អន្តរជាតិ
គុយវ៉ែតស្វះស្វែងរកការគាំទ្រពី UN ដើម្បីបង្កើតបេសកកម្មការពារប្រជាជនប៉ាឡេស្ទីន 30, May 2018 , 9:59 pm
× គុយវ៉ែតកំពុងជំរុញឲ្យក្រុមប្រឹក្សាសន្តិសុខអង្គការសហប្រជាជាតិដាក់ចេញនូវវិធានការចាំបាច់ដើម្បីធានាការពារ និងការពារប្រជាជនប៉ាឡេស្ទីន។ សេចក្តីព្រាងដំណោះស្រាយនេះនឹងត្រូវដាក់ចូលឲ្យសមាជិកក្រុមប្រឹក្សានេះបោះឆ្នោត ប៉ុន្តែគេរំពឹងថា អាមេរិកនឹងប្រើសិទ្ធវេតូ។
នៅថ្ងៃអង្គារទី ២៩ ឧសភា គុយវ៉ែតបានបញ្ចេញសេចក្តីព្រាងដំណោះស្រាយមួយក្នុងនាមជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិដោយមានគោលដៅជំរុញឲ្យអង្គការសហប្រជាជាតិនេះធានាសុវត្ថិភាព និងសន្តិសុខរបស់ប្រជាជនប៉ាឡេស្ទីនផង។
យោងតាមទីភ្នាក់ងារព័ត៌មាន AFP សេចក្តីព្រាងដំណោះស្រាយដែលតំណាងឲ្យសំឡេងប្រទេសអារ៉ាប់នេះនឹងត្រូវដាក់ចូលក្នុងកិច្ចប្រជុំនៅថ្ងៃព្រហស្បតិ៍ទី ៣១ ខែឧសភា ហើយវាត្រូវបានគុយវ៉ែតកែប្រែឡើងវិញផងដែរ។ ដំបូងឡើយ សេចក្តីព្រាងនេះមានជំហររឹងត្អឹងដោយទាមទារឲ្យមានការបង្កើតបេសកកម្មមួយការពារសុវត្ថិភាពប្រជាជនប៉ាឡេស្ទីន ។
ក្រោយការកែតម្រូវរួច សេចក្តីពីព្រាងនេះត្រឹមទទូចឲ្យអគ្គលេខាធិការអង្គការសហប្រជាជាតិផ្តល់អនុសាសន៍ និងអំពាវនាវឲ្យសមាជិកក្រុមប្រឹក្សាឯកភាពគ្នាដាក់ចេញវិធានការការពារប្រជាជនប៉ាឡេស្ទីននៅតំបន់កាហ្សាដែលកំពុងរងការគំរាមកំហែង។ ប៉ុន្តែទោះជាបែបនេះក្តី ប្រភពការទូតបានបញ្ជាក់ថា អាមេរិកទំនងជានឹងប្រើប្រាស់សិទ្ធិជំទាស់របស់ខ្លួនផង។
យ៉ាងណាក៏ដោយចុះ គុយវ៉ែតរំពឹងទទួលបានការគាំទ្រច្រើនពីប្រទេសសមាជិកក្រុមប្រឹក្សា ដើម្បីបង្ហាញឲ្យឃើញថា អាមេរិកកំពុងដកខ្លួនឆ្ងាយពីការដោះស្រាយបញ្ហាប៉ាឡេស្ទីន និងអ៊ីស្រាអែលនោះ។
យ៉ាងណាក៏ដោយចុះ មហាអំណាចធំពីរអង់គ្លេស និងបារាំងនៅតែត្អូញត្អែរចំពោះសេចក្តីព្រាងដំណោះស្រាយនេះព្រោះគេមិនបានឃើញច្បាស់ពីវិសាលភាពនៃបេសកកម្មការពារប្រជាជនប៉ាឡេស្ទីនឡើយ។ តែអាមេរិកវិញ បានទិតៀនចំៗថា ដំណោះស្រាយនេះមាននិន្នាការលម្អៀងប្រឆាំងនឹងអ៊ីស្រាអែល។
ឯកអគ្គរដ្ឋទូតអ៊ីស្រាអែល Danny Danon បានទិតៀនដំណោះស្រាយនេះរួចទៅហើយ ដោយចោទថា វាមានគោលដៅជួយការពារក្រុមជ្រុលនិយមហាម៉ាសនៅតំបន់កាហ្សា៕
Tag:
គុយវ៉ែត
ប៉ាឡេស្ទីន
UN
អ៊ីស្រាអែល
© រក្សាសិទ្ធិដោយ thmeythmey.com