អន្តរជាតិ
កូរ៉េខាងត្បូងមានករណីឆ្លង COVID-19 លើស៤ពាន់ករណី ខណៈអ្នកស្លាប់ឡើង២២នាក់
02, Mar 2020 , 10:59 am
ប្រភពរូប៖ AFP
×![]()
កូរ៉េខាងត្បូង បានបញ្ជាក់ពីការរកឃើញករណីជំងឺផ្លូវដង្ហើមកូរ៉ូណា (COVID-19) ចំនួន៤៧៦ករណីថ្មី នៅព្រឹកថ្ងៃចន្ទ ទី២ ខែមីនា ដែលធ្វើឲ្យតួលេខឆ្លងសរុបឡើងដល់ ៤២១២ ករណីហើយ។ បើតាមអាជ្ញាធរសុខាភិបាលកូរ៉េខាងត្បូង មនុស្ស២២នាក់ ដែលភាគច្រើនគឺសុទ្ធតែជាអ្នកជំងឺប្រចាំកាយស្រាប់ បានស្លាប់ដោយសារជំងឺផ្លូវដង្ហើមដែលផ្ទុះឡើងដំបូងក្នុងប្រទេសចិននេះ។ 
ក្នុងចំណោមករណីឆ្លងថ្មីទាំង៤៧៦នាក់នេះ អ្នកឆ្លង៣៧៧ករណី គឺស្ថិតក្នុងទីក្រុង Daegu ចម្ងាយ៣០០គីឡូម៉ែត្រពីរដ្ឋធានីសេអ៊ូល និង ៦៨នាក់ ស្ថិតក្នុងខេត្តក្បែរខាងក្រុងនេះគឺ ខេត្ត North Gyeongsang។ នេះបើតាមសេចក្តីថ្លែងការណ៍របស់មជ្ឈមណ្ឌលគ្រប់គ្រងនិងបង្ការជំងឺកូរ៉េខាងត្បូង (KCDC) ។
៦០ភាគរយនៃអ្នកជំងឺ COVID-19 ដែលបញ្ជាក់ថ្មីនេះ គឺពាក់ព័ន្ធនឹងវិហារសាសនាគ្រឹស្ត Shincheonji ក្នុងទីក្រុង Daegu ។ វិហារសាសនាគ្រឹស្ត Shincheonji ដែលស្ថិតក្នុងទីក្រុង Daegu ក្លាយជាចំណុចផ្ដើមនៃការផ្ទុះរីករាលដាលជំងឺ COVID-19 ក្រោយពីស្ត្រីកូរ៉េខាងត្បូងវ័យ ៦១ឆ្នាំម្នាក់ បានចេញរោគសញ្ញាក្តៅខ្លួន កាលពីថ្ងៃ១០ ខែកុម្ភៈ។ ក៏ប៉ុន្តែលោកស្រីបានទៅកាន់វិហារនេះយ៉ាងតិច ៤ ដង ក្នុងទីក្រុង Daegu ដែលជាទីក្រុងធំបំផុតលំដាប់ទី៤ ជាមួយប្រជាជន ២,៥លាននាក់ មុនពេលដឹងថាកើតជំងឺ។
តាមការចុះផ្សាយរបស់ទីភ្នាក់ងារព័ត៌មាន Yonhap ប្រធានាធិបតី មូន ចេអ៊ីន កាលពីថ្ងៃអាទិត្យ ទី០១ ខែមីនា គូសបញ្ជាក់ថា រដ្ឋាភិបាលលោក កំពុងដាក់ចេញចំណាត់ការឆ្លើយតបយ៉ាងខ្លាំងក្លា ក្រោយបង្កើនការប្រកាសអាសន្នវិបត្តិនេះទៅកម្រិតខ្ពស់បំផុត។ ត្រង់ចំណុចនេះ លោក មូន និយាយដូច្នេះថា៖«ខ្ញុំជឿជាក់ថា មនុស្សចូលរួមកាន់តែច្រើន នឹងពួតដៃគ្នាក្នុងកិច្ចប្រឹងប្រែងប្រយុទ្ធប្រឆាំងវីរុស COVID-19 ហើយយើងនឹងទទួលជោគជ័យលើវីរុសនេះ»៕
Tag:
កូរ៉េខាងត្បូង
COVID-19
កូរ៉ូណាវីរុស
© រក្សាសិទ្ធិដោយ thmeythmey.com
