អន្តរជាតិ
អង្គការលើកលែងទោសអន្តរជាតិ ទារឲ្យមានការកាត់ទោសអគ្គមេបញ្ជាការទ័ពមីយ៉ាន់ម៉ា បទឧក្រិដ្ឋប្រឆាំងមនុស្សជាតិ 27, Jun 2018 , 9:39 pm
× អង្គការលើកលែងទោសអន្តរជាតិ (Amnesty International) បានចេញមុខចោទប្រកាន់ថា ប្រមុខយោធា និងមន្ត្រីជាន់ខ្ពស់មីយ៉ាន់ម៉ាជាច្រើនរូបទៀតថាជាប់ពាក់ព័ន្ធនឹងបទឧក្រិដ្ឋប្រឆាំងមនុស្សជាតិ និងទាមទារឲ្យមានការកាត់ទោសនៅតុលាការព្រហ្មទណ្ឌអន្តរជាតិផង។ នេះក៏ដោយសារមន្ត្រីទាំងនេះទទួលខុសត្រូវលើការវាយប្រហារជាប្រព័ន្ធប្រឆាំងជនជាតិភាគតិចម៉ូស្លីមរ៉ូហ៊ីងយ៉ាកន្លងមក។
បញ្ហាចម្រូងចម្រាសពាក់ព័ន្ធនឹងវិបត្តិជនភៀសខ្លួនរ៉ូហ៊ីងយ៉ានៅមីយ៉ាន់ម៉ាកំពុងតែកើនកម្តៅទៀតនៅពេលនេះ ក្រោយអង្គការលើកលែងទោសអន្តរជាតិបញ្ចេញរបាយការណ៍មួយចោទប្រកាន់ថា មន្ត្រីយោធាជាន់ខ្ពស់មីយ៉ាន់ម៉ាប្រព្រឹត្តបទឧក្រិដ្ឋប្រឆាំងមនុស្សជាតិ។
តាមរយៈរបាយការណ៍ថ្មីកម្រាស់១៨៦ទំព័រ ដែលចេញផ្សាយនៅថ្ងៃ ២៧ ខែមិថុនានេះ អង្គការលើកលែងទោសអន្តរជាតិបានអះអាងថា ខ្លួនបានប្រមូលផ្តុំភស្តុតាងត្រឹមត្រូវ និងគួរឲ្យទុកចិត្តបាន ដែលបង្ហាញថា អគ្គមេបញ្ជាការកងទ័ពមីយ៉ាន់ម៉ាលោក Min Aung Hlaing និងមន្ត្រីចំនួន ១២ នាក់ផ្សេងទៀតជាប់ពាក់ព័ន្ធនឹងបទឧក្រិដ្ឋប្រឆាំងមនុស្សជាតិ។ បទឧក្រិដ្ឋនេះត្រូវបានប្រព្រឹត្តក្នុងយុទ្ធនាការបោសសម្អាតជនជាតិភាគតិចរ៉ូហ៊ីងយ៉ានៅរដ្ឋ Rakhine នៅភាគីខាងជើងកន្លងមក។
«ការផ្ទុះឡើងនៃហិង្សារួមមានការធ្វើឃាត រំលោភ ទារុណកម្ម ដុតសម្លាប់ និងបង្អត់អាហារដែលរៀបចំឡើងដោយកងកម្លាំងសន្តិសុខមីយ៉ាន់ម៉ានៅក្នុងភូមិនានាក្នុងរដ្ឋ Rakhine មិនមែនត្រឹមជាសកម្មភាពព្រៃផ្សៃរបស់ទាហានឬអង្គភាពទេ។ វាជាភស្តុតាងធំដូចភ្នំដែលបញ្ជាក់ថា សកម្មភាពនេះជាផ្នែកមួយនៃការរៀបចំឡើងដោយមានរចនាសម្ព័ន្ធត្រឹមត្រូវ ដោយវាជាការវាយប្រហារជាប្រព័ន្ធប្រឆាំងជនជាតិរ៉ូហ៊ីងយ៉ា»។ នេះជាការអះអាងរបស់ទីប្រឹក្សាជាន់ខ្ពស់របស់អង្គការលើកលែងទោសអន្តរជាតិ Matthew Wells ។
ក្រៅពីចោទប្រកាន់មន្ត្រីយោធាមីយ៉ាន់ម៉ា ស្ថាប័នសិទ្ធិមនុស្សអន្តរជាតិនេះក៏បានទាមទារឲ្យមានការបញ្ជូនសំណុំរឿងបទឧក្រិដ្ឋប្រឆាំងមនុស្សជាតិនៅ Rakhine នេះទៅតុលាការព្រហ្មទណ្ឌអន្តរជាតិថែមទៀតផងដើម្បីមានការស៊ើបអង្កេត និងកាត់ទោសអ្នកប្រព្រឹត្តបទល្មើស។ យ៉ាងណាក៏ដោយ មីយ៉ាន់ម៉ាក៏ធ្លាប់ច្រានចោលការអំពាវនាវឲ្យស្ថាប័នយុត្តាធិការអន្តរជាតិនេះស៊ើបអង្កេតបទឧក្រិដ្ឋក្នុងប្រទេសខ្លួនដែរ ដោយសារលើហេតុផលថា ខ្លួនមិនមែនជាភាគីនៃលក្ខន្តិកៈទីក្រុងរ៉ូមស្តីពីតុលាការព្រហ្មទណ្ឌអន្តរជាតិឡើយ។
អ្នកប្រឹក្សាអង្គការលើកលែងទោសខាងលើបានបន្ថែមដូច្នេះ៖« អ្នកទាំងឡាយណាដែលមានបាតដៃប្រឡាក់ឈានមានទាំងអគ្គមេបញ្ជាការកងទ័ព Min Aung Hlaing ហើយជននេះត្រូវតែទទួលខុសត្រូវចំពោះរាល់តួនាទីរបស់ខ្លួនក្នុងការបញ្ជា និងប្រពឹត្តបទឧក្រិដ្ឋប្រឆាំងមនុស្សជាតិ និងរាល់ការបំពានសិទ្ធិមនុស្សធ្ងន់ធ្ងរផ្សេងទៀតដែលស្ថិតនៅក្រោមច្បាប់អន្តរជាតិដែរ»។
តាមពិតទៅ ការបញ្ចេញរបាយការណ៍នេះនេះធ្វើឡើងប៉ុន្មានថ្ងៃប៉ុណ្ណោះក្រោយសហភាពអឺរ៉ុបបញ្ចេញទណ្ឌកម្មប្រឆាំងមន្ត្រីសន្តិសុខមីយ៉ាន់ម៉ាប្រាំពីរនាក់នោះដោយចោទថា អ្នកទាំងនេះរំលោភបំពានសិទ្ធិមនុស្សធ្ងន់ធ្ងរ។ ប៉ុន្តែអគ្គមេបញ្ជាការកំពូល Min Aung Hlaing មិនមានឈ្មោះក្នុងបញ្ជីខ្មៅអឺរ៉ុបឡើយ។
សូមបញ្ជាក់ថា ប្រជាជនរ៉ូហ៊ីងយ៉ាង យ៉ាងហោចណាស់ប្រាំពីរសែននាក់ត្រូវបង្ខំចិត្តរត់ភៀសខ្លួនទៅកាន់ប្រទេសបង់ក្លាដែស ក្រោយមានការបង្ក្រាបរបស់ក្រុមយោធានៅលើចលនាវាយប្រហារមួយរបស់ក្រុមជ្រុលនិយមនៅខែសីហាឆ្នាំ ២០១៧ ក្នុងរដ្ឋ Rakhine។
ខាងអង្គការសហប្រជាជាតិបានចាត់ទុកចលនាយោធានេះជាការបោសសម្អាតពូជសាសន៍ផងដែរព្រោះវាមានរបាយការណ៍ពីការធ្វើទុក្ខបុកម្នេញ សម្លាប់រង្គាល និងរំលោភផ្លូវភេទប្រឆាំងជនជាតិភាគតិចនេះផង។ យ៉ាងណាក៏ដោយ ខាងយោធាមីយ៉ាន់ម៉ាទាត់ចោលការចោទប្រកាន់នេះ និងអះអាងថាខ្លួនមិនដែលបានវាយប្រហារឬដាក់គោលដៅលើជនជាតិភាគតិចរ៉ូហ៊ីងយ៉ានេះឡើយ៕
Tag:
អង្គការលើកលែងទោសអន្តរជាតិ
មីយ៉ាន់ម៉ា
រ៉ូហ៊ីងយ៉ា
© រក្សាសិទ្ធិដោយ thmeythmey.com