អន្តរជាតិ
ឥណ្ឌា និងឥណ្ឌូណេស៊ីដំឡើងកម្រិតទំនាក់ទំនងទ្វេភាគីទៅដៃគូយុទ្ធសាស្ត្រគ្រប់ជ្រុងជ្រោយ 31, May 2018 , 8:19 pm
× ប្រមុខរដ្ឋាភិបាលឥណ្ឌាលោក នារិន្ទ្រា ម៉ូឌី និងប្រមុខរដ្ឋឥណ្ឌូណេស៊ីលោក ចូកូ វីដូដូ បានឯកភាពគ្នាដើម្បីដំឡើងកម្រិតការទូតទ្វេភាគីទៅជាដៃគូយុទ្ធសាស្ត្រគ្រប់ជ្រុងជ្រោយនៅថ្ងៃ ៣០ ខែឧសភានេះ។ មេដឹកនាំទាំងពីរប្តេជ្ញាពង្រឹងកិច្ចសហប្រតិបត្តិការដើម្បីធានាវិបុលភាព សន្តិភាព និងសន្តិសុខតំបន់ឥណ្ឌូប៉ាស៊ីហ្វិក។
នាយករដ្ឋមន្ត្រីឥណ្ឌាលោក នារិន្ទ្រា ម៉ូឌី បំពេញទស្សនកិច្ចផ្លូវការនៅប្រទេសឥណ្ឌូណេស៊ីចាប់ពីថ្ងៃ ២៩ ដល់ថ្ងៃ ៣០ ខែឧសភា។ ក្នុងដំណើរទស្សនកិច្ចនេះលោក ម៉ូឌី បានជួបពិភាក្សាជាមួយប្រមុខរដ្ឋឥណ្ឌូណេស៊ីលោក ចូកូ វីដូដូ ដោយជំរុញទំនាក់ទំនងនិងកិច្ចសហប្រតិបត្តិការទ្វេភាគីផងដែរ។
អ្វីដែលសំខាន់មេដឹកនាំទាំងពីរបានយល់ព្រមបង្កើនទំនាក់ទំនងការទូតឲ្យដល់កម្រិតខ្ពស់បំផុតភាពជាដៃគូយុទ្ធសាស្ត្រគ្រប់ជ្រុងជ្រោយ និងប្តេជ្ញាពង្រឹងកិច្ចសហប្រតិបត្តិការទ្វេភាគីលើគ្រប់វិស័យជាពិសេសសន្តិសុខ និងពាណិជ្ជកម្ម។
មេដឹកនាំទាំងពីរបញ្ជាក់តាមសេចក្តីថ្លែងការណ៍រួមដែលចុះផ្សាយក្នុងគេហទំព័រក្រសួងការបរទេសឥណ្ឌាដូច្នេះ៖«យើងស្វាគមន៍ការដំឡើងកម្រិតទំនាក់ទំនងការទូតរវាងប្រទេសទាំងពីរដល់កម្រិតភាពជាដៃគូយុទ្ធសាស្ត្រគ្រប់ជ្រុងជ្រោយ រួមទាំងការបង្កើតយន្តការថ្មីៗផ្សេងទៀតដូចជាកិច្ចសន្ទនាសន្តិសុខ និងការចុះកិច្ចព្រមព្រៀងកិច្ចសហប្រតិបត្តិការការពារជាតិផង»។
ក្រៅពីដំឡើងកម្រិតភាពជាដៃគូ ភាគីទាំងពីរក៏ប្តេជ្ញាប្រឹងប្រែងបន្ថែមដើម្បីសម្រេចឲ្យបានទំហំពាណិជ្ជកម្មទ្វេភាគី ៥០ ពាន់លានដុល្លារនៅឆ្នាំ ២០២៥ និងលើកកម្ពស់ការផ្សាភ្ជាប់តាមរយៈការកសាងហេដ្ឋារចនាសម្ព័ន្ធ។ មេដឹកនាំទាំងពីរក៏នឹងសហការគ្នាបន្ថែមឲ្យបានជិតស្និទ្ធក្នុងការជំរុញការបញ្ចប់ការចរចាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ (RCEP) ដែលមានភាពត្រឹមត្រូវ គ្រប់ជ្រុងជ្រោយ និងមានតុល្យភាពហើយអាចផ្តល់ប្រយោជន៍ដល់សមាជិកទាំងអស់។
ពាក់ព័ន្ធនឹងសន្តិសុខដែនសមុទ្រ លោក ម៉ូឌី និងលោក ចូកូ កត់សម្គាល់ផងដែរពីសារសំខាន់នៃការសម្រេចឲ្យបាននូវតំបន់ឥណ្ឌូប៉ាស៊ីហ្វិកដែលសេរី បើកចំហរ មានវិបុលភាព តម្លាភាព និងផ្អែកសំខាន់លើច្បាប់។ គូរភាគីចង់សំដៅលើការបន្តរក្សាសេរីភាពនៃការធ្វើនាវាចរណ៍ សេរីភាពនៃការហោះហើរ ស្របតាមច្បាប់អន្តរជាតិជាពិសេសច្បាប់សមុទ្រ UNCLOS។
ក្រៅពីនេះការពង្រឹងកិច្ចសហប្រតិបត្តិការទ្វេភាគីរវាងប្រទេសទាំងពីរក៏នឹងរួមចំណែកឆ្លើយ និងដោះស្រាយបញ្ហាសន្តិសុខសមុទ្រផ្សេងទៀតរួមមានទាំងការជួញដូរមនុស្ស ជួញដូរអាវុធ នេសាទខុសច្បាប់ គ្រឿងញៀន ការលាងលុយ និងចលនាភេរវកម្មផងដែរ។
តាមពិតទៅ ការដំឡើងកម្រិតភាពជាដៃគូជាមួយបងធំអាស៊ាននេះ ជារឿងអាទិភាព និងជាផ្នែកមួយនៃគោលនយោបាយការបរទេសរបស់លោកនាយករដ្ឋមន្ត្រី នារិន្ទ្រា ម៉ូឌី «ការធ្វើសកម្មភាពនៅទិសខាងកើត» (Act East Policy) ដែលប្តូរមកពីគោលនយោបាយសំឡឹងមកទិសខាងកើត (Look East Policy) ផង។ មហាយក្សអាស៊ីខាងត្បូងនេះមានគោលបំណងបន្តពង្រឹងចំណងមិត្តភាពជាមួយរដ្ឋអាស៊ានឲ្យកាន់តែជិតដិតដើម្បីពង្រឹងឥទ្ធិពលរបស់ខ្លួនទប់ទល់ជាមួយមហាយក្សចិនផងដែរ៕
Tag:
ឥណ្ឌា
ឥណ្ឌូណេស៊ី
នារិន្ទ្រា ម៉ូឌី
ចូកូ វីដូដូ
© រក្សាសិទ្ធិដោយ thmeythmey.com