អន្តរជាតិ
រដ្ឋាភិបាលលោក មហាធៀ បង្កើត«មូលនិធិនៃក្តីសង្ឃឹម»សម្រាប់ឲ្យពលរដ្ឋជួយវិភាគទានដោះបំណុលរដ្ឋ 01, Jun 2018 , 2:11 pm
× រដ្ឋាភិបាលម៉ាឡេស៊ីដឹកនាំដោយលោក មហាធៀ មហាម៉ាត់ សម្រេចបង្កើតមូលនិធិពិសេសដែលមានឈ្មោះថា «ក្តីសង្ឃឹម»ដើម្បីបើកឲ្យសាធារណជនម៉ាឡេស៊ីបរិច្ចាគលុយជួយដោះបំណុលរបស់រដ្ឋ។ គេនឹកឃើញដល់អំឡុងឆ្នាំ ១៩៩៨ពេលប្រជាជនកូរ៉េខាងត្បូងប្រមូលគ្រឿងអលង្ការជាមាសបរិច្ចាកជួនរដ្ឋដើម្បីដោះបំណុលពេលប្រទេសជិតក្ស័យធននោះ។
ក្រោយប្រកាសពីកង្វល់ជុំវិញការកើនឡើងនៃបំណុលសាធារណៈដល់កម្រិតប្រកាសអាសន្ន លោក មហាធៀ បានសម្រេចប្រកាសបង្កើតមូលនិធិនៃក្តីសង្ឃឹមនៅថ្ងៃ ៣០ ខែឧសភា។ រដ្ឋាភិបាលម៉ាឡេស៊ីសង្ឃឹមថា ប្រជាជនម៉ាឡេស៊ីជាអ្នកស្នេហាជាតិមានសមានចិត្តចូលរួមចំណែកតិចក្តីច្រើនក្តីដើម្បីជួយរដ្ឋាភិបាលដោះបំណុល។
សារព័ត៌មាន Straits Times ក្រសួងហិរញ្ញវត្ថុជាអ្នកទទួលខុសត្រូវទទួលមូលនិធិរដ្ឋនេះពីប្រជាជន ហើយលោក មហាធៀ បានបញ្ជាក់ដែរថា វាជារឿងចាំបាច់បំផុតដើម្បីធានាថា វិភាគទានរបស់ប្រជាជនទៅដល់ក្រសួងហិរញ្ញវត្ថុដោយគ្មានបាត់បង់។
«ប្រជាជនម៉ាឡេស៊ីច្រើនណាស់មានឆន្ទៈផ្តល់វិភាគទានដល់រដ្ឋាភិបាលដើម្បីដោះបំណុល ក្រោយដឹងពីស្ថានភាពហរិញ្ញវត្ថុរបស់ប្រទេសជាតិ»។ លោក មហាធៀ បានថ្លែងបែបនេះប្រាប់អ្នកសារព័ត៌មានក្រោយដឹកនាំប្រជុំគណៈរដ្ឋមន្ត្រីនៅថ្ងៃពុធទី ៣០ខែឧសភា។
លោក បន្តថា៖ «យើងស្វាគមន៍សកម្មភាពស្នេហាជាតិរបស់ប្រជាជនយើង ហើយយើងបង្ហាញការគោរពដល់ពួកគាត់ដែរ»។
កាលពីប៉ុន្មានសប្តាហ៍មុន លោក មហាធៀ បានប្រកាសថាស្ថានភាពបំណុលសាធារណៈរបស់ម៉ាឡេស៊ីកើនដល់ ២៥១ ពាន់លានដុល្លារអាមេរិកដែលជាកម្រិតប្រកាសអាសន្នមួយ ហើយលោកបន្ទោសរដ្ឋាភិបាលលោក ណាជីប រ៉ាហ្សាក់ដែលធ្វើឲ្យស្ថានភាពហិរញ្ញវត្ថុរដ្ឋដុនដាបបែបនេះ។
ក្រោយពីប្រកាសពីស្ថានភាពលំបាកផ្នែកហិរញ្ញវត្ថុរបស់រដ្ឋ ប្រមុខរដ្ឋាភិបាលរូបនេះបានសម្រេចលុបចោលកិច្ចព្រមព្រៀងធំៗមួយចំនួនដូចជាគម្រោងសង់ផ្លូវរថភ្លើងលឿនទៅសិង្ហបុរី កាត់បន្ថយលុយរដ្ឋមន្ត្រី និងបញ្ឈប់ការងារមន្ត្រិជាប់កិច្ចសន្យាជាច្រើនពាន់នាក់ផងដែរ។
ដោយឡែក រដ្ឋមន្ត្រីក្រសួងហិរញ្ញវត្ថុម៉ាឡេស៊ិ Lim Guan Eng បានស្វាគមន៍ឥរិយាបថវិជ្ជមានរបស់ប្រជាជនម៉ាឡេស៊ីក្នុងការចូលរួមគាំទ្ររដ្ឋាភិបាលដោះស្រាយបំណុលរដ្ឋដែរ។ លោកបានអះអាងថា ប្រជាជនម៉ាឡេស៊ីហាក់យល់ដឹងច្បាស់ពីបញ្ហា ហើយពួកគេស្ម័គ្រចិត្តចែករម្លែកថវិកាដែលខ្លួនមានដើម្បីដោះបន្ទុកធ្ងន់របស់ប្រជាជនថែមទៀតផង។
ការបង្កើតមូលនិធិ និងទទួលវិភាគទានពីប្រជាជននេះធ្វើឲ្យគេនឹកឃើញដល់វិបត្តិហិរញ្ញវត្ថុនៅអាស៊ីឆ្នាំ ១៩៩៨ ពេលដែលប្រជាជនកូរ៉េខាងត្បូងរាប់លាននាក់ស្ម័គ្រចិត្តចូលរួមគ្នាបរិច្ចាគទ្រព្យធនផ្ទាល់ខ្លួនជួយដោះបំណុលប្រទេស ខណៈដែលរដ្ឋអាស៊ីមួយនេះក្បែរនឹងក្ស័យធន។
១៩ ឆ្នាំមុន ក្រុមហ៊ុន និងធនាគារជាច្រើនក្ស័យធន ដោយសារវិបត្តិបំណុល និងប្រជាជនបាត់បង់ការងារច្រើនសនឹ្ធកក្រោយវិបត្តិហិរញ្ញវត្ថុកើតឡើង។ ចំណែករដ្ឋាភិបាលកូរ៉េខាងត្បូងបានទទួលកញ្ចប់ហិរញ្ញវត្ថុមានទំហំ ៥៨ពាន់លានដុល្លាររបស់មូលនិធិរូបីយវត្ថុអន្តរជាតិ (IMF) ដោយថវិកានេះមានភ្ជាប់ជាមួយលក្ខខណ្ឌតឹងតែងជាច្រើនដូចជាការធ្វើសេរីភាវូបនីយកម្មពាណិជ្ជកម្ម កែទម្រង់អភិបាលកិច្ច ទីផ្សារការងារ និងវិស័យច្រើនផ្សេងទៀត។
ខែមករាឆ្នាំ ១៩៩៨ គេឃើញមានយុទ្ធនាការថ្នាក់ជាតិមួយដែលមានគោលដៅអំពាវនាវឲ្យប្រជាជនកូរ៉េខាងត្បូងបរិច្ចាគគ្រឿងអលង្ការជាមាស។ ជាការឆ្លើយតបប្រជាជនរាប់លាននាក់បន្តកន្ទុយគ្នាយកគ្រឿងអលង្ការខ្លួនជាមាសមកបរិច្ចាគជូនរដ្ឋ។ ប្រជាជនសាមញ្ញបរិច្ចាគចិញ្ចៀន ខ្សែក ខ្សែដៃ ខណៈដែលក្រុមអត្តពលិកនាំគ្នាយកមេដាយ និងពានរង្វាន់មាសរបស់ខ្លួនមកបរិច្ចាគដូចគ្នាដើម្បីជួយដោះបំណុលរដ្ឋ។ ដោយសារកាយវិកាគួរឲ្យកោតស្ញប់ស្ញែងរបស់ប្រជាពលរដ្ឋបែបនេះហើយ ទើបរដ្ឋាភិបាលកូរ៉េខាងត្បូងមានលទ្ធភាពដោះបំណុលមូលនិធិរូបីយវត្ថុអន្តរជាតិបាន និងរួចផុតពីវិបត្តិនោះ៕
Tag:
មហាធៀ មហាម៉ាត់
ម៉ាឡេស៊ី
បំណុលរដ្ឋ
វិបត្តិសេដ្ឋកិច្ច
© រក្សាសិទ្ធិដោយ thmeythmey.com