អន្តរជាតិ
ប្រធានាធិបតីទីម័រខាងកើត ស្កាត់ជួបសមភាគីឥណ្ឌូណេស៊ីលើកដំបូងដើម្បីពង្រឹងកិច្ចសហប្រតិបត្តិការ 27, Jun 2018 , 10:19 pm
× ប្រធានាធិបតីទីម័រខាងកើតលោក Francisco Guterres នឹងបំពេញទស្សនកិច្ចទៅកាន់ឥណ្ឌូណេស៊ី នៅសប្តាហ៍នេះជាលើកដំបូងដើម្បីពង្រឹង និងស្វែងរកទំនាក់ទំនង និងកិច្ចសហប្រតិបត្តិការជាមួយនឹងឥណ្ឌូណេស៊ីបន្ថែម ខណៈស្ថានភាពរដ្ឋក្មេងខ្ចីប្រចាំតំបន់មួយនេះ នៅមិនទាន់មានភាពល្អប្រសើរនៅឡើយនោះ។
បើមិនមានការប្រែប្រួលនោះទេ នៅថ្ងៃ២៨ មិថុនានេះ លោកប្រធានាធិបតីទីម័រខាងកើត Francisco Guterres នឹងចាប់ផ្តើមដំណើរទស្សនកិច្ចផ្លូវការលើកដំបូងទៅកាន់ឥណ្ឌូណេស៊ី និងជួបពិភាក្សា ជាមួយនឹងលោកប្រធានាធិបតី Joko Widodo ដើម្បីពង្រឹងកិច្ចសហប្រតិបត្តិការទ្វេភាគី ជាពិសេសលើវិស័យសេដ្ឋកិច្ច និងពាណិជ្ជកម្ម។ នេះបើយោងតាមការចុះផ្សាយរបស់សារព័ត៌មាន Antara News នៅចុងសប្តាហ៍មុន។
តាមការបញ្ជាក់របស់អ្នកនាំពាក្យក្រសួងការបរទេសឥណ្ឌូណេស៊ី Arrmanatha Nasir ឥណ្ឌូណេស៊ី តែងតែចាត់ទុកទីម័រខាងកើត ជាអ្នកជិតខាងមួយដ៏ជិតស្និទ្ធបំផុតមួយ ដែលទំនាក់ទំនង ប្រទេសទាំងពីរ ក៏បានស្តែងឡើងតាមរយៈទំនាក់ទំនងជិតស្និទ្ធទាំងផ្នែកសេដ្ឋកិច្ច និងប្រជាជន។
អ្នកនាំពាក្យដដែលនោះ ក៏បានមើលឃើញពីគម្រោងទស្សនកិច្ចរបស់មេដឹកនាំទីម័រខាងកើតនាពេលខាងមុខដ៏ខ្លីនេះ ថា ជាឱកាសមួយសម្រាប់មេដឹកនាំប្រទេសទាំងពីរពិភាក្សាពីសក្តានុពលនៃកិច្ចសហប្រតិបត្តិការ ដែលអាចអភិវឌ្ឍបានរួមគ្នាមានទាំងផ្នែកថាមពល ហិរញ្ញវត្ថុ ធនាគារ និងទេសចរណ៍ជាដើម។
បើតាមប្រភពព័ត៌មានដដែលនោះ សេដ្ឋកិច្ចទីម័រខាងត្បូង និងឥណ្ឌូណេស៊ី ពិតជាមានការពឹងពាក់គ្នាជាច្រើន ជាពិសេសទីម័រខាងកើត ដែលជាប្រទេសទើបតែបានឯករាជ្យថ្មី និងជាវ័យក្មេងជាងគេប្រចាំតំបន់ ពិតជាត្រូវការវិនិយោគដូចជាឥណ្ឌូណេស៊ី។
តាម Antara News មកទល់ពេលនេះ មានសហគ្រាសរដ្ឋឥណ្ឌូណេស៊ីចំនួនប្រាំបួន និងក្រុមហ៊ុនឯកជនឥណ្ឌូណេស៊ីរាប់រយក្រុមហ៊ុន កំពុងតែប្រតិបត្តិការ និងវិនិយោគលុយរាប់លានដុល្លារនៅក្នុងប្រទេសទីម័រខាងកើត។
គួរជម្រាបផងដែរ ទីម័រខាងកើត ទើបតែបានទទួលបានឯករាជ្យផ្លូវការនៅឆ្នាំ២០០២នោះទេ។ ធៀបជាមួយនឹងប្រទេសក្នុងតំបន់ទីម័រខាងកើត ជារដ្ឋក្មេងខ្ចីជាងគេ និងទំហំសេដ្ឋកិច្ចតូចជាងគេ។ បច្ចុប្បន្នទីម័រខាងកើត ក៏ស្ថិតនៅក្នុងបញ្ជីឈ្មោះប្រទេសក្រីក្របំផុតនៃពិភពលោករបស់អង្គការសហប្រជាជាតិផងដែរ៕
Tag:
ទីម័រខាងកើត
ឥណ្ឌូណេស៊ី
© រក្សាសិទ្ធិដោយ thmeythmey.com