ លោកស្រី បានអវត្តមានក្នុងថ្ងៃប្រកាសសាលដីការសំណុំរឿងរបស់លោកស្រី ដែលបានប្រព្រឹត្តឡើងនៅចុងខែមុន ។
តាមប្រភពព័ត៌មានជាច្រើន លោកស្រី យីងឡាក់ បានគេចខ្លួនទៅដល់ក្រុងឌូប៉ៃ ដែលជាកន្លែងបងប្រុសបង្កើតរបស់លោកស្រី និងជាអតីតនាយករដ្ឋមន្ត្រីថៃ លោក ថាក់ស៊ីន ស៊ីនណាវ៉ាត់ត្រា រស់នៅដោយសុវត្ថិភាពហើយ។
ការរត់គេចរបស់អតីតនាយករដ្ឋមន្ត្រីថៃស្រីដំបូងគេរូបនេះ បានបង្កើតជាមន្ទិលជាច្រើន ថាតើលោកស្រី អាចចាកចេញពីរាជាណាចក្រថៃដោយរបៀបណា បើតាំងពីអស់អំណាច ហើយត្រូវបានតុលាការចោទប្រកាន់ លោកស្រី ត្រូវបានហាមឃាត់មិនឲ្យចាកចេញទៅបរទេសនោះ៕
© រក្សាសិទ្ធិដោយ thmeythmey.com