COVID-19
អន្តរជាតិ
COVID19៖ ចិន ប្រកាសករណីឆ្លងថ្មី៤៤ ដែលជាតួលេខទាបបំផុតចាប់ពីពាក់កណ្តាលខែមករា
09, Mar 2020 , 2:13 pm
ជនជាតិចិន ត្រៀមដឹកជញ្ជូនបន្លែឲ្យប្រជាពលរដ្ឋចិន, រូបភាព៖ Reuters
×![]()
ដោយ: ធៀន ភារិន្ទ
ចិន នាថ្ងៃទី៨ ខែមីនា បានរកឃើញករណីឆ្លងCOVID-19 នៅក្នុងស្រុកចុះទាបបំផុត ដែលមានចំនួនត្រឹមតែ ៤៤ករណីតែប៉ុណ្ណោះ ចាប់តាំងពីថ្ងៃទី២០ ខែមករា កន្លងមក។ អត្រាឆ្លងក្នុងស្រុកធ្លាក់ចុះមែន ប៉ុន្តែអ្នកឆ្លងមកពីក្រៅប្រទេសបានកើនដល់ចំនួនសរុប ៦៧ករណី។
បន្ទាប់ពីរកឃើញនៅចុងឆ្នាំ២០១៩ ចិន បានរកឃើញករណីឆ្លង COVID-19 ជាបន្តបន្ទាប់នៅក្នុងប្រទេស។ ករណីសរុបចុងក្រោយ ចិនមានCOVID-19 ចំនួន ៨ម៉ឺនករណី។ មួយរយៈចុងក្រោយនេះ ទាំងស្ថានភាពឆ្លង ស្លាប់ គឺមានការធ្លាក់ចុះ គួរឲ្យកត់សម្គាល់។ នាថ្ងៃទី៨ ខែមីនា ចំនួនឆ្លងនៅប្រទេសចិន គឺមានតែ ៤៤ករណីឆ្លង និងស្លាប់ ២៧ករណី។ ចំនួននេះ ត្រូវបានគេមើលឃើញថា ចុះទាបចាប់តាំងពីថ្ងៃទី២០ ខែមករា កន្លងមក។
យ៉ាងណាក៏ដោយ បើទោះបីជាមានចំនួនច្រើនរហូតដល់ជាង ៨ម៉ឺនករណីក៏ពិតមែន ប៉ុន្តែអ្នកជាសះស្បើយនៅចិនក៏មានច្រើនផងដែរ។ បើតាមតួលេខអ្នកជាសះស្បើយ BNO Tracking Coronavirus មនុស្សចំនួនប្រមាណ ៥៨០០០នាក់ ត្រូវបានគេអនុញ្ញាតឲ្យចាកចេញពីមន្ទីរពេទ្យ។ នេះកើតចេញពីវិធានការ និងការខិតខំរបស់ចិន ដើម្បីទប់ស្កាត់វីរុសថ្មីមួយនេះ។
ករណីឆ្លងនៅក្នុងស្រុកធ្លាក់ចុះមែន ប៉ុន្តែអាជ្ញាធរចិន បារម្ភពីករណីឆ្លងមកបរទេសដូចជាអ៊ីតាលី និងអ៊ីរ៉ង់ជាដើម។ គិតត្រឹមថ្ងៃទី៨ ខែមីនានេះ ចិនបានរកឃើញចំនួនអ្នកឆ្លងCOVID-19 មកពីបរទេសចំនួន ៦៧ករណី ហើយភាគច្រើននៃអ្នកជំងឺ គឺមកពីអ៊ីតាលី និងអ៊ីរ៉ង់។
មួយរយៈចុងក្រោយ ករណីឆ្លង និងករណីស្លាប់នៅចិនធ្លាក់ចុះ ប៉ុន្តែ COVID-19 បន្តកើនឡើងនៅក្រៅប្រទេស។ បើធៀបក្នុងថ្ងៃទី៨ ខែមីនា ចិនមានករណីឆ្លង ត្រឹមតែ៤៤ករណី ស្លាប់ ២៧ករណី ប៉ុន្តែអ៊ីតាលី មានរហូតដល់ទៅជិត ១៥០០ករណី និងស្លាប់ ១៣៣ករណីឯណោះ។ សម្រាប់អ៊ីរ៉ង់វិញ ក៏កើនឡើងយ៉ាងគំហុកផងដែរ។ ក្នុងតួលេខអ្នកឆ្លងក្នុងថ្ងៃដដែលនេះ អ៊ីរ៉ង់មានរហូតដល់ទៅ ៧៤៣ករណី និងអ្នកស្លាប់ ៤៩ករណី៕
Tag:
ចិន
COVID-19
© រក្សាសិទ្ធិដោយ thmeythmey.com
