អន្តរជាតិ
វិបត្តិរ៉ូហ៊ីងយ៉ា៖ បាតុករ ដុតទង់ជាតិ គប់ដបទឹកសុទ្ធ ដុំថ្មនៅស្ថានទូតមីយ៉ាន់ម៉ាប្រចាំឥណ្ឌូណេស៊ី 08, Sep 2017 , 9:21 am
× ស្របពេលដែលបញ្ហាធ្វើទុក្ខបុកម្នេញទៅលើជនជាតិរ៉ូហ៊ីងយ៉ានៅរដ្ឋ Rakhine នៃប្រទេសមីយ៉ាន់ម៉ា កាន់តែវិវត្តទៅរកភាពអាក្រក់ទៅៗ ក្រុមបាតុករជាច្រើននាក់នៅឥណ្ឌូណេស៊ី ដែលជាប្រទេសដែលមានចំនួនប្រជាជនឥស្លាមច្រើនជាងគេរបស់ពិភពលោក ក៏បានផ្ទុះបាតុកម្មទាមទារឲ្យមីយ៉ាន់ម៉ា ចាត់វិធានការដើម្បីបញ្ឈប់បញ្ហានេះ។
កំហឹងរបស់ជនជាតិឥស្លាមឥណ្ឌូណេស៊ីលើវិបត្តិរ៉ូហ៊ីងយ៉ា បានឈានដល់ដំណាក់កាលមួយកាន់តែអាក្រក់ហើយ ។ ក្រុមបាតុកឥស្លាមជាច្រើននាក់ នៅថ្ងៃទី០៦ កញ្ញា បានដុតទង់ជាតិមីយ៉ាន់ម៉ាក្នុងពេលដែលពួកគេ បានប្រមូលផ្តុំធ្វើបាតុកម្មនៅខាងក្រៅស្ថានទូតមីយ៉ាន់ម៉ាប្រចាំរដ្ឋធានីហ្សាការតា ។ នេះបើយោងតាមការចុះផ្សាយរបស់សារព័ត៌មាន ឥណ្ឌូណេស៊ី The Jakarta Post ។
តាមប្រភពព័ត៌មានដដែលនោះ បន្ទាប់ពីក្រុមបាតុករ បានដុតទង់ជាតិរួចហើយនោះ ពួកគេ ក៏បានគប់ដបទឹកសុទ្ធ និងដុំថ្មទៅកាន់ស្ថានទូតមីយ៉ាន់ម៉ា និងថែមទាំងប៉ុនប៉ងទម្លាយបន្លាលួសទៅកាន់ស្ថានទូតទៀតផង ។ យ៉ាងណាក៏ដោយ ស្ថានការណ៍ ត្រូវបានបន្ធូរបន្ថយ ដ្បិត មានការធានាសន្តិសុខពីប៉ូលិសឥណ្ឌូណេស៊ី ។
សូមជម្រាបផងដែរថា ក្រោយពីមានការប៉ះទង្គិចគ្នារវាងកងកម្លាំងរដ្ឋាភិបាលមីយ៉ាន់ម៉ា និងក្រុមឧទ្ទាមប្រដាប់អាវុធនៅខែសីហា នៅក្នុងរដ្ឋ Rakhine មក មានជនជាតិភាគតិចម៉ូស្លីមរ៉ូហ៊ីងយ៉ាជាង១០ម៉ឺននាក់ហើយ បានរត់ភៀសខ្លួនចេញពីមីយ៉ាន់ម៉ាទៅកាន់បណ្តាជាប្រទេសជិតខាង ។ នេះបើយោងតាមរបាយការណ៍ចុងក្រោយរបស់អង្គការសហប្រជាជាតិ UNHCR ។
ជុំវិញការប្រមូលផ្តុំនេះដែរ រដ្ឋាភិបាលឥណ្ឌូណេស៊ី ក៏បានប្រាប់ពលរដ្ឋខ្លួន កុំឲ្យចេញមុខបាតុកម្មនោះទេ ពោលគឺ ទុកលទ្ធភាពឲ្យរដ្ឋាភិបាល ដើម្បីចេញចំណាត់ការជាមួយនឹងរដ្ឋាភិបាលមីយ៉ាន់ម៉ាដោយផ្ទាល់។
តាមពិតទៅ នេះមិនមែនជាការប្រមូលជាលើកដំបូងឡើយនៅក្នុងប្រទេសឥណ្ឌូណេស៊ី ដែលធ្វើឡើងក្នុងគោលដៅទាមទារឲ្យមីយ៉ាន់ម៉ា បញ្ឈប់សកម្មភាពរើសអើង និងហិង្សាលើជនជាតិភាគតិចឥស្លាមរ៉ូហ៊ីងយ៉ានៅរដ្ឋ Rakhine នៃប្រទេសមីយ៉ាន់ម៉ានោះ។ នៅចុងឆ្នាំ២០១៦កន្លងទៅ ក៏មានចលនាប្រមូលផ្តុំស្រដៀងគ្នារបស់ពលរដ្ឋឥស្លាមនៅបណ្តារដ្ឋអាស៊ាន ដែលរួមមាន ឥណ្ឌូណេស៊ី ម៉ាឡេស៊ី និងថៃ បន្ទាប់ពីមានហិង្សាប្រដាប់អាវុធនៅរដ្ឋ Rakhine នៅខែតុលា ឆ្នាំ២០១៦នោះ ដែលបានបណ្តាលឲ្យមាន ជនជាតិរ៉ូហ៊ីងយ៉ាជាច្រើននាក់ បានភៀសខ្លួនចេញពីប្រទេស និងរកជំនួញអន្តរាគមន៍នោះ ៕
Tag:
ឥណ្ឌូណេស៊ី
មីយ៉ាន់ម៉ា
អាស៊ាន
រ៉ូហ៊ីងយ៉ា
© រក្សាសិទ្ធិដោយ thmeythmey.com