អន្តរជាតិ
សម្ព័ន្ធបក្សប្រឆាំងដឹកនាំដោយវីរៈបុរសឯករាជ្យទីម័រខាងកើត ឈ្នះឆ្នោតអាចបង្កើតរដ្ឋាភិបាលថ្មី 30, May 2018 , 3:44 pm
× ដូចការរំពឹងទុកសម្ព័ន្ធបក្សប្រឆាំងដែលដឹកនាំដោយវីរៈបុរសឯករាជ្យជាតិទីម័រខាងកើតលោក Xanana Gusmao ជាអ្នកទទួលជ័យជម្នះក្នុងសំឡេងភាគច្រើនក្នុងការបោះឆ្នោតសកលរបស់ទីម័រខាងកើត ដែលទើបតែប្រព្រឹត្តនៅដើមខែឧសភាកន្លងទៅ។ លទ្ធផលនេះ គឺជាក្តីសង្ឃឹមមួយរបស់ទីម័រខាងកើតក្នុងការបញ្ចៀសពីការជាប់គាំងនៃនយោបាយដូចអាណត្តិមុន។
តុលាការទីម័រខាងកើត នៅថ្ងៃ២៩ ខែឧសភា បានប្រកាសទទួលស្គាល់ថា សម្ព័ន្ធបក្សប្រឆាំងដែលមានបក្សបីបញ្ចូលគ្នា គឺបក្សសមាជជាតិសម្រាប់ការកសាងទីម័រខាងកើតឡើងវិញរបស់លោក Gusmao , បក្សរំដោះប្រជាជន និងបក្សយុវជន Khunto បានទទួលជ័យជម្នះក្នុងការបោះឆ្នោតថ្ងៃ១២ ឧសភា ដោយបានអាសនៈសរុប ៣៤ ក្នុងចំណោមអាសនៈសរុប ៦៥។ នេះបើយោងតាមការចុះផ្សាយរបស់សារព័ត៌មាន SBS New។
បក្សកាន់អំណាច The Fretilin របស់លោកនាយករដ្ឋមន្ត្រីផុតអាណត្តិ Mari Alkatiri បានទទួលបានសំឡេងគាំទ្រ ៣៤,២ភាគរយនៃសំឡេងឆ្និោតសរុប ហើយបក្សនេះក៏បានតវ៉ាជុំវិញបញ្ហាមិនប្រក្រតីក្នុងលទ្ធផលបោះឆ្នោតផងដែរ។ ប៉ុន្តែចុងក្រោយ តុលាការទីម័រខាងកើតបានសម្រេចច្រានចោលវិញ។
បើតាមការអះអាងរបស់មន្ត្រីជាន់ខ្ពស់នៃសម្ព័ន្ធបក្សប្រឆាំង លោក Fidelis Magalhaes លទ្ធផលនៃការបោះឆ្នោតនេះ អាចបញ្ចប់ភាពជាប់គាំងនយោបាយនៅក្នុងសភាទីម័រខាងកើតបានហើយ ។ លោក Fidelis Magalhaes បន្ថែមថា ទីម័រខាងកើតត្រូវតែមានរដ្ឋាភិបាលមួយ ដែលអាចមានសំឡេងភាគច្រើនដាច់ខាតនៅក្នុងសភា ។
យ៉ាងណាក៏ដោយ មន្ត្រីជាន់ខ្ពស់នៃបក្សឈ្នះឆ្នោតរូបនេះ មិនទាន់អាចបានបញ្ជាក់បាននៅឡើយនោះទេថាតើ អតីតប្រធានាធិបតី និងជាអតីតនាយករដ្ឋមន្ត្រីទីម័រខាងកើតលោក Xanana Gusmao នឹងត្រូវមកកាន់តំណែងនាយករដ្ឋមន្ត្រីជាថ្មីម្តងទៀតឬអត់ឡើយ។
គួរជម្រាបផងដែរថា ការបោះឆ្នោតរបស់ទីម័រខាងកើតនេះដែរ ធ្វើឡើងបន្ទាប់ពីរដ្ឋាភិបាលលោក Mari Alkatiri បានប្រកាសរំលាយសភានៅខែ មករា បន្ទាប់ពីរដ្ឋាភិបាល ដែលបានកើតចេញពីការបោះឆ្នោតខែ កក្កដា ឆ្នាំ២០១៧ បានជាប់គាំងនយោបាយ ដ្បិតមានការជំទាស់ពីបក្សប្រឆាំង ក្នុងការអនុវត្តលើច្បាប់សំខាន់របស់ប្រទេស។ កាលបោះឆ្នោតឆ្នាំ២០១៧ បក្ស Fretilin របស់លោកនាយករដ្ឋមន្ត្រី Mari Alkatiri ក៏បានសំឡេងអាសនៈ ២៣ ប៉ុណ្ណោះ ដែលសំឡេងនេះ មិនអាចធ្វើបានឡើយនៅក្នុងសភាទីម័រខាងកើត ប្រសិនបើមានការជំទាស់ពីបក្សប្រឆាំងនោះ ។
មេដឹកនាំបក្សឈ្នះឆ្នោតលោក Xanana Gusmao ធ្លាប់បម្រើការជាប្រធានាធិបតីទីមួយរបស់ទីម័រខាងកើត នៅក្នុងឆ្នាំ២០០២ ដល់ឆ្នាំ២០០៧ និងជានាយករដ្ឋមន្ត្រីនៅឆ្នាំ ២០០៧ ដល់ឆ្នាំ ២០១៥ ។ លោក Xanana Gusmao ក៏ជាវិរៈជន នាំទីម័រខាងកើតឲ្យទទួលបានឯករាជ្យពីគ្រប់គ្រងជាមួយនឹងសោដកម្មរបស់ម្ចាស់អាណានិគម ដែលមានទាំងឥណ្ឌូណេស៊ីផងដែរនោះ ៕
Tag:
ទីម័រខាងកើត
អាស៊ាន
© រក្សាសិទ្ធិដោយ thmeythmey.com