អន្តរជាតិ
ហូឡង់ឲ្យរុស្ស៊ីទទួលខុសលើករណីបាញ់ MH17 តែរុស្ស៊ីប្រាប់វិញថា កុំប្រើភាសានេះដាក់ខ្លួនឲ្យសោះ 30, May 2018 , 11:00 am
អគ្គរដ្ឋទូតរុស្ស៊ីក្នុងកិច្ចប្រជុំក្រុមប្រឹក្សាសន្តិសុខ (រូបភាព Xinhua)
× នាកិច្ចប្រជុំក្រុមប្រឹក្សាសន្តិសុខនៅថ្ងៃទី២៩ ខែឧសភា ហូឡង់បានស្នើឲ្យរុស្ស៊ីទទួលកំហុសលើករណីបាញ់ទម្លាក់យន្តហោះរបស់ក្រុមហ៊ុនអាកាសចរណ៍ Malaysia Airlines ជើងហោះហើរ MH17 កាលពីបួនឆ្នាំមុន។ ការស្នើនេះធ្វើឡើងបន្ទាប់ពីក្រុមស៊ើបអង្កេតឯករាជ្យដឹកនាំដោយហូឡង់ផ្ទាល់រកឃើញថា មីស៊ីលដែលបាញ់នោះ ជារបស់កងទ័ពរុស្ស៊ី។ យ៉ាងណាមិញ រុស្ស៊ីបានទាត់ចោលសំណើនេះ និងលទ្ធផលស៊ើបអង្កេតផង។
កិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្ដីពីបញ្ហាភាគខាងកើតអ៊ុយក្រែន បានក្លាយជាវេទិកាជជែកពីការធ្លាក់យន្តហោះរបស់ក្រុមហ៊ុនអាកាសចរណ៍ម៉ាឡេស៊ី Malaysia Airlines ។ រដ្ឋមន្ត្រីការបរទេសហូឡង់ Stef Blok បានប្រាប់កិច្ចប្រជុំថា ដោយយោងតាមលទ្ធផលរបស់ក្រុមស៊ើបអង្កេតឯករាជ្យរួម យន្តហោះម៉ាឡេស៊ីលេខ MH17 ត្រូវបានបាញ់ទម្លាក់ដោយមីស៊ីល Buk TELAR របស់កងទ័ពរុស្ស៊ី។
លទ្ធផលបន្ថែមនៃការស៊ើបអង្កេត ដែលចេញផ្សាយកាលពីសប្ដាហ៍មុនបង្ហាញទៀតថា មីស៊ីលដដែលនោះជាមីស៊ីលរបស់កងពលប្រឆាំងយន្តហោះទី៥៣ របស់យោធារុស្ស៊ីទៀតផង។ ផ្អែកលើលទ្ធផលទាំងនេះ លោក Blok បាននិយាយថា ហូឡង់ និងអូស្ត្រាលីស្នើឲ្យរុស្ស៊ីទទួលខុសត្រូវលើករណីនេះ និងសហការឲ្យបានសកម្មជាមួយក្រុមស៊ើបអង្កេតចម្រុះដើម្បីវែកមុខជនដៃដល់ពិតប្រាកដ។ នេះបើតាមផ្សាយរបស់ទីភ្នាក់ងារព័ត៌មាន AFP ។
សំណើរបស់ប្រមុខការទូតហូឡង់ ត្រូវបានទាត់ចោលភ្លាមៗដោយតំណាងរុស្ស៊ីប្រចាំក្រុមប្រឹក្សាសន្តិសុខ Vassily Nebenzia ។ ដោយមិនពេញចិត្តការអធិប្បាយរបស់តំណាងហូឡង់នោះ លោក Nebenzia បានប្រាប់សមាជិកកិច្ចប្រជុំនៅថ្ងៃទី២៩ ខែឧសភាថា ភាសានៃការដាក់ឱសានវាតបែបនេះ មិនមែនជាអ្វីដែលមនុស្សរាល់គ្នាត្រូវបានអនុញ្ញាតឲ្យប្រើឡើយ នៅពេលនិយាយជាមួយរុស្ស៊ី។ មិនត្រឹមបដិសេធសំណើឡើយ តំណាងរុស្ស៊ីក៏ទាត់ចោលលទ្ធផលនៃការស៊ើបអង្កេតទៅទៀត។
ឆ្លើយតបទៅនឹងការបដិសេធរបស់រុស្ស៊ី លោករដ្ឋមន្ត្រីការបរទេសហូឡង់ Blok មិនមានការភ្ញាក់ផ្អើលអ្វីឡើយ ហើយនៅតែទទូចឲ្យរុស្ស៊ីសហការជាមួយហូឡង់ និងអូស្ត្រាលីដើម្បីស្វែងរកការពិត។ ចំណែកឯតំណាងអាមេរិក Nikki Haley វិញក៏ចេញមុខទាមទារឲ្យរុស្ស៊ីទទួលខុសត្រូវចំពោះការបាញ់ទម្លាក់យន្តហោះ MH17 ផង។ លោកស្រី Haley លើកឡើងថា ទោះជារុស្ស៊ីប្រឹងប្រកែកក្ដី វាជារឿងគ្មានការសង្ស័យដែលរុស្ស៊ីពិតជាធ្វើឲ្យមានជម្លោះអ៊ុយក្រែន។
សូមបញ្ជាក់ថា យន្តហោះលេខ MH17 ដែលមានទិសដៅពីក្រុងអាំស្ទែដាំទៅគូឡាឡាំពួ ត្រូវបានបាញ់ទម្លាក់នៅពេលហោះពីលើតំបន់ភាគខាងកើតអ៊ុយក្រែនដែលកំពុងមានជម្លោះ និងត្រួតត្រាដោយក្រុមឧទ្ទាមគាំទ្រដោយរុស្ស៊ី។ មនុស្សលើយន្តហោះទាំង២៩៨នាក់បានបាត់បង់ជីវិតទាំងអស់ ឯអ្នកនៅពីក្រោយហេតុការណ៍នេះនៅមិនទាន់រកឃើញនៅឡើទេ ដោយភាគច្រើនចោទក្រុងមូស្គូ ព្រោះមីស៊ីលដែលបាញ់នោះជារបស់រុស្ស៊ី៕
Tag:
ហូឡង់
រុស្ស៊ី
MH17
© រក្សាសិទ្ធិដោយ thmeythmey.com