អន្តរជាតិ
កូរ៉េខាងជើងថា ទំនាក់ទំនងត្រាំ-គីម នៅតែល្អ តែថ្នាក់ក្រោមលោក ត្រាំ ចេះតែបង្ករឿងអត់ហេតុផល 24, Oct 2019 , 11:01 am
×
ដោយ៖ ងូន សុភាវត្តី
ដើរចេញពីតុចរចានៅស៊ុយអែត រិះគន់អាមេរិករឿងមិនមានគំនិតថ្មីពេលចរចា ទំនងជាការមិនពេញចិត្តរបស់កូរ៉េខាងជើងលើអាមេរិកប៉ុណ្ណោះ មិនមែនសំដៅប្រធានាធិបតី ដូណាល់ ត្រាំ ឡើយ។ បើតាមប្រព័ន្ធផ្សព្វផ្សាយរដ្ឋកូរ៉េខាងជើងនៅថ្ងៃទី២៤ ខែតុលា មេដឹកនាំកូរ៉េខាងជើង គីម ជុងអ៊ុន និងលោក ត្រាំ បន្តមានទំនាក់ទំនងជិតស្និទ្ធជាមួយគ្នាដដែល ហើយទំនាក់ទំនងនេះត្រូវបានលោក គីម ចាត់ទុកថាជាទំនាក់ទំនងពិសេសទៀតផង។
ចាប់តាំងពីជំនួបបរាជ័យនៅវៀតណាមមក ទំនាក់ទំនងរវាងអាមេរិក និងកូរ៉េខាងជើង មិនសូវល្អឡើយ។ ជំនួបរវាងប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន នៅតំបន់គ្មានយោធា និងជំនួបថ្នាក់ក្រុមចរចានៅស៊ុយអែតនោះ ក៏មិនបានជួយអ្វីដល់ទំនាក់ទំនងអាមេរិក និងកូរ៉េខាងជើង និងការរំសាយនុយក្លេអ៊ែរផងដែរ។ កូរ៉េខាងជើងបានរិះគន់អាមេរិកឥតប្រណីមាត់រឿងយកជំហរចាស់ទៅចរចា។
បើទោះជាយ៉ាងនេះក្តី ទីភ្នាក់ងារព័ត៌មានរដ្ឋកូរ៉េខាងជើង KCNA បានចុះផ្សាយនៅថ្ងៃទី២៤ ខែតុលាថា ពេលថ្មីៗនេះ លោក គីម បានចាត់ទុកទំនាក់ទំនងជាមួយប្រធានាធិបតីអាមេរិកជាទំនាក់ទំនងពិសេស។ ពាក្យទំនងទំនងពិសេសនេះ បានលេចចេញពីបបូរមាត់លោក ត្រាំ បន្ទាប់ពីក្លាយជាប្រធានាធិបតីអាមេរិកក្នុងតំណែងដំបូងគេជួបមេដឹកនាំកូរ៉េខាងជើងនោះ។
បើតាម KCNA មន្ត្រីក្រសួងការបរទេសឈ្មោះ Kim Kye Gwan អះអាងថា ទំនាក់ទំនងល្អរវាងមេដឹកនាំទាំងពីរ អាចជួយជំរុញកូរ៉េខាងជើងនិងអាមេរិកឆ្លងនៅឧបសគ្គទាំងអស់ជាមួយគ្នា ហើយដើម្បីពង្រឹងទំនាក់ទំនងទ្វេភាគឺនៃប្រទេសទាំងពីរអោយកាន់តែល្អជាមុន។ ប៉ុន្តែមន្ត្រីដដែលនេះ បែរជារិះគន់គោលនយោបាយ និងអ្នកសម្រេចចិត្តផ្នែកគោលនយោបាយអាមេរិកខ្លះទៀត ដែលមានគំនិតមិនល្អដាក់កូរ៉េខាងជើង។
«ខុសពីលោក ត្រាំ អ្នកនយោបាយអាមេរិក និងអ្នកសម្រេចចិត្តលើបញ្ហាកូរ៉េខាងជើងក្នុងរដ្ឋបាលអាមេរិក តែងតែរកកូរ៉េខាងជើងដោយគ្មានមូលហេតុ អមដោយគំនិតសម័យសង្គ្រាមត្រជាក់ និងការរើសអើងមនោគមន៍វិជ្ជា។» នេះបើតាមការលើកឡើងរបស់មន្ត្រីខាងលើដែលបន្ថែមថា កូរ៉េខាងជើងនឹងរង់ចាំមើលថា តើសហរដ្ឋអាមេរិកនឹងធ្វើអ្វីនៅចុងឆ្នាំនេះ។
មេដឹកនាំកូរ៉េខាងជើងបានសម្រេចយកចុងឆ្នាំនេះជាថ្ងៃផុតកំណត់សំរាប់កិច្ចពិភាក្សាជាមួយអាមេរិក បន្ទាប់ពីអ្នកចរចាកូរ៉េខាងជើងបានស្តីបន្ទោសអាមេរិកថានៅតែរក្សាជំហរ និងឥរិយាបថចាស់ដដែល។ ផុតឆ្នាំ២០១៩ កូរ៉េខាងជើងធ្លាប់គំរាមហើយថា ខ្លួននឹងចាប់ផ្ដើមសាកល្បងនុយក្លេអ៊ែរ ឬបាញ់មីស៊ីលបាលីស្ទិកចម្ងាយឡើងវិញ៕
© រក្សាសិទ្ធិដោយ thmeythmey.com