COVID-19
អន្តរជាតិ
២សប្តាហ៍ក្រោយតេស្តអវិជ្ជមាន បុរសថៃដែលធ្លាប់កើត COVID-19 ស្លាប់
01, Mar 2020 , 2:39 pm
×![]()
នៅថ្ងៃអាទិត្យនេះ ប្រទេស ថៃ បានប្រកាសពីករណីស្លាប់របស់បុរសថៃម្នាក់ដែលធ្លាប់កើតជំងឺផ្លូវដង្ហើមកូរ៉ូណា (COVID-19)។ បន្ថែមពីជំងឺ COVID-19 បុរសរូបនេះក៏ធ្លាប់មានជំងឺគ្រុនឈាមផងដែរ។ បើតាមក្រសួងសុខភាពសាធារណៈថៃ បុរសរូបនេះ បានសម្រាកព្យាបាលនៅមន្ទីរពេទ្យជិត១ខែ ហើយបានស្លាប់កាលពីថ្ងៃ២៩ ខែកុម្ភៈ។ 
ថ្លែងនៅសន្និសីទព័ត៌មានមួយ នៅថ្ងៃអាទិត្យទី ០១ ខែមីនា ប្រធាននាយកដ្ឋានគ្រប់គ្រងជំងឺថៃ លោក Suwanchai Wattanayingcharoen បានបញ្ជាក់ថា បុរសថៃអាយុ៣៥ឆ្នាំដែលបានស្លាប់រូបនេះ បានធ្វើតេស្តអវិជ្ជមានសម្រាប់ជំងឺ COVID-19 តាំងពីថ្ងៃ១៦ ខែកុម្ភៈមកម្ល៉េះ ហើយបានបន្ដសម្រាកព្យាបាលនៅវិទ្យាស្ថានជំងឺឆ្លង Bamrasnaradura ក្នុងក្រុង Nonthaburi ក្រៅរដ្ឋធានី បាងកក ។ ចុងក្រោយលោកស្លាប់កាលពីថ្ងៃសៅរ៍ម្សិលមិញ ដោយសារខូចសរីរាង្គខាងក្នុង។
«បន្ទាប់ពីជិតមួយខែនៃការព្យាបាល សួតរបស់លោក បានខូចខ្ទេចខ្ទី ចំណែកបេះដូង និងសរីរាង្គខាងក្នុងផ្សេងទៀតរបស់លោក បានធ្វើការធ្ងន់ហួសកម្លាំង។ ជាលទ្ធផល វាធ្វើឲ្យសរីរាង្គខាងក្នុងជាច្រើនរបស់លោកខូច និងបណ្ដាលឲ្យលោកស្លាប់»។ លោក Suwanchai បញ្ជាក់បែបនេះ ដោយដកស្រង់ចុះផ្សាយដោយទីភ្នាក់ងារព័ត៌មាន AFP ។
យ៉ាងណាមិញ លោក បន្ថែមទៀតថា មូលហេតុនៃការស្លាប់របស់បុរសថៃរូបនេះ នឹងត្រូវពិនិត្យវិនិច្ឆ័យបន្តទៀត ដោយគណៈកម្មាធិការជំងឺឆ្លងជាតិរបស់ថៃ។ ទន្ទឹមនេះ លោក បញ្ជាក់ទៀតថា អ្នកជំងឺរូបនេះ បានចូលមន្ទីរពេទ្យឯកជនមួយ កាលពីថ្ងៃ២៧ ខែមករា សម្រាប់ជំងឺគ្រុនឈាម ក៏ប៉ុន្តែបានផ្ទេរចេញទៅកាន់វិទ្យាស្ថានជំងឺឆ្លង Bamrasnaradura កាលពីថ្ងៃ ៥ ខែកុម្ភៈ។
គិតត្រឹមពេលនេះ ប្រទេសថៃ មានករណីឆ្លង COVID-19 សរុប ៤២ករណីហើយ។ ករណីចុងក្រោយបង្អស់ គឺបុរសវ័យ២១ឆ្នាំម្នាក់ដែលជានាំភ្ញៀវទេសចរ។ ក្នុងនោះ អ្នកជំងឺ ៣០នាក់ បានជាសះស្បើយ និងអនុញ្ញាតឲ្យចាកចេញពីមន្ទីរពេទ្យ៕
Tag:
COVID-19
© រក្សាសិទ្ធិដោយ thmeythmey.com
