អន្តរជាតិ
ប្រមុខការទូតរុស្ស៊ីអញ្ជើញលោក គីម ជុងអ៊ុន ទៅទស្សនកិច្ចនៅរុស្ស៊ី 31, May 2018 , 6:19 pm
× ស្ថិតក្នុងដំណើរទស្សនកិច្ចនៅក្រុងព្យុងយ៉ាង ថ្ងៃព្រហស្បតិ៍ទី ៣១ ខែមិថុនា លោក សឺហ្គេ ឡាវរ៉ូវ ប្រមុខការទូតរុស្ស៊ី បានអញ្ជើញមេដឹកនាំកំពូលកូរ៉េខាងជើងលោក គីម ជុងអ៊ុន ទៅទស្សនកិច្ចនៅរុស្ស៊ី។ រុស្ស៊ីធ្លាប់អញ្ជើញមេដឹកនាំកូរ៉េខាងជើងម្តងដែរឆ្នាំ ២០១៥ ប៉ុន្តែក្រោយមកលោក គីម សម្រេចលុបចោលគម្រោងទស្សនកិច្ចវិញ។
លោក សឺហ្គេ ឡាវវ៉ូវ អញ្ជើញលោក គីម ផ្ទាល់មាត់ ហើយលោកក៏បានបញ្ជាក់ពីជំហរឥតងាករេរបស់រុស្ស៊ីក្នុងការគាំទ្រស្ថិរភាព សន្តិភាព និងវិបុលភាពនៅឧបទ្វីបកូរ៉េ។ នេះបើតាមសេចក្តីប្រកាសរបស់ក្រសួងការបរទេសរុស្ស៊ី។
«សូមអញ្ជើញមកទស្សនកិច្ចនៅរុស្ស៊ី។ យើងពិតជារីករាយបើសិនជាលោកអញ្ជើញទៅទស្សនកិច្ចនៅប្រទេសយើង»។ លោក ឡាវរ៉ូវ ប្រាប់លោក គីម បែបនេះ។
លោកបន្តថា៖ «យើងគាំទ្រសន្តិសុខ សន្តិភាព ស្ថិរភាព និងវិបុលភាពនៅឧបទ្វីបកូរ៉េ និងតំបន់ចុងបូព៌ាទាំងមូលផងដែរ»។
ក្នុងជំនួបនេះផងដែរ ប្រមុខការទូតខាងលើក៏បានពាំនាំសារសរសើររបស់លោក វ្ល៉ាឌីមៀ ពូទីន មកប្រាប់លោក គីម ផងដែរចំពោះការវិវត្តន៍ដ៏ល្អប្រសើរនៃឧបទ្វីបកូរ៉េ។ បើតាមលោក ឡាវវ៉ូវ លោក ពូទីន គាំទ្ររាល់គំនិតផ្តួចផ្តើមរក្សាសន្តិភាពដែលបង្កើតឡើងដោយមេដឹកនាំកូរ៉េទាំងពីរក្នុងកិច្ចប្រជុំអន្តរកូរ៉េកាលពីចុងខែមេសាកន្លងមក។
«យើងខ្ញុំនិងប្រធានាធិបតី ពូទីន ពិតជាមានសុទិដ្ឋិនិយមចំពោះសេចក្តីថ្លែងការណ៍ ប៉ាន់មុនជុម ដែលលោក និងលោកប្រធានាធិបតីកូរ៉េខាងត្បូង មូន ចេអ៊ីន បានចុះហត្ថលេខារួមគ្នា។ យើងត្រៀមខ្លួនហើយដើម្បីចូលរួមចំណែកអនុវត្តសេចក្តីថ្លែងការណ៍នេះក្នុងនោះមានការលើកឡើងពីគម្រោងការកសាងផ្លូវរថភ្លើងដែលមានការចូលរួមពីរុស្ស៊ីដែរ»។ លោក ឡាវរ៉ូវ បាននិយាយបែបនេះ។
តាមពិតទៅ ក្រុងម៉ូស្គូ មានបំណងចង់នាំកូរ៉េខាងត្បូងឲ្យចូលរួមក្នុងគម្រោងសាងសង់ផ្លូវរថភ្លើង និងសង់បំពង់ឧស្ម័នឆ្លងកាត់ឧបទ្វីបកូរ៉េ។
តាមពិតទៅ លោក ឡាវរ៉ូវ អញ្ជើញទៅទស្សនកិច្ចនៅកូរ៉េខាងជើងតបការអញ្ជើញរបស់សមភាគីកូរ៉េខាងជើង លោក Ri Yong Ho។ ដំណើរទស្សនកិច្ចនេះកើតឡើងនៅពេលដែលប្រទេសទាំងពីររៀបចំខួបលើកទី ៧០ នៃការបង្កើតចំណងការទូតរួមគ្នានៅឆ្នាំនេះ ហើយក៏ចំពេលដែលកូរ៉េមន្ត្រីអាមេរិក និងកូរ៉េខាងជើងបន្តការងារសស្រាក់សស្រាំដើម្បីរៀបចំជំនួបកំពូលរវាងលោក គីម ជុងអ៊ុន ជាមួយលោក ដូណាល់ ត្រាំ នៅសិង្ហបុរីដែរ៕
Tag:
គីម ជុងអ៊ុន
សឺហ្គេ ឡាវរ៉ូវ
កូរ៉េខាងជើង
© រក្សាសិទ្ធិដោយ thmeythmey.com